చిరంజీవి రంగ ప్రవేశం.. ఎగ్జిబిటర్ల పర్సంటేజ్ పంచాయితీకి తెరపడేనా.?

Telugu Film Industry :తెలుగు చిత్ర పరిశ్రమలో కొంతకాలంగా నిర్మాతలు, థియేటర్ల ఎగ్జిబిటర్ల (యజమానుల) మధ్య నలుగుతున్న పర్సంటేజ్ వివాదం ఇప్పుడు టాలీవుడ్ పెద్ద దిక్కు, మెగాస్టార్ చిరంజీవి వద్దకు చేరింది. థియేటర్ల నుంచి వచ్చే కలెక్షన్ల షేరింగ్ (పర్సంటేజ్ విధానం) పై ఇరు వర్గాల మధ్య సయోధ్య కుదరకపోవడంతో.. ఈ సంక్షోభాన్ని పరిష్కరించేందుకు మెగాస్టార్ రంగంలోకి దిగారు. తెలంగాణకు చెందిన థియేటర్ ఎగ్జిబిటర్లు ఈరోజు సాయంత్రం 4 గంటలకు చిరంజీవితో ప్రత్యేకంగా భేటీ కానున్నారు.

సమయం ఇచ్చిన మెగాస్టార్

గత కొన్ని రోజులుగా ఇండస్ట్రీలో నిర్మాతలు ఒకలా, ఎగ్జిబిటర్లు మరోలా వాదిస్తుండటంతో థియేటర్ల వ్యాపారంలో సందిగ్ధత నెలకొంది. ఈ సమస్యకు ఒక శాశ్వత పరిష్కారాన్ని చూపించాల్సిందిగా తెలంగాణ ఎగ్జిబిటర్ల అసోసియేషన్ ప్రతినిధులు మెగాస్టార్‌ను కోరారు. ఇండస్ట్రీ క్షేమాన్ని కాంక్షించే చిరంజీవి, వారి అభ్యర్థనను మన్నించి సమస్యను సుదీర్ఘంగా చర్చించేందుకు ఈరోజు సాయంత్రం 4 గంటలకు వారికి అపాయింట్‌మెంట్ ఇచ్చారు.

ఫిల్మ్ ఛాంబర్ కమిటీపై అసంతృప్తి

నిజానికి ఈ పర్సంటేజ్ వివాదంపై చర్చించి, ఒక నిర్ణయానికి రావడానికి తెలుగు ఫిల్మ్ ఛాంబర్ ఆఫ్ కామర్స్ ఆధ్వర్యంలో ఒక ప్రత్యేక కమిటీని వేశారు. అయితే, ఈ కమిటీ ఇచ్చిన నివేదిక, చేసిన సూచనలపై థియేటర్ల ఎగ్జిబిటర్లు తీవ్ర అసంతృప్తితో ఉన్నారు. కమిటీ ప్రతిపాదించిన అంశాలు తమకు నష్టం చేకూర్చేలా ఉన్నాయని, తాము డిమాండ్ చేస్తున్న పర్సంటేజ్ విధానానికే కట్టుబడి ఉన్నామని వారు స్పష్టం చేస్తున్నారు. ఛాంబర్ కమిటీతో చర్చలు కొలిక్కి రాకపోవడంతోనే వారు చిరంజీవిని ఆశ్రయించారు.

మెగాస్టార్ జోక్యంతో ముగింపు దొరికేనా?

చిత్ర పరిశ్రమలో ఎలాంటి సంక్షోభం ఎదురైనా ముందుండి నడిపించే చిరంజీవి.. ఈ ‘నిర్మాతలు వర్సెస్ ఎగ్జిబిటర్స్’ వివాదానికి కూడా ఒక సముచితమైన ముగింపు పలుకుతారని పరిశ్రమ వర్గాలు గట్టిగా నమ్ముతున్నాయి. ఇరు వర్గాలకు నష్టం జరగకుండా, ముఖ్యంగా ఇండస్ట్రీ మనుగడకు ఇబ్బంది లేకుండా చిరంజీవి ఒక మధ్యేమార్గం సూచించే అవకాశం ఉంది. ఈరోజు సాయంత్రం జరిగే ఈ హై-ప్రొఫైల్ భేటీ తర్వాత ఈ పర్సంటేజ్ పంచాయితీకి పూర్తిగా తెరపడుతుందో లేదో చూడాలి.