ముంబైలో లగ్జరీ ఫ్లాట్‌ను అద్దెకు ఇచ్చిన దిశా పటాని.. నెలకు అంత రెంట్ వస్తుందా!

Disha Patani: బాలీవుడ్ స్టార్ బ్యూటీ, గ్లోబల్ యాక్ట్రెస్ దిశా పటాని సినిమాలతోనే కాకుండా రియల్ ఎస్టేట్ ఇన్వెస్ట్‌మెంట్స్‌తోనూ వార్తల్లో నిలుస్తోంది. ముంబైలోని అత్యంత విలాసవంతమైన ప్రాంతాలలో ఒకటైన ఖార్ వెస్ట్ పరిధిలో ఉన్న తన లగ్జరీ అపార్ట్‌మెంట్‌ను ఆమె భారీ మొత్తానికి అద్దెకు ఇచ్చింది. ప్రముఖ , ప్రీమియం రెసిడెన్షియల్ ప్రాజెక్ట్ అయిన 'రుస్తుంజీ పారామౌంట్' లో ఈ ఫ్లాట్ ఉంది. ఈ లీవ్ అండ్ లైసెన్స్ ఒప్పందం జూన్ ఒకటి, రెండు వేల ఇరవై ఆరున అధికారికంగా రిజిస్టర్ అయ్యింది. ఈ అగ్రిమెంట్ రెండేళ్ల పాటు అమలులో ఉంటుంది.

నెలకు రెండు లక్షల ఎనభై ఐదు వేల అద్దె.. మూడు నెలల అడ్వాన్స్

ప్రాపర్టీ రిజిస్ట్రేషన్ డాక్యుమెంట్స్ (Zapkey) ప్రకారం.. ఈ లగ్జరీ అపార్ట్‌మెంట్ వెయ్యి చదరపు అడుగుల కంటే ఎక్కువ విస్తీర్ణంలో, రెసిడెన్షియల్ టవర్ లోని పై అంతస్తులలో ఒకదానిలో ఉంది. దిశా పటాని ఈ ప్రాపర్టీని కమలాబెన్ మంగళ్ భాయ్ గుజ్జర్ అనే వ్యక్తికి లీజుకు ఇచ్చింది. ఇందుకోసం సదరు టెనెంట్ మూడు నెలల రెంట్‌కు సమానమైన ఎనిమిది లక్షల యాభై ఐదు వేల రూపాయలను సెక్యూరిటీ డిపాజిట్‌గా చెల్లించారు. ఈ ఫ్లాట్ కు ప్రారంభ నెలవారీ అద్దెగా రెండు లక్షల ఎనభై ఐదు వేల రూపాయలను ఫిక్స్ చేశారు.

రెండేళ్లలో డెబ్బై ఒక్క లక్షల ఆదాయం..

ఈ లీజు ఒప్పందంలో ఒక కీలకమైన క్లాజ్ కూడా ఉంది. దీని ప్రకారం మొదటి ఏడాది పూర్తయిన తర్వాత నెలవారీ అద్దెపై ఐదు శాతం పెరుగుదల ఉంటుంది. అంటే రెండో సంవత్సరంలో ఈ ఫ్లాట్ నెలవారీ అద్దె సుమారు రెండు లక్షల తొంభై తొమ్మిది వేల రూపాయలకు చేరుకుంటుంది. ఈ అద్దె పెరుగుదల నిబంధన ద్వారా ఈ ఇరవై నాలుగు నెలల లీజు కాలంలో దిశా పటాని కేవలం రెంట్ రూపంలోనే దాదాపు డెబ్బై ఒక్క లక్షల రూపాయల వరకు ఆదాయాన్ని ఆర్జించబోతోంది.

టైగర్ ష్రాఫ్ తల్లి ఆయేషా ష్రాఫ్ స్పెషల్ బర్త్‌డే విషెస్

ఇదిలా ఉంటే, దిశా పటాని ఇటీవల తన పుట్టినరోజు సందర్భంగా టైగర్ ష్రాఫ్ తల్లి ఆయేషా ష్రాఫ్ నుండి అందుకున్న హృదయపూర్వక బర్త్‌డే విషెస్‌తో సోషల్ మీడియాలో హాట్ టాపిక్‌గా మారింది. ఆయేషా ష్రాఫ్ సోషల్ మీడియా వేదికగా దిశాపై తనకున్న ప్రేమను వ్యక్తపరుస్తూ.. భవిష్యత్తులో ఇద్దరం కలిసి మరిన్ని ప్రయాణాలు చేయాలని ఆశిస్తున్నట్లు పేర్కొంది. రెండు వేల ఇరవై రెండు లో టైగర్ ష్రాఫ్, దిశా పటాని విడిపోయినట్లు వార్తలు వచ్చినప్పటికీ.. టైగర్ సోదరి కృష్ణ ష్రాఫ్, తల్లి ఆయేషాలతో దిశా ఇప్పటికీ మంచి బాండింగ్ మెయింటైన్ చేస్తోందని ఈ పోస్ట్ ద్వారా మరోసారి స్పష్టమైంది.

మ్యూజిక్ వీడియోతో మొదలైన ప్రయాణం..

దిశా పటాని, టైగర్ ష్రాఫ్ చాలా కాలం పాటు డేటింగ్‌లో ఉన్నట్లు బాలీవుడ్ వర్గాల్లో గట్టి ప్రచారం సాగింది. వీరిద్దరూ కలిసి పలు పబ్లిక్ ఈవెంట్‌లు, వెకేషన్‌లు , ఫ్యామిలీ ఫంక్షన్లలో సందడి చేశారు. అయితే తమ రిలేషన్‌షిప్‌పై ఎప్పుడూ అధికారికంగా స్పందించని ఈ జంట.. తామిద్దరం మంచి స్నేహితులం మాత్రమే అని చెప్పుకునేవారు. మొదట వీరు 'బేఫిక్రా'అనే మ్యూజిక్ వీడియో కోసం కలిసి పనిచేయగా, ఆ తర్వాత రెండు వేల పద్దెనిమిది లో వచ్చిన యాక్షన్ ఎంటర్‌టైనర్ 'బాఘీ 2' సినిమాలో జంటగా నటించి మెప్పించారు.