Ram Pothineni: రామ్ పోతినేని బర్త్‌డే సర్‌ప్రైజ్‌ మాములుగా లేదుగా...

Ram Pothineni: టాలీవుడ్ యువ కథానాయకుడు రామ్ పోతినేని తన పుట్టినరోజు సందర్భంగా అభిమానులకు అదిరిపోయే తీపి కబురు అందించారు. తన 23వ చిత్రంతో ఆయన దర్శకుడిగా వెండితెరకు పరిచయం కాబోతున్నారు. ‘రాపో 23’ పేరుతో తెరకెక్కనున్న ఈ చిత్రం ఒక సరికొత్త సైకోలాజికల్ యాక్షన్ థ్రిల్లర్ నేపథ్యంలో సాగనుంది. ఈ ప్రకటనతో చిత్ర పరిశ్రమ ఒక్కసారిగా ఆశ్చర్యానికి లోనవడమే కాకుండా, రామ్ అసాధారణ ప్రతిభపై ప్రశంసలు కురిపిస్తోంది.

కథానాయకుడి నుండి దర్శకుడిగా సరికొత్త ప్రయాణం

తెలుగు చలనచిత్ర పరిశ్రమలో ‘ఎనర్జిటిక్ స్టార్’గా గుర్తింపు తెచ్చుకున్న రామ్ పోతినేని, ఇటీవల ‘ఆంధ్ర కింగ్ తాలుకా’ చిత్రానికి పాటల రచయితగా , గాయకుడిగా మారి తనలోని మరో కోణాన్ని ఆవిష్కరించారు. ఇప్పుడు ఒక అడుగు ముందుకు వేసి, ఏకంగా మెగా ఫోన్ పట్టుకుని దర్శకత్వ బాధ్యతలు చేపట్టనుండటం విశేషం. తన పుట్టినరోజున ఈ ప్రతిష్టాత్మక ప్రాజెక్టును ప్రకటించి అందరినీ ఆశ్చర్యపరిచారు. తద్వారా దివంగత నందమూరి తారక రామారావు, సూపర్ స్టార్ కృష్ణ , పవన్ కళ్యాణ్ వంటి నటుల సరసన దర్శకులుగా మారిన తారల జాబితాలో రామ్ చేరిపోరు.

‘వీర’గా రామ్ రౌద్ర రూపం

ఈ సినిమా అధికారిక ప్రకటనతో పాటు విడుదల చేసిన పోస్టర్ ఇప్పుడు సామాజిక మాధ్యమాల్లో వైరల్ అవుతోంది. ఈ చిత్రంలో రామ్ ‘వీర’ అనే పాత్రలో కనిపించనున్నారు. పోస్టర్‌లో రామ్ తోలు జాకెట్ ధరించి, సరికొత్త కేశాలంకరణతో చాలా గంభీరంగా కనిపిస్తున్నారు. నేపథ్యంలోని ఎర్రటి ‘వీ’ అక్షరం తిరుగుబాటుకు మరియు ప్రమాదానికి సంకేతంగా కనిపిస్తోంది. నేరమయమైన నగర వాతావరణంలో ఒంటరిగా పోరాడే వ్యక్తిగా రామ్ లుక్ నూటికి నూరు శాతం ఆకట్టుకుంటోంది. ‘ఒంటరి తోడేలు కథ’ అనే నినాదం సినిమాలోని లోతును , కథానాయకుడి మానసిక స్థితిని ప్రతిబింబిస్తోంది.

సైకోలాజికల్ యాక్షన్ థ్రిల్లర్

తెలుగు తెరపై అరుదుగా వచ్చే సైకోలాజికల్ యాక్షన్ థ్రిల్లర్ నేపథ్యంలో ఈ చిత్రాన్ని రామ్ స్వయంగా రూపొందించారు. ఈ కథను ఆయనే రాసుకోవడం గమనార్హం. ‘వీర’ పాత్ర కోసం రామ్ శారీరకంగా కూడా భారీ మార్పులు చేసుకుంటున్నట్లు సమాచారం. గ్రిట్టీ అండ్ డార్క్ థీమ్‌తో ఉన్న ఈ పోస్టర్ చూస్తుంటే, ఇది ఒక సాధారణ మాస్ సినిమా కాదని, ప్రేక్షకులకు సరికొత్త అనుభూతిని ఇస్తుందని అర్థమవుతోంది. ఒంటరితనంతో ప్రభావితమైన ఒక వ్యక్తి ప్రయాణం ఈ చిత్రానికి వెన్నెముకగా నిలవనుంది.

జూన్ నుండి షూటింగ్.. డిసెంబర్‌లో విడుదల

కృష్ణ పోతినేని ఈ చిత్రాన్ని కొత్తగా స్థాపించిన ‘రాపో సినిమాటిక్స్’ పతాకంపై నిర్మిస్తున్నారు. ఈ భారీ బడ్జెట్ చిత్రానికి సంబంధించిన చిత్రీకరణ జూన్ నెల నుండి ప్రారంభం కానుంది. ఈ ఏడాది డిసెంబర్ నాటికి సినిమాను థియేటర్లలోకి తీసుకురావాలని చిత్ర యూనిట్ లక్ష్యంగా పెట్టుకుంది. మిగిలిన నటీనటులు , సాంకేతిక నిపుణుల వివరాలను త్వరలోనే వెల్లడించనున్నారు. రామ్ కెరీర్‌లోనే అత్యంత ప్రతిష్టాత్మకమైన ప్రాజెక్టుగా మారుతున్న ‘రాపో 23’పై అంచనాలు ఆకాశాన్ని తాకుతున్నాయి.