Yash: హీరో యశ్‌పై కన్నడ హీరోయిన్ సంచలన వ్యాఖ్యలు!

Toxic movie: కన్నడ పరిశ్రమ నుంచి వచ్చి పాన్ ఇండియా స్థాయిలో సరికొత్త రికార్డులు సృష్టించిన రాకింగ్ స్టార్ యశ్, ప్రస్తుతం తన తాజా చిత్రం ‘టాక్సిక్’తో మరోసారి వార్తల్లో నిలిచారు. గీతూ మోహన్‌దాస్ దర్శకత్వంలో ఎంతో ప్రతిష్టాత్మకంగా తెరకెక్కుతున్న ఈ సినిమా మొదటి నుంచీ ఏదో ఒక వివాదంతో వార్తల్లో నిలుస్తూనే ఉంది. తాజాగా ఈ సినిమా చుట్టూ మరొక కొత్త వివాదం చెలరేగింది. ఈ చిత్రంలో కొన్ని అభ్యంతరకరమైన, మితిమీరిన ఇంటిమేట్ సీన్స్ ఉన్నాయనే వార్తలు బయటకు రావడంతో, కన్నడ నటి రిషికా సింగ్ తీవ్రస్థాయిలో మండిపడ్డారు.

సినిమాలోని కొన్ని సన్నివేశాలపై తీవ్ర అభ్యంతరం వ్యక్తం చేస్తూ నటి రిషికా సింగ్ ఒక వీడియో సందేశాన్ని విడుదల చేశారు. ఈ వీడియోలో ఆమె నేరుగా హీరో యశ్‌ను లక్ష్యంగా చేసుకుని చేసిన కామెంట్స్ ఇప్పుడు శాండల్‌వుడ్‌లో తీవ్ర దుమారం రేపుతున్నాయి. సమాజంలో కోట్లాది మందికి, ముఖ్యంగా యువతకు ఆదర్శంగా ఉండే యశ్.. అసలు ఇలాంటి అభ్యంతరకరమైన పాత్రను ఎలా అంగీకరించారు? అని రిషికా ప్రశ్నించారు. కన్నడ సంస్కృతి, మహిళల పట్ల హుందాగా మరియు గౌరవంతో వ్యవహరించాల్సిన బాధ్యత సినీ పరిశ్రమలో అందరిపై ఉందనే విషయాన్ని గుర్తుంచుకోవాలని చెప్పారు.

ఆగ్రహంతో ఊగిపోయిన ఆమె, యశ్ ప్రవర్తన నచ్చకపోతే కర్ణాటక విడిచిపెట్టి వెళ్లిపోవాలి అంటూ షాకింగ్ కామెంట్స్ చేశారు. రిషికా సింగ్ చేసిన ఈ వీడియో క్షణాల్లోనే సోషల్ మీడియాలో వైరల్‌గా మారింది. దీనిపై యశ్ అభిమానులు, నెటిజన్లు తీవ్రస్థాయిలో భగ్గుమంటున్నారు. కేవలం పబ్లిసిటీ కోసమే రిషికా సింగ్ యశ్‌పై అసత్య ప్రచారాలు, అనవసర విమర్శలు చేస్తున్నారు. సినిమా ఇంకా విడుదల కాకముందే ఇలాంటి చవకబారు కామెంట్స్ చేయడం సరికాదు అంటూ ఫ్యాన్స్ సోషల్ మీడియా వేదికగా ఆమెకు గట్టి కౌంటర్లు ఇస్తున్నారు.

వివాదాలు ఒకవైపు నడుస్తున్నప్పటికీ, ‘టాక్సిక్’ చిత్రంపై ఉన్న క్రేజ్ మాత్రం తగ్గడం లేదు. విభిన్నమైన కథాంశంతో రూపొందుతున్న ఈ గ్యాంగ్‌స్టర్ యాక్షన్ డ్రామాలో యశ్ లుక్ , క్యారెక్టరైజేషన్ వేరే లెవల్లో ఉండబోతున్నాయని టాక్. అయితే, రోజురోజుకూ ముదురుతున్న ఈ వివాదంపై హీరో యశ్ గానీ, చిత్ర యూనిట్ గానీ ఇప్పటివరకు ఎలాంటి అధికారిక వివరణ ఇవ్వలేదు. మరి ఈ సంచలన వ్యాఖ్యలపై యశ్ టీమ్ ఎలా స్పందిస్తుందో వేచి చూడాల్సిందే.