Nana Patekar: ఇండస్ట్రీలో తీవ్ర విషాదం.. విలక్షణ నటుడు నానా పటేకర్ కన్నుమూత

Nana Patekar: భారతీయ సినీ రంగానికి తీరని లోటు ఏర్పడింది. విలక్షణ నటనతో కోట్లాది మంది అభిమానుల హృదయాలను గెలుచుకున్న దిగ్గజ నటుడు నానా పటేకర్ (75) గురువారం ఉదయం హఠాన్మరణం చెందారు. గోవాలోని తన నివాసంలో ఉన్న సమయంలో నానా పటేకర్‌కు ఒక్కసారిగా తీవ్ర గుండెపోటు వచ్చింది. దీంతో కుటుంబ సభ్యులు ఆయనను వెంటనే మణిపాల్ ఆసుపత్రికి తరలించారు. ఆసుపత్రికి తీసుకువచ్చిన సమయం నుంచి నిపుణులైన వైద్య బృందం ఆయనను కాపాడేందుకు శతవిధాలా ప్రయత్నించింది. సుమారు 45 నిమిషాల పాటు నాన్‌స్టాప్‌గా సీపీఆర్ అందిస్తూ ప్రాణాలు నిలిపేందుకు పోరాడారు. దురదృష్టవశాత్తు ఆయన ఆరోగ్యం ఎంతకీ మెరుగుపడకపోవడంతో తెల్లవారుజామున 5:20 గంటల సమయంలో కన్నుమూసినట్లు మణిపాల్ ఆసుపత్రి ఆంకాలజీ విభాగం హెడ్ డాక్టర్ శేఖర్ సాల్కర్ అధికారికంగా ధృవీకరించారు.

పోస్టుమార్టం నిర్వహణ

ఈ హఠాత్ పరిణామంపై వైద్య నిపుణులు స్పందిస్తూ మరణానికి గల కచ్చితమైన కారణాలను నిర్ధారించేందుకు మెడికో-లీగల్ కేసు (MLC) నమోదు చేసినట్లు తెలిపారు. వైద్య నిబంధనల ప్రకారం పోస్టుమార్టం నిర్వహించిన అనంతరమే మరణానికి సంబంధించిన పూర్తి వివరాలను ప్రకటిస్తామని చెప్పారు. ప్రస్తుతం భారతీయ చిత్రపరిశ్రమ ఈ విషాద వార్తతో తీవ్ర శోకసంద్రంలో మునిగిపోయింది. ఆయన ఆకస్మిక మృతి పట్ల పలువురు సినీ, రాజకీయ ప్రముఖులు దిగ్భ్రాంతి వ్యక్తం చేస్తున్నారు.

నాలుగు దశాబ్దాల వెండితెర ప్రయాణం

విశ్వనాథ్ పటేకర్ అనే అసలు పేరున్న నానా పటేకర్, 1978లో వచ్చిన గమన్ సినిమా ద్వారా వెండితెరకు పరిచయమయ్యారు. నాలుగు దశాబ్దాలకు పైగా సాగిన ఆయన నటనా ప్రయాణంలో హిందీ, మరాఠీ భాషల్లో అనేక గుర్తుండిపోయే పాత్రలు పోషించారు. పరిందా, అంగార్, తిరంగా, క్రాంతివీర్, అగ్నిసాక్షి, అబ్ తక్ ఛప్పన్, అపహరణ్, వెల్కమ్, నట్ సమ్రాట్ వంటి చిత్రాల్లో ఆయన చూపించిన నటన ప్రతి ఒక్కరినీ మంత్రముగ్ధులను చేసింది. సంభాషణలు చెప్పడంలో ఆయనకున్న ప్రత్యేకమైన శైలి, నటనలో కనిపించే తీవ్రత ఆయనను దేశంలోనే అత్యుత్తమ నటులలో ఒకరిగా నిలబెట్టాయి.

జాతీయ పురస్కారాలు

క్రాంతివీర్ చిత్రంలో కనబరిచిన అద్భుత నటనకు గాను ఆయన జాతీయ ఉత్తమ నటుడి అవార్డును అందుకున్నారు. మొత్తం మూడు జాతీయ చలనచిత్ర పురస్కారాలతో పాటు పలు ఫిలింఫేర్ అవార్డులను ఆయన సొంతం చేసుకున్నారు. కళారంగానికి ఆయన చేసిన విశేష సేవలను గుర్తించిన భారత ప్రభుత్వం 2013లో ఆయనను ‘పద్మశ్రీ’ పురస్కారంతో సత్కరించింది. కేవలం నటుడిగానే కాకుండా రచయితగా, దర్శకుడిగా కూడా ఆయన తన ముద్ర వేశారు. ప్రహార్: ది ఫైనల్ ఎటాక్ చిత్రం ద్వారా ఆయన దర్శకత్వ ప్రతిభను ప్రపంచానికి చాటిచెప్పారు.