Bellamkonda Sai Sreenivas: తిరుమల కొండపై వైభవంగా బెల్లంకొండ సాయి శ్రీనివాస్ వివాహం..!

Bellamkonda Sai Sreenivas: టాలీవుడ్ యంగ్ హీరో బెల్లంకొండ సాయి శ్రీనివాస్ వివాహ బంధంలోకి అడుగుపెట్టారు. బుధవారం (ఏప్రిల్ 29, 2026) రాత్రి తిరుమలలోని శ్రీ వేంకటేశ్వర స్వామి సాక్షిగా కావ్య రెడ్డి మెడలో మూడుముళ్లు వేశారు. అత్యంత వైభవంగా, ఆధ్యాత్మిక వాతావరణంలో జరిగిన ఈ వేడుకతో వీరిద్దరూ నూతన జీవితాన్ని ప్రారంభించారు.

శ్రీవారి సన్నిధిలో జరిగిన ఈ వివాహ వేడుకకు ఇరు కుటుంబ సభ్యులతో పాటు రాజకీయ, సినీ రంగానికి చెందిన పలువురు ప్రముఖులు హాజరయ్యారు. తెలంగాణ ఉప ముఖ్యమంత్రి మల్లు భట్టి విక్రమార్క ఈ వివాహానికి విచ్చేసి నూతన వధూవరులను ఆశీర్వదించారు. వేద మంత్రాల సాక్షిగా, సనాతన ధర్మం ప్రకారం శాస్త్రోక్తంగా ఈ పెళ్లి జరిగింది. వధూవరులిద్దరూ ప్రముఖ డిజైనర్ శ్రావణ్ కుమార్ రూపొందించిన సంప్రదాయ వస్త్రాల్లో మెరిసిపోయారు.

తిరుమలలో కేవలం సన్నిహితుల మధ్య వివాహం జరగగా, సినీ పరిశ్రమలోని సహచరులు మరియు ఇతర ప్రముఖుల కోసం మే 1 (శుక్రవారం) నాడు హైదరాబాద్‌లో భారీ వివాహ విందు (Reception) ఏర్పాటు చేయనున్నారు. గతేడాది ‘కిష్కింధపురి’ చిత్రంతో మంచి విజయాన్ని అందుకున్న సాయి శ్రీనివాస్, ప్రస్తుతం కెరీర్ పరంగా కూడా ఫుల్ బిజీగా ఉన్నారు. ఆయన నటిస్తున్న తాజా చిత్రాలు..

టైసన్ నాయుడు: సాగర్ కె. చంద్ర దర్శకత్వంలో తెరకెక్కుతున్న ఈ సినిమాపై భారీ అంచనాలు ఉన్నాయి. హైందవ: లుధీర్ బైరెడ్డి దర్శకత్వంలో వస్తున్న మరో క్రేజీ ప్రాజెక్ట్. దీంతో పాటు 'భైరవం' అనే మరో సినిమా కూడా సెట్స్‌పై ఉంది.