థియేటర్ల వివాదంపై స్పందించిన చిరంజీవి

తెలుగు చిత్ర పరిశ్రమలో తీవ్ర చర్చకు దారితీసిన సింగిల్ స్క్రీన్ థియేటర్ల ‘పర్సంటేజ్ సిస్టమ్’ వివాదంపై పరిశ్రమ పెద్ద, మెగాస్టార్ చిరంజీవి అత్యంత కీలకమైన దిశానిర్దేశం చేశారు. తన నివాసంలో ఎగ్జిబిటర్లు, నిర్మాతలతో సుదీర్ఘంగా సాగిన సమావేశంలో ఆయన ఇరు వర్గాల ఇబ్బందులను, భయాలను ఓపికగా విన్నారు. అనంతరం టాలీవుడ్‌లో ఉన్న వ్యవస్థలను గౌరవిస్తూ, అందరికీ ఆమోదయోగ్యమైన పరిష్కారం వైపు అడుగులు వేయాలని సూచించారు.

ఇది ఒక్క సినిమాకు సంబంధించిన సమస్య కాదు

సమావేశం అనంతరం ఇరు వర్గాలను ఉద్దేశించి చిరంజీవి ప్రసంగించారు. ఈ చర్చలు ఏదో ఒక రంగానికో లేదా ఒక నిర్దిష్టమైన పెద్ద సినిమాకో సంబంధించినవి కావని ఆయన స్పష్టం చేశారు. చిత్ర పరిశ్రమలోని ప్రతి భాగస్వామికి, అనగా నిర్మాత, డిస్ట్రిబ్యూటర్ , ఎగ్జిబిటర్.. ఈ ముగ్గురికీ పూర్తి న్యాయం జరిగేలా ఒక శాశ్వత పరిష్కారాన్ని కనుగొనడమే ఈ భేటీ ముఖ్య ఉద్దేశమని అన్నారు. ఇందుకోసం పరిశ్రమలో కొన్ని నిర్దిష్టమైన నియమ నిబంధనలు, వ్యవస్థలు ఉన్నాయని ఆయన గుర్తుచేశారు.

తెలుగు ఫిల్మ్ ఛాంబర్ నిర్ణయానికి కట్టుబడి ఉండాలి

తెలుగు చిత్ర పరిశ్రమకు అత్యున్నత పాలక సంస్థ ‘తెలుగు ఫిల్మ్ ఛాంబర్ ఆఫ్ కామర్స్’ (TFCC) మాత్రమేనని మెగాస్టార్ అందరికీ స్పష్టం చేశారు. ఛాంబర్ తీసుకునే ఏ నిర్ణయానికైనా ప్రతి ఒక్కరూ ఖచ్చితంగా కట్టుబడి ఉండాలని పిలుపునిచ్చారు.

“ఛాంబర్ ఇప్పటికే అన్ని పక్షాలతో సంప్రదింపులు జరిపి, ఈ పర్సంటేజ్ మోడల్‌పై ఒక స్పష్టమైన నిర్ణయం తీసుకోవడానికి నూతన కమిటీని ఏర్పాటు చేస్తోంది. ఈ ప్రక్రియ నడుస్తున్నప్పుడు ఎవరూ కూడా మీడియా ముందుకు వెళ్లి భిన్నమైన లేదా వ్యతిరేకమైన అభిప్రాయాలను పంచుకోవద్దు. అలా చేయడం వల్ల చిత్ర పరిశ్రమలో ఐక్యత లేదనే తప్పుడు సంకేతాలు సమాజంలోకి వెళ్తాయి” అని చిరంజీవి గట్టిగా హితవు పలికారు.

జూన్ 30 లోగా కొత్త కమిటీ తుది నివేదిక

గతంలో ఏర్పాటు చేసిన కొన్ని కమిటీల పనితీరు , వాటి ఫలితాల పట్ల సింగిల్ స్క్రీన్ ఎగ్జిబిటర్లలో కొంత అసంతృప్తి, అవిశ్వాసం ఉన్న మాట వాస్తవమేనని చిరంజీవి అంగీకరించారు. అయితే, ప్రస్తుత పరిస్థితుల్లో ఛాంబర్ కొత్తగా ఏర్పాటు చేయబోయే కమిటీపై నమ్మకం ఉంచాలని కోరారు. ఈ నూతన కమిటీ అన్ని కోణాలను క్షుణ్ణంగా పరిశీలించి, నిర్దేశిత గడువు అయిన జూన్ 30, 2026 లోగా తన తుది ప్రతిపాదనను సమర్పిస్తుందని ఆయన నమ్మకం వ్యక్తం చేశారు. నిర్మాతలు, ఎగ్జిబిటర్లు ఇద్దరికీ సమాన న్యాయం జరిగేలా ఈ నివేదిక ఉంటుందని చెప్పారు.

వ్యక్తిగత భరోసా ఇచ్చిన మెగాస్టార్

ఈ కమిటీ తన బాధ్యతలను సక్రమంగా నిర్వర్తించేలా , నిర్ణీత కాలపరిమితిలోనే నివేదికను సమర్పించేలా తాను వ్యక్తిగతంగా పర్యవేక్షిస్తానని చిరంజీవి హామీ ఇచ్చారు. తమ సమస్యలను, సింగిల్ స్క్రీన్ థియేటర్ల ప్రస్తుత దయనీయ స్థితిని అర్థం చేసుకుని, అందరికీ న్యాయం చేస్తానని మెగాస్టార్ భరోసా ఇవ్వడంతో ఎగ్జిబిటర్ల బృందం పూర్తి సంతృప్తిని వ్యక్తం చేసింది. ఈ సమావేశంలో జరిగిన చర్చలను, నిర్ణయాలను తమ అసోసియేషన్లలోని మిగిలిన సభ్యులకు వివరించి, 24 గంటల లోపు తమ అధికారిక ఆమోదాన్ని తెలియజేస్తామని వారు పేర్కొన్నారు.

ఈ అత్యంత ప్రాధాన్యత కలిగిన సమావేశంలో తెలుగు ఫిల్మ్ ఛాంబర్ ఆఫ్ కామర్స్ (TFCC) అధ్యక్షుడు డి. సురేష్ బాబు, ప్రముఖ నిర్మాతలు అల్లు అరవింద్, తెలంగాణ ఫిల్మ్ డెవలప్‌మెంట్ కార్పొరేషన్ (TFDC) ఛైర్మన్ దిల్ రాజు, కేఎల్ నారాయణ, సునీల్ నారంగ్, భరత్ నారంగ్ పాల్గొన్నారు. ఎగ్జిబిటర్ల తరపున తెలంగాణ ఫిల్మ్ ఛాంబర్ ప్రెసిడెంట్ జువ్వాడి శేఖర్, ప్రతినిధులు అనుపమ్ రెడ్డి, శ్రీధర్, సదానంద్ గౌడ్ , సుదర్శన్ థియేటర్ అధినేత రాజ్ తదితరులు హాజరయ్యారు. చిరంజీవి చొరవతో టాలీవుడ్‌లో నెలకొన్న ఈ పెద్ద వివాదానికి త్వరలోనే చెక్ పడనుందని ఇండస్ట్రీ వర్గాలు భావిస్తున్నాయి.