రెండో పెళ్లి విఫలం.. విడాకుల తర్వాత మళ్లీ ఒక్కటైన సినీ జంట!

Ranjith and Priya Raman reunited: సినిమా ఇండస్ట్రీలో ప్రేమలు, పెళ్లిళ్లు, విడాకులు సాధారణమే. అయితే విడిపోయిన తర్వాత కొన్నేళ్లకు మళ్లీ ఒక్కటై తమ వైవాహిక జీవితానికి మరో అవకాశం ఇచ్చే జంటలు చాలా అరుదు. అలాంటి అరుదైన ప్రేమకథకు దక్షిణాది సినీ నటులు రంజిత్, ప్రియా రామన్ దంపతులు ఉదాహరణగా నిలిచారు. 16 ఏళ్ల వైవాహిక బంధం తర్వాత విడాకులు తీసుకున్న ఈ జంట.. రంజిత్ రెండో వివాహం కూడా విఫలమైన అనంతరం తిరిగి ఒక్కటయ్యారు. అనారోగ్య సమయంలో ప్రియా రామన్ ఆయనకు అండగా నిలవడంతో ఇద్దరి మధ్య బంధం మరోసారి బలపడినట్లు తెలుస్తోంది.

ప్రేమలో పడి పెళ్లి చేసుకున్న జంట

1999లో విడుదలైన 'నేసం పుదుసు' సినిమాలో రంజిత్, ప్రియా రామన్ కలిసి నటించారు. ఈ సినిమా చిత్రీకరణ సమయంలో ఇద్దరి మధ్య ప్రేమ చిగురించింది. అనంతరం పెద్దల అంగీకారంతో వివాహం చేసుకున్నారు. ఈ దంపతులకు ఇద్దరు కుమారులు ఉన్నారు. పెళ్లి తర్వాత ప్రియా రామన్ కొంతకాలం సినిమాలకు దూరంగా ఉంటూ బుల్లితెరపై నటిగా కొనసాగారు.

అయితే వ్యక్తిగత కారణాలతో 2014లో ఈ జంట పరస్పర అంగీకారంతో విడాకులు తీసుకుంది. విడాకుల అనంతరం ప్రియా రామన్ తిరిగి నటనపై దృష్టి సారించారు. మరోవైపు రంజిత్ అదే ఏడాది నటి రాగసుధను రెండో వివాహం చేసుకున్నారు. కానీ ఈ బంధం కూడా ఎక్కువకాలం కొనసాగలేదు. 2015లోనే వీరిద్దరూ విడిపోయారు.

అనారోగ్య సమయంలో అండగా నిలిచిన మాజీ భార్య

రంజిత్ రెండో వివాహం విఫలమైన తర్వాత కొన్నేళ్లకు ప్రియా రామన్‌తో ఆయన మళ్లీ దగ్గరయ్యారు. రంజిత్ అనారోగ్యానికి గురైన సమయంలో ప్రియా రామన్ ఆయనకు అండగా నిలిచినట్లు సమాచారం. ఈ క్రమంలో ఇద్దరి మధ్య పాత అనుబంధం మళ్లీ చిగురించింది. దీంతో విడిపోయిన ఈ జంట తిరిగి కలిసింది. కొవిడ్ సమయంలో వీరిద్దరూ మరోసారి వివాహం చేసుకున్నట్లు సమాచారం. ప్రస్తుతం వీరి ప్రేమకథ సినీ వర్గాల్లో ఆసక్తికరంగా మారింది.

ఇద్దరిదీ సుదీర్ఘ సినీ ప్రయాణం

రంజిత్, ప్రియా రామన్ ఇద్దరూ 1993లోనే సినీ రంగంలోకి అడుగుపెట్టారు. రెహమాన్, రమ్యకృష్ణ నటించిన 'పొన్ విలంగు' సినిమాతో రంజిత్ నటుడిగా పరిచయమయ్యారు. ప్రియా రామన్ రజనీకాంత్ ప్రత్యేక పాత్రలో కనిపించిన 'వల్లి' చిత్రంతో కథానాయికగా తెరంగేట్రం చేశారు.

ఆ తర్వాత రంజిత్ 'సింధు నది పూ', 'మైనర్ మాపిళ్లై', 'ధర్మ', 'పుదుమై పిత్తన్' వంటి పలు చిత్రాల్లో నటించారు. 'మరు మలర్చి' సినిమాలో ప్రతినాయకుడిగా నటించి తమిళనాడు రాష్ట్ర చలనచిత్ర పురస్కారాన్ని అందుకున్నారు.

మరోవైపు ప్రియా రామన్ దక్షిణాదిలోని పలువురు అగ్ర కథానాయకుల సరసన నటించి గుర్తింపు తెచ్చుకున్నారు. మోహన్‌లాల్‌తో 'మంత్రికం', 'ఆరామ్ తంపురాన్', మమ్ముట్టితో 'సైన్యం', కమల్‌హాసన్‌తో 'శుభ సంకల్పం' వంటి చిత్రాల్లో కీలక పాత్రలు పోషించారు. తెలుగులో 'పడి పడి లేచే మనసు', 'దొరబాబు', 'శ్రీవారి ప్రియురాలు', 'మా ఊరి మహారాజు', బాలకృష్ణతో 'శ్రీకృష్ణార్జున విజయం' వంటి సినిమాల్లో నటించి తెలుగు ప్రేక్షకులకు కూడా చేరువయ్యారు.