Singeetam Srinivasa Rao: టైమ్ ట్రావెల్ కాన్సెప్ట్‌ను ప్రపంచానికి పరిచయం చేసిన దర్శకుడు!

Singeetam Srinivasa Rao passes away: భారతీయ చలనచిత్ర పరిశ్రమలో ప్రయోగం అనే పదానికి అసలైన అర్థం చెప్పిన దార్శనికుడు, లెజెండరీ దర్శకుడు సింగీతం శ్రీనివాసరావు (95) అనంత లోకాలకు పయనమయ్యారు. తెలుగు, తమిళ, కన్నడ సినీ చరిత్రలో ఏడు దశాబ్దాల పాటు తనదైన సృజనాత్మక ముద్ర వేసిన ఈ మేధావి నిష్క్రమణతో చిత్ర పరిశ్రమలో ఒక సువర్ణ శకం పరిసమాప్తమైంది.

సాంకేతిక పరిమితులు ఎంతో ఉన్న కాలంలోనే మాటల్లేని 'పుష్పక విమానం'తో విశ్వవ్యాప్త ప్రశంసలు అందుకుని, 'ఆదిత్య 369'తో తెలుగు తెరకు తొలిసారిగా టైమ్ ట్రావెల్ కాన్సెప్ట్‌ను పరిచయం చేసిన ఘనత ఆయనదే. దిగ్గజ దర్శకుడు కె.వి.రెడ్డి శిష్యుడిగా 'మాయాబజార్' కాలంనాటి సినిమా మెళకువలను ఔపోసన పట్టిన ఆయన, జీవితాంతం సినిమానే శ్వాసగా బతికారు.ఏ జోనర్‌కైనా ప్రాణం పోయగల అసాధారణ నేర్పు సింగీతం సొంతం.

మయూరి: ప్రమాదంలో కాలు పోగొట్టుకున్న నర్తకి సుధాచంద్రన్ నిజజీవితాన్ని స్ఫూర్తిదాయక దృశ్యకావ్యంగా మలిచారు.

ఆదిత్య 369 & భైరవద్వీపం: నందమూరి బాలకృష్ణతో ఆయన తెరకెక్కించిన 'ఆదిత్య 369' తెలుగు తొలి సైన్స్ ఫిక్షన్ చిత్రంగా నిలవగా, 'భైరవద్వీపం' జానపద చిత్రాల వైభవాన్ని అద్భుతంగా పునఃసృష్టి చేసింది.

హాస్యం & వైవిధ్యం: 'మేడమ్' చిత్రంలో రాజేంద్రప్రసాద్‌ను స్త్రీ వేషంలో చూపించినా, 'ఆడవాళ్లకు మాత్రమే' చిత్రంలో ఉద్యోగినుల వేదనను వినోదాత్మకంగా చెప్పినా ఆయన శైలి అపూర్వమే.

సింగీతం కెరీర్‌లో విశ్వనటుడు కమల్ హాసన్‌తో సాగించిన ప్రయాణం భారతీయ సినీ చరిత్రలో ఓ అద్భుత అధ్యాయం. చూపులేని వ్యక్తి భావోద్వేగాలను 'అమావాస్య చంద్రుడు'లో హృద్యంగా ఆవిష్కరించిన ఆయన, మూకీ చిత్రం 'పుష్పక విమానం'తో టాకీల యుగంలోనూ అఖండ విజయం సాధించారు. కమల్‌‌ను పొట్టివాడిగా మార్చి తెరకెక్కించిన 'విచిత్ర సోదరులు' అప్పట్లో టెక్నీషియన్లను సైతం విస్మయానికి గురిచేసింది. ఇక నలుగురు కమల్‌‌‌‌లతో తీసిన 'మైకేల్ మదన కామరాజు' నేటికీ వినోదానికి ఒక పాఠ్యపుస్తకంలా నిలుస్తుంది.

కేవలం దర్శకుడిగానే కాక, రెండు కన్నడ చిత్రాలకు సంగీతం అందించడంతో పాటు బుల్లితెర సీరియల్స్‌కూ బాణీలు కట్టారు. 'హాసం' పత్రికలో 'క' రాజు కథలు రాస్తూ రచయితగానూ అలరించారు. తొంభై పదుల వయసు దాటినా ఎప్పుడూ జీన్స్, టీ షర్టులు ధరిస్తూ యువతరం ఆలోచనలతో ఉత్సాహంగా సాగేవారు. తన 94 ఏళ్ల వయసులోనూ 'సింగ్ గీతం' అనే చిత్రాన్ని తెరకెక్కించి సినిమాపై తన ఉన్న తపనను చాటుకున్నారు.

సాంకేతిక వసతులు లేని రోజుల్లోనే తన మేధస్సుతో హాలీవుడ్ స్థాయి భావనలను తెరపై ఆవిష్కరించిన సింగీతం శ్రీనివాసరావు అస్తమయం సినీ ప్రపంచానికి పూడ్చలేని లోటు. తరాలు మారినా ఆయన అందించిన క్లాసిక్స్ ఎప్పటికీ కొత్త తరాల దర్శకులకు పాఠ్యపుస్తకాలే.