Singeetham Srinivasa Rao: సింగీతం శ్రీనివాసరావు మృతిపై జూ.ఎన్టీఆర్ భావోద్వేగ స్పందన

Singeetham Srinivasa Rao: ప్రముఖ దర్శకుడు సింగీతం శ్రీనివాసరావు మృతిపై టాలీవుడ్‌ స్టార్ హీరో జూనియర్ ఎన్టీఆర్ తీవ్ర విచారం వ్యక్తం చేశారు. ఈ మేరకు సోషల్ మీడియా ‘ఎక్స్’ వేదికగా ఆయన దర్శకుడికి నివాళులు అర్పించారు. సింగీతం శ్రీనివాసరావు ఇక లేరన్న వార్త ఎంతో బాధాకరంగా ఉందని పేర్కొంటూ.. ఆయన కుటుంబ సభ్యులకు ప్రగాఢ సానుభూతి తెలిపారు.

సింగీతం శ్రీనివాసరావు తనదైన ఆలోచనలతో కాలానికి ముందే సినిమాలను తెరకెక్కించిన దార్శనికుడని జూనియర్ ఎన్టీఆర్ కొనియాడారు. ‘ఆదిత్య 369’, ‘పుష్పక విమానం’, ‘మయూరి’ వంటి ఎన్నో అద్భుతమైన చిత్రాలను ఆయన అందించారని గుర్తుచేశారు. తరాలు మారినా ఆయన సినిమాలు కొత్తగా అనిపిస్తూనే ఉంటాయని పేర్కొన్నారు. ఆయన ఆత్మకు శాంతి చేకూరాలని కోరుకుంటూ.. కుటుంబ సభ్యులకు ప్రగాఢ సానుభూతి తెలిపారు.

సింగీతం శ్రీనివాసరావు చెన్నైలోని కావేరి ఆసుపత్రిలో వయోభారంతో కన్నుమూశారు. ఆయన వయసు 94 ఏళ్లు. చివరిగా నాగ్ అశ్విన్ నిర్మాణంలో రూపొందిన ‘సింగీతం’ చిత్రానికి దర్శకత్వం వహించారు. వయసు మీదపడినప్పటికీ సినిమాలపై ఆసక్తిని కొనసాగిస్తూ తన చివరి రోజుల్లోనూ సృజనాత్మకంగా పనిచేశారు.

సింగీతం శ్రీనివాసరావు తెలుగు చిత్ర పరిశ్రమతో పాటు కన్నడ, తమిళం, హిందీ, ఇంగ్లిష్ తదితర భాషల్లో 60కి పైగా చిత్రాలకు దర్శకత్వం వహించారు. ప్రయోగాత్మక కథలు, విభిన్నమైన స్క్రీన్‌ప్లేలు, కొత్త తరహా చిత్రీకరణతో దక్షిణ భారత సినిమాకు ఆయన విశిష్టమైన సేవలు అందించారు. ముఖ్యంగా ‘ఆదిత్య 369’, ‘పుష్పక విమానం’ వంటి చిత్రాలు ఆయన సృజనాత్మక ప్రతిభకు నిదర్శనంగా నిలిచాయి.