Ramayana: అల్లు అర్జున్ పుష్ప-2 రికార్డును బ్రేక్ చేయలేకపోయిన 'రామాయణం'

Ranbir Kapoor: భారతీయ సినీ చరిత్రలో మరో సువర్ణాధ్యాయం లిఖించబడింది. నితేష్ తివారీ దర్శకత్వంలో, రణబీర్ కపూర్ రాముడిగా, సాయి పల్లవి సీతగా నటించిన అత్యంత ప్రతిష్టాత్మక చిత్రం ‘రామాయణం’ బాక్సాఫీస్ వద్ద కలెక్షన్ల సునామీ సృష్టిస్తోంది. థియేటర్లలో విడుదలైన కేవలం ఎనిమిది రోజుల్లోనే ప్రపంచవ్యాప్తంగా వెయ్యి కోట్ల రూపాయల గ్రాస్ వసూళ్లను సాధించి చారిత్రాత్మక రికార్డును తన ఖాతాలో వేసుకుంది. వీకెండ్‌తో పాటు వీక్ డేస్‌లోనూ అదే జోరు కొనసాగిస్తూ, భారతీయ సినిమాల్లో అత్యంత వేగంగా వెయ్యి కోట్లు సాధించిన మూడో చిత్రంగా ‘రామాయణం’ రికార్డులకెక్కింది.

దీపావళి పండుగకు మూడు రోజుల ముందు, నవంబర్ 5న ప్రపంచవ్యాప్తంగా ప్రేక్షకుల ముందుకు వచ్చిన ఈ మైథలాజికల్ విజువల్ వండర్ మొదటి రోజు నుంచే తన సత్తా చాటింది. తొలి రోజే ప్రపంచవ్యాప్తంగా 128 కోట్ల రూపాయల వసూళ్లతో అదిరిపోయే ఓపెనింగ్స్ సాధించింది. సినిమాకు అన్ని వర్గాల నుంచి పాజిటివ్ రివ్యూలు రావడం, మౌత్ టాక్ బలంగా ఉండటంతో రోజురోజుకూ కలెక్షన్లు రెట్టింపయ్యాయి. కేవలం స్వదేశంలోనే కాకుండా, ఓవర్సీస్ మార్కెట్‌లోనూ ‘రామాయణం’ హవా కొనసాగుతోంది. వరుస సెలవులను పూర్తిస్థాయిలో సద్వినియోగం చేసుకున్న ఈ చిత్రం, రోజుకు కనీసం 150 కోట్ల రూపాయలకు పైగా వసూలు చేస్తూ ట్రేడ్ వర్గాలను సైతం ఆశ్చర్యపరిచింది.

ఏడో రోజైన బుధవారం నాటికి 935 కోట్ల రూపాయల మార్కును అందుకున్న ఈ చిత్రం, ఎనిమిదో రోజైన గురువారం నాడు సరికొత్త మైలురాయిని దాటింది. గురువారం రోజున భారతదేశంలో 29 కోట్ల రూపాయల అడ్వాన్స్ బుకింగ్స్, విదేశాల్లో సుమారు 1.5 మిలియన్ డాలర్ల వసూళ్లతో ఉదయమే 980 కోట్ల రూపాయల వద్ద నిలిచింది. ఆ తర్వాత స్పాట్ బుకింగ్‌ల జోరు తోడవడంతో గురువారం మధ్యాహ్నానికల్లా వెయ్యి కోట్ల రూపాయల మైలురాయిని అధిగమించిందని ట్రేడ్ నిపుణులు స్పష్టం చేశారు.

భారతీయ సినీ చరిత్రలో 2017 మే నెలలో ‘బాహుబలి: ది కంక్లూజన్’ తొలిసారిగా వెయ్యి కోట్ల క్లబ్‌ను ప్రారంభించగా, ఆ తర్వాత ‘దంగల్’ ఆ జాబితాలో చేరింది. ఇప్పుడు ‘రామాయణం’ ఈ ఘనత సాధించిన 11వ భారతీయ చిత్రంగా నిలిచింది. అయితే, అత్యంత వేగంగా ఈ మార్కును చేరుకున్న చిత్రాల జాబితాలో ‘రామాయణం’ మూడో స్థానంలో నిలవడం విశేషం. కేవలం 7 రోజుల్లోనే వెయ్యి కోట్లు సాధించిన ‘పుష్ప 2: ది రూల్’, ‘ధురందర్: ది రివెంజ్’ మొదటి రెండు స్థానాల్లో ఉండగా, 8 రోజుల్లో ఆ ఘనత సాధించిన ‘రామాయణం’ మూడో స్థానాన్ని కైవసం చేసుకుంది. ఈ క్రమంలో ‘బాహుబలి 2’ (10 రోజులు), ‘ఆర్ఆర్ఆర్’ (16 రోజులు), ‘కేజీఎఫ్ చాప్టర్ 2’ (18 రోజులు), ‘జవాన్’ (18 రోజులు), ‘పఠాన్’ (27 రోజులు) వంటి దిగ్గజ చిత్రాల రికార్డులను ‘రామాయణం’ అధిగమించి బాక్సాఫీస్ రారాజుగా నిలిచింది.