K V Mahadevan: కెవి మహదేవన్ గురించి ఒక్కమాటలో చెప్పాలంటే...
కె.వి. మహదేవన్ను సంగీత బ్రహ్మగా ఎందుకు పిలుస్తారు? సాహిత్యానికి ప్రాధాన్యమిచ్చిన ఆయన స్వర ప్రస్థానం, ‘సిరివెన్నెల’ వంటి పాటల వెనుక విశేషాలు తెలుసుకుందాం.
K V Mahadevan: తెలుగు చలనచిత్ర రంగాన పాటలోని భావానికి, రాగానికి సమపాళ్లలో పట్టాభిషేకం చేసిన సంగీత బ్రహ్మ 'స్వర బ్రహ్మ' కె. వి. మహదేవన్. ముందుగా బాణీ కట్టి దానికి తగినట్లుగా సాహిత్యం రాయించుకునే రోజుల్లో, కవి రాసిన అక్షరాల్లోని ఆర్ద్రతను ఆకళింపు చేసుకుని దానికి జీవం పోసిన మహోన్నత స్వరకర్త ఆయన. కవిత్వానికి స్వరాల హంగులు అద్ది, శ్రోతల మనసుల్లో నిలిచిపోయేలా చేయడంలో మహదేవన్ చూపించిన ప్రావీణ్యం అజరామరం. మహదేవన్ స్వర ప్రస్థానం, ఆయన బాణీల వెనుక ఉన్న ప్రతిభ, రికార్డుల విశేషాలు తెలుసుకుందాం.
సాహిత్రానికి మొదటి ప్రాధాన్యం
కె. వి. మహదేవన్ పాట కంపోజ్ చేసేటప్పుడు మొదటి ప్రాధాన్యత భావానికే ఇస్తారు. "సాహిత్యం తనకు సరిపోయే బాణీని తానే సమకూర్చుకుంటుంది" అనేది ఆయన నమ్మకం. ఆత్రేయ గారి అక్షరాలను పాటలుగా మలిచి ఆయన్ను 'మనసు కవి'గా నిలబెట్టడంలో మహదేవన్ పాత్ర అత్యంత కీలకమైనది. "ఏకంగా ఒక వార్తాపత్రిక ఇచ్చినా దానికి కూడా బాణీ కట్టేయగల సమర్థుడు" అని సినీ వర్గాలు ఆయనను ప్రశంసించేవి.
సిరివెన్నెల.. నలుగురు బ్రహ్మల అద్భుత సృష్టి
కళాతపస్వి కె. విశ్వనాథ్ దర్శకత్వంలో వచ్చిన 'సిరివెన్నెల' చిత్రంలోని "ప్రకృతి కాంతకు ఎన్నెన్ని హొయలో..." పాట ఆయన ప్రతిభకు నిలువెత్తు నిదర్శనం. సిరివెన్నెల సీతారామశాస్త్రి రాసిన తొలి భావాలకు అక్షర రూపం. పుహళేంది కవిలోని ఆర్ద్రతను గ్రహించి మహదేవన్కి అందించడం. కె. వి. మహదేవన్ రాగరూపం దిద్దడం. ఎస్. పి. బాలసుబ్రహ్మణ్యం తన గాత్రంతో ఈ పాటను శ్రోతలకు చేర్చడం. ఈ నలుగురు కలిసి సృష్టించిన అద్భుతమే ప్రకృతి కాంతకు పాట. కవి మనసులోని భావాలను అర్థం చేసుకొని, పదాలకు తగిన విధంగా బాణి కట్టడంలో నేర్పరి కెవి మహదేవన్. ఇక, ఈ పాటలో శ్రీ హరిప్రసాద్ చౌరాసియా వేణు నాదం, కొండలు-బండల గుండా ప్రవహించే సెలయేటి భావాన్ని స్వరపరిచిన తీరు అద్భుతం.
కవులకు లభించిన గుర్తింపు
'సిరిసిరిమువ్వ' చిత్రంతో వేటూరి గారిని, 'సిరివెన్నెల' చిత్రంతో సీతారామశాస్త్రి గారిని ప్రేక్షకులకు దగ్గర చేయడంలో మహదేవన్ గారి స్వరాలు ప్రధాన పాత్ర పోషించాయి. కళ్ళు మూసుకుని విన్నా దృశ్యాలు కళ్లముందు సాక్షాత్కరించేలా బాణీలు కట్టడం ఆయన ప్రత్యేకత. తెలుగు సినిమా రంగానికి ఎన్నో మధురమైన పాటలను అందించిన మహదేవన్ గారికి తగిన రీతిలో జాతీయ పురస్కారాలు లభించినా, ఆయనను కేంద్ర ప్రభుత్వం 'పద్మశ్రీ'తో గౌరవించకపోవడం సినీ ప్రియులకు నేటికీ ఒక వెలితిగానే మిగిలిపోయింది. ఏది ఏమైనా, ఆయన అందించిన సంగీత నిధి తెలుగు వారి గుండెల్లో ఎప్పటికీ చిరస్థాయిగా నిలిచిపోతుంది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.