Allu Arjun: 10 ఏళ్ల తర్వాత బోయపాటితో చిత్రం.? పౌరాణిక కథకు సిద్ధమవుతున్న బన్నీ.!

Allu Arjun: అల్లు అర్జున్, బోయపాటి శ్రీను.. ఈ రెండు పేర్లు కలిస్తే 'సరైనోడు' గుర్తుకు రావడం సహజమే. 2016లో వచ్చిన ఆ సినిమా బాక్సాఫీస్ వద్ద భారీ విజయాన్ని అందుకుంది. ఇప్పుడు సరిగ్గా పదేళ్ల తర్వాత ఈ హిట్ కాంబినేషన్ మరోసారి ప్రేక్షకుల ముందుకు రావడానికి సిద్ధమవుతున్నట్లు టాలీవుడ్‌లో వార్తలు వినిపిస్తున్నాయి. ఈసారి మాత్రం బన్నీ కోసం బోయపాటి ఎంచుకున్న కథ సాధారణ మాస్ కమర్షియల్ సినిమా కాదట. పూర్తిస్థాయి పౌరాణిక నేపథ్యంతో రూపొందే ఈ ప్రాజెక్ట్ పాన్ ఇండియా స్థాయిలో భారీగా తెరకెక్కనుందని టాక్ వినిపిస్తోంది.

అల్లు అర్జున్ ఇప్పటివరకు ఎన్నో రకాల పాత్రల్లో కనిపించినా, పౌరాణిక కథలో మాత్రం నటించలేదు. అందుకే ఇది ఆయన కెరీర్‌లో కొత్త జానర్ అవుతుందని చెబుతున్నారు. బోయపాటి చెప్పిన కథ బన్నీకి బాగా నచ్చిందని సినీ వర్గాల్లో ప్రచారం జరుగుతోంది. కథలోని కాన్సెప్ట్, పాత్రలోని వైవిధ్యం నచ్చడంతోనే ఆయన ప్రాజెక్ట్‌కు గ్రీన్ సిగ్నల్ ఇచ్చినట్లు సమాచారం. గతంలో త్రివిక్రమ్ శ్రీనివాస్ దర్శకత్వంలో బన్నీతో ఒక మైథలాజికల్ సినిమా ఉంటుందనే వార్తలు వచ్చాయి. ఇప్పుడు ఆ జానర్‌లో బన్నీని తెరపై చూపించే అవకాశం బోయపాటికి దక్కినట్లు తెలుస్తోంది.

ఈ భారీ చిత్రాన్ని గీతా ఆర్ట్స్ బ్యానర్‌పై అల్లు అరవింద్ నిర్మించనున్నట్లు సమాచారం. 'సరైనోడు'ను కూడా ఇదే బ్యానర్‌పై నిర్మించారు. ఆ సినిమా 2016 ఏప్రిల్ 22న విడుదలైంది. బోయపాటి ఆ స్క్రిప్ట్‌ను అల్లు అర్జున్‌ను దృష్టిలో ఉంచుకుని రాశారు. పౌరాణిక కథ కావడంతో భారీ సెట్స్, విజువల్ ఎఫెక్ట్స్, యాక్షన్ ఎపిసోడ్స్‌కు ఎక్కువ ప్రాధాన్యం ఉండే అవకాశం ఉంది. దీంతో బన్నీ కెరీర్‌లోనే అత్యంత ప్రతిష్ఠాత్మక చిత్రాల్లో ఒకటిగా దీన్ని తీర్చిదిద్దే ఆలోచనలో ఉన్నట్లు టాక్.

బోయపాటి ఇటీవలే తన తదుపరి సినిమా ప్రకటన నెలాఖరులోగా ఉంటుందని చెప్పారు. తిరుమల దర్శనం అనంతరం ఆయన ఈ వ్యాఖ్య చేయడంతో అల్లు అర్జున్‌తో సినిమా అనే ప్రచారం మొదలైంది. 'అఖండ 2' ఆశించిన ఫలితం ఇవ్వకపోవడంతో బోయపాటి కొంత విరామం తీసుకున్నారని రిపోర్టులు చెబుతున్నాయి. అప్పట్లో బన్నీతో కొన్ని సమావేశాలు జరిగినా, తుది ఆమోదం రాలేదని వార్తలు వచ్చాయి. కాబట్టి ఈ ప్రాజెక్ట్ గురించి ఇప్పటికీ అధికారిక సమాచారం లేదు.

ప్రస్తుతం అల్లు అర్జున్ చేతిలో వరుసగా భారీ ప్రాజెక్టులు ఉన్నాయి. 'పుష్ప 2' విజయం తర్వాత అట్లీ దర్శకత్వంలో 'రాకా'లో నటిస్తున్నారు. ఈ సినిమాను సన్ పిక్చర్స్ నిర్మిస్తోంది. దీపికా పదుకొణె కథానాయిక. ఇది రెండు భాగాల సైన్స్ ఫిక్షన్ ఫ్రాంచైజీగా తెరకెక్కుతున్నట్లు, అందులో బన్నీ తొలిసారి బహుళ పాత్రల్లో కనిపించనున్నట్లు రిపోర్టులు చెబుతున్నాయి. దీని తర్వాత లోకేష్ కనగరాజ్‌తో ఒక సినిమా చేయనున్నట్లు తెలుస్తోంది. ఈ రెండు చిత్రాల తర్వాతే బోయపాటి ప్రాజెక్ట్ సెట్స్‌పైకి వెళ్లే అవకాశం ఉందని సమాచారం.

పౌరాణిక కథలకు ప్రేక్షకుల్లో పెరుగుతున్న ఆదరణకు తోడు బన్నీ స్టార్ ఇమేజ్, బోయపాటి మాస్ టేకింగ్ కలిస్తే ఫలితం ఎలా ఉంటుందన్న ఆసక్తి ఇప్పటికే మొదలైంది. అయితే ఈ కాంబినేషన్‌పై అభిమానుల్లో భిన్నాభిప్రాయాలు కూడా ఉన్నాయి. కొందరు మలయాళ దర్శకుడు బాసిల్ జోసెఫ్ వంటి వారితో బన్నీ సినిమా చేయాలని కోరుకుంటున్నారు. ప్రాజెక్ట్‌కు సంబంధించిన అధికారిక ప్రకటన ఎప్పుడు వస్తుందో చూడాలి.