Dussehra Box Office Clash: డబ్బింగ్ సినిమాకే జై కొట్టిన తెలుగు ప్రేక్షకులు..దసరా విన్నర్ ఆ సినిమానే!

Jailer 2 Box Office Collections: ఈ దసరా పండుగ బాక్సాఫీస్ బరిలో కంటెంట్ కంటే హీరో ఎలివేషన్లు, అన్‌-మ్యాచ్డ్ స్వాగ్‌లకే ప్రేక్షకులు జైకొడుతున్నారు. బలమైన కథ, ఆకట్టుకునే భావోద్వేగాలకు పట్టం కడతారనే సంప్రదాయ సమీకరణాలను తిరగరాస్తూ.. రజినీకాంత్ మాస్ యాటిట్యూడ్, అనిరుధ్ నేపథ్య సంగీతం, మైండ్ బ్లాకింగ్ మల్టీస్టారర్ హంగులతో వచ్చిన తమిళ డబ్బింగ్ చిత్రం ‘జైలర్-2’ తెలుగునాట సరికొత్త రికార్డు వసూళ్లతో దూసుకుపోతోంది. మూడో రోజుకే ప్రపంచవ్యాప్తంగా రూ.317 కోట్ల గ్రాస్ దాటి ఈ చిత్రం బాక్సాఫీస్ వద్ద సంచలనం సృష్టిస్తోంది.

మరోవైపు, మంచి కథా బలం ఉన్నప్పటికీ తీవ్ర రక్తపాతం, సోషల్ మీడియా నెగిటివ్ ట్రోల్స్ కారణంగా విజయ్ దేవరకొండ, రష్మిక మందన్నల భారీ బడ్జెట్ సొంత తెలుగు చిత్రం ‘రణబాలి’ రేసులో వెనకబడింది. రెండు రోజుల్లో ప్రపంచవ్యాప్తంగా ఈ చిత్రం రూ.26.65 కోట్ల గ్రాస్ మాత్రమే రాబట్టగలిగింది.

కథ, ఎమోషన్ల పరంగా 'రణబాలి'కి విమర్శకుల నుంచి మంచి రివ్యూలే దక్కినప్పటికీ, థియేటర్లలో టికెట్ల అమ్మకాలకు వచ్చేసరికి పరిస్థితి పూర్తిగా తారుమారైంది. తొలి రోజు నుంచే ఆధిపత్యం ప్రదర్శించిన 'జైలర్-2' తెలుగు రాష్ట్రాల్లోనే సుమారు రూ.15 కోట్ల గ్రాస్ వసూళ్లను కొల్లగొట్టగా, పోటీగా విడుదలైన 'రణబాలి' తొలిరోజే రూ.10 కోట్ల మార్కును కూడా దాటలేకపోయింది. శనివారం నాటికి రెండు తెలుగు రాష్ట్రాల్లో 'రణబాలి' కేవలం రూ.7 కోట్ల గ్రాస్ నమోదు చేయగా, ప్రపంచవ్యాప్తంగా రెండు రోజుల ప్రదర్శన ముగిసేసరికి రూ.26.65 కోట్ల గ్రాస్‌ను మాత్రమే సాధించగలిగింది. ఆదివారం సాయంత్రం సమయంలో బుక్‌మైషోలో ‘జైలర్-2’ గంటకు 50 వేలకు పైగా టికెట్లు అమ్ముడుపోతుంటే, ‘రణబాలి’కి మాత్రం గంటకు కేవలం 8 వేల టికెట్లు మాత్రమే సెల్ అవ్వడం జైలర్-2 వన్-సైడెడ్ డామినేషన్‌ను స్పష్టం చేస్తోంది.