Ramayana: ఒకరోజు ముందే థియేటర్లలోకి రామాయణ! కారణం ఇదేనా.?

Ramayana: భారతీయ సినీ పరిశ్రమలో అత్యంత ప్రతిష్టాత్మకంగా తెరకెక్కుతున్న చిత్రాలలో రామాయణ ప్రాజెక్ట్ ఒకటిగా నిలుస్తోంది. ఈ చిత్రంలో బాలీవుడ్ స్టార్ హీరో రణ్‌బీర్ కపూర్ రాముడి పాత్రలో నటిస్తుండగా, ప్రముఖ నటుడు యశ్ అలాగే సాయి పల్లవి ఇతర ప్రధాన పాత్రలలో కనిపించనున్నారు.

నితీష్ తివారీ దర్శకత్వంలో రూపుదిద్దుకుంటున్న ఈ సినిమాపై ప్రపంచవ్యాప్తంగా విపరీతమైన అంచనాలు నెలకొన్నాయి. ఈ ప్రాజెక్ట్‌కి సంబంధించిన ప్రతీ అప్‌డేట్ సోషల్ మీడియాలో క్షణాల్లో వైరల్ అవుతుంటుంది. తాజాగా ఈ సినిమా విడుదల తేదీకి సంబంధించి ఒక ఆసక్తికరమైన సమాచారం బాలీవుడ్ వర్గాల నుంచి బయటికి వచ్చింది.

అందుతున్న తాజా సమాచారం ప్రకారం రామాయణ పార్ట్ 1 సినిమాను అనుకున్న తేదీ కంటే ఒకరోజు ముందే థియేటర్లలోకి తీసుకురావాలని మేకర్స్ నిర్ణయించారు. గతంలో ఈ చిత్రాన్ని నవంబర్ 6వ తేదీన విడుదల చేస్తామని చిత్ర యూనిట్ అధికారికంగా ప్రకటించింది.

అయితే తాజా సమీకరణాల ప్రకారం నవంబర్ 5వ తేదీనే ఈ సినిమా థియేటర్లలో విడుదల కానుందని బాలీవుడ్ వర్గాలు వెల్లడించాయి. కేవలం భారతదేశంలోనే కాకుండా విదేశాలలో కూడా ఇదే వర్తిస్తుందని సమాచారం.

అంతర్జాతీయ మార్కెట్‌ను దృష్టిలో ఉంచుకొని ఆస్ట్రేలియా, న్యూజిలాండ్, సౌత్ ఈస్ట్ ఆసియా, మిడిల్ ఈస్ట్ అలాగే జర్మనీలో కూడా నవంబర్ 5వ తేదీనే ప్రేక్షకుల ముందుకు ఈ చిత్రం రానుంది. ఓవర్సీస్ ప్రీమియర్ షోల కోసం ఈ మార్పు చేసినట్లు ట్రేడ్ వర్గాలు అభిప్రాయపడుతున్నాయి.

అధికారిక విడుదల తేదీకి ఒక్క రోజు ముందే ప్రీమియర్లు ప్రదర్శించడం ద్వారా కలెక్షన్లను మరింత పెంచుకోవచ్చని మేకర్స్ భావిస్తున్నారు. అలాగే సినిమా విడుదలకు ఒక రోజు ముందు అంటే నవంబర్ 4వ తేదీనే ప్రత్యేకంగా పెయిడ్ ప్రివ్యూలు ఉండనున్నాయని కూడా సమాచారం అందుతోంది.

భారీ బడ్జెట్‌తో అత్యాధునిక గ్రాఫిక్స్ సాంకేతికతతో ఈ చిత్రాన్ని తెరకెక్కిస్తున్నారు. రామాయణ ఇతిహాసాన్ని ఆధునిక హంగులతో తెరపై ఆవిష్కరిస్తుండటంతో అన్ని వర్గాల ప్రేక్షకులు ఈ చిత్రం కోసం ఎంతగానో ఎదురుచూస్తున్నారు. కాగా, బాక్సాఫీస్ వద్ద ఈ చిత్రం సృష్టించబోయే రికార్డులపై ఇండస్ట్రీలో చర్చ నడుస్తోంది.