గుండెలు పిండేసే ఎమోషన్స్‌తో ‘దీవానా’ ట్రైలర్ వచ్చేసింది!

Deewana: యువ నటులు హర్షిత్ రెడ్డి, స్మేహ మణిమేఖలై ప్రధాన పాత్రల్లో నటించిన లేటెస్ట్ రొమాంటిక్ ఎమోషనల్ డ్రామా ‘దీవానా’. సరికొత్త కథాంశంతో వస్తున్న ఈ చిత్రం ద్వారా శ్రీకాంత్ సంగిశెట్టి దర్శకుడిగా పరిచయమవుతున్నారు. ప్రేమ, విరహం, ఇంటెన్స్ ఎమోషన్స్ బ్యాక్‌డ్రాప్‌లో రూపొందిన ఈ సినిమా అధికారిక ట్రైలర్ తాజాగా విడుదలై ప్రేక్షకులలో మంచి ఆసక్తిని రేకెత్తిస్తోంది. ఈ లవ్ స్టోరీ జూన్ 19న ప్రపంచవ్యాప్తంగా థియేటర్లలో గ్రాండ్ గా విడుదల కానుంది.

వన్‌సైడ్ లవర్స్ అందరికీ అంకితం..

ట్రైలర్ ప్రారంభంలోనే "వన్‌సైడ్ లవర్స్ అందరికీ అంకితం" అంటూ వేసిన క్యాప్షన్ యువతను విశేషంగా ఆకట్టుకుంటోంది. ఈ సినిమాలో హీరో తన ప్రేయసి ‘అమ్ము’ కోసం ఎంతటి పిచ్చి ప్రేమకైనా తెగిస్తాడనే విషయాన్ని చాలా ఇంటెన్స్ గా చూపించారు. ఆమె పేరును తన గుండెపై టాటూ వేయించుకోవడం, ఆమెను ఎవరైనా చిన్న మాట అన్నా తట్టుకోలేక సొంత స్నేహితులతోనే గొడవ పడటం వంటి సీన్లు హీరో పాత్రలోని తీవ్రతను తెలియజేస్తున్నాయి. చివరికి ఆ అమ్మాయి ప్రేమ కోసం తన తల్లిదండ్రులకు కూడా దూరమయ్యే ఒక రగ్గడ్ లవర్ బాయ్ గా హర్షిత్ రెడ్డి సరికొత్త మేకోవర్‌లో అద్భుతంగా కనిపించారు.

వైబ్రెంట్ లుక్‌లో హీరోయిన్..

హీరోయిన్ స్మేహ మణిమేఖలై స్క్రీన్ పై చాలా చార్మింగ్ గా, వైబ్రెంట్ గా కనిపిస్తూ ప్రేక్షకులను మెప్పించడానికి సిద్ధమైంది. అమ్ము తనను తిరస్కరించినప్పటికీ హీరో ఆమెను ఎలా రక్షించాడు, తన నిఖార్సయిన ప్రేమను ఎలా గెలుచుకున్నాడనే పాయింట్ చుట్టూ కథ నడుస్తుంది. ఈ చిత్రంలో సీనియర్ నటులు ఝాన్సీ, నరేష్ కీలక పాత్రలు పోషించారు. ఈశ్వర్ చంద్ అందించిన బ్యాక్‌గ్రౌండ్ స్కోర్, పాటలు ట్రైలర్‌లోని ఎమోషన్ ను నెక్స్ట్ లెవెల్‌కి తీసుకెళ్లాయి.

గీతా ఆర్ట్స్ డిస్ట్రిబ్యూషన్.. భారీ అంచనాలు

ప్రముఖ నిర్మాణ సంస్థ గీతా ఆర్ట్స్ ఈ చిత్రాన్ని థియేటర్లలో భారీ స్థాయిలో డిస్ట్రిబ్యూట్ చేస్తుండటం సినిమాపై అంచనాలను మరింత పెంచేసింది. అర్హ మీడియా, వాసుదేవ్ కొప్పినేని, శ్రీదేవి కార్యంపూడి సంయుక్తంగా ఈ ప్రతిష్టాత్మకమైన ప్రేమకథను నిర్మించారు. ట్రైలర్ కటింగ్ లోనే మేకర్స్ అనుకున్న ఎమోషనల్ డెప్త్ ప్రేక్షకులకు స్పష్టంగా అర్థమవుతోంది. మరి ఈ ఇంటెన్స్ వన్ సైడ్ లవ్ స్టోరీ థియేటర్లలో యువతను ఏ మేరకు మెప్పిస్తుందో తెలియాలంటే జూన్ 19 వరకు ఆగాల్సిందే.