Renu Desai: పవన్ కల్యాణ్‌ మాజీ భార్యగానే చూస్తున్నారు.. రేణు దేశాయ్‌ సంచలన వ్యాఖ్యలు

Renu Desai: నటి, దర్శకురాలు రేణు దేశాయ్ చేసిన వ్యాఖ్యలు ప్రస్తుతం సోషల్ మీడియాలో మరియు టాలీవుడ్ వర్గాల్లో తీవ్రంగా చర్చనీయాంశమవుతున్నాయి. ఆంధ్రప్రదేశ్ ఉపముఖ్యమంత్రి పవన్ కల్యాణ్ నుంచి విడాకులు తీసుకుని 14 ఏళ్లు గడిచిపోయినప్పటికీ, ఇప్పటికీ సమాజం తనను ఆయన ‘మాజీ భార్య’గానే ముద్ర వేసి చూస్తోందే తప్ప, తనకంటూ ఓ స్వతంత్ర గుర్తింపు ఇవ్వడం లేదంటూ ఆమె తీవ్ర ఆవేదన వ్యక్తం చేశారు.

తన వ్యక్తిగత జీవితం, విడాకుల అనంతర ప్రయాణం మరియు సోషల్ మీడియాలో నిత్యం ఎదుర్కొంటున్న దారుణమైన ట్రోలింగ్‌పై ఒక ప్రత్యేక ఇంటర్వ్యూలో ఆమె స్పందిస్తూ సంచలన వ్యాఖ్యలు చేశారు. తెలుగు ప్రేక్షకులందరికీ ఒక ముఖ్యమైన విషయం స్పష్టం చేయాలని భావిస్తున్నట్లు రేణు దేశాయ్ పేర్కొన్నారు. 2000లో వచ్చిన ‘బద్రి’ సినిమాతోనే తన జీవితం మొదలైందని, అంతకుముందు తనకంటూ ఎలాంటి సొంత జీవితం లేదా కెరీర్ లేనట్లు చాలామంది భావిస్తున్నారని ఆవేదన చెందారు.

పవన్ కల్యాణ్ నుంచి తనకు విడాకులు మంజూరై ఇప్పటికే 14 ఏళ్లు గడిచిపోయాయని గుర్తు చేశారు. రామాయణంలో శ్రీరాముడు కూడా 14 ఏళ్ల వనవాసం పూర్తి చేసుకుని తిరిగొచ్చాడని, మరి సమాజం తనకు విధించిన ఈ అపవాదుల వనవాసం ఎప్పుడు ముగుస్తుందని ఆమె నిలదీశారు.

విడాకుల తర్వాత సాధించిన విజయాలను వివరిస్తూ.. 2012లో విడాకులు వచ్చిన తర్వాత తాను సొంతంగా ఒక మరాఠీ చిత్రాన్ని నిర్మించగా అది బాక్సాఫీస్ వద్ద సూపర్ హిట్‌గా నిలిచిందని తెలిపారు. ఆ తర్వాత మరో సినిమాకు కథను అందించి, స్వయంగా నిర్మాణం చేపట్టి దర్శకత్వం కూడా వహించానని వెల్లడించారు.

టెలివిజన్ రంగంలో డ్యాన్స్ షోలకు వర్క్ చేయడమే కాకుండా, కవితలు రాస్తూ, ప్రస్తుతం పలు సినిమాల్లో నటిస్తున్నట్లు చెప్పారు. తనకంటూ స్వతంత్ర ప్రతిభ, ప్రత్యేక గుర్తింపు లేకపోతే ఈ అవకాశాలన్నీ ఎలా వస్తాయని ప్రశ్నించారు. ఆఖరికి తాను ఒక మూగ జంతువును లేదా కుక్కను కాపాడినా సోషల్ మీడియాలో కొందరు తనను తిడుతున్నారని, ఆయన లేకపోతే తనకు జీవించే అర్హతే లేదన్నట్లు దారుణంగా మాట్లాడుతున్నారని వాపోయారు. ప్రస్తుతం రేణు దేశాయ్ చేసిన ఈ ఘాటు వ్యాఖ్యలు నెట్టింట విపరీతంగా వైరల్ అవుతున్నాయి.