Roman Holiday: సామాన్యుడితో యువరాణి ప్రయాణం...మల్లీశ్వరి గుర్తొస్తుందా?
రోమన్ హాలిడే, మల్లీశ్వరి కథల్లో ఉన్న పోలికలు ఏమిటి? యువరాణి–సామాన్యుడి ప్రయాణం, ప్రేమకథలోని కీలక తేడాలు ఏమిటో తెలుసుకుందాం.
Roman Holiday: హాలీవుడ్ సార్వకాలిక క్లాసిక్స్ లో 'రోమన్ హాలిడే' చిత్రానికి ప్రత్యేక స్థానం ఉంది. ప్రఖ్యాత నటులు గ్రెగొరీ పెక్, ఆడ్రీ హెప్బర్న్ జంటగా నటించిన ఈ ప్రేమకావ్యం ప్రపంచవ్యాప్తంగా కోట్ల మంది ప్రేక్షకులను అలరించింది. ఈ కథ ఆధారంగానే తెలుగులో వెంకటేష్, కత్రీనా కైఫ్ జంటగా నటించిన 'మల్లీశ్వరి' రూపొందిందనే ప్రచారం ఉంది. అయితే కథలోని ప్రధానమైన మలుపులను గమనిస్తే ఈ రెండు సినిమాల మధ్య స్పష్టమైన వ్యత్యాసాలు కనిపిస్తాయి.
యువరాణి స్వేచ్ఛా ప్రయాణం ... రిపోర్టర్ ఎత్తుగడ
ఒక యూరోపియన్ రాజ్యానికి చెందిన యువరాణి ఆడ్రీ హెప్బర్న్ అధికారిక పర్యటనలో భాగంగా రోమ్ నగరానికి వస్తుంది. రాజరికపు కట్టుబాట్లు, ప్రోటోకాల్స్ నచ్చక ఒక రాత్రి భద్రతా సిబ్బందికి తెలియకుండా బయటకు వచ్చేస్తుంది. అయితే, అలసిపోయి బెంచీపై నిద్రపోతున్న ఆవిడను ఒక సామాన్య రిపోర్టర్ గ్రెగొరీ పెక్ తన ఇంటికి తీసుకెళ్తాడు. మరుసటి రోజు ఆవిడ సాధారణ అమ్మాయి కాదని, ఒక రాజ్యానికి యువరాణి అని ఆ రిపోర్టర్కు పత్రికల్లో వచ్చిన వార్తల ద్వారా నిజం తెలుస్తుంది. ఆమెకు తెలియకుండా రహస్యంగా ఫోటోలు తీసి పత్రికలకు అమ్మి డబ్బు సంపాదించాలని తన ఫోటోగ్రాఫర్ మిత్రుడితో కలిసి ప్లాన్ చేస్తాడు.
24 గంటల అనుబంధం – బాధ్యత గెలిచిన వేళ
రోమ్ నగరంలో సామాన్యురాలిగా తిరుగుతూ ఆ యువరాణి హాయిగా గడుపుతుంది. ఆ ప్రయాణంలో స్కూటర్ డ్రైవింగ్, పోలీసుల నుంచి తప్పించుకోవడం వంటి సరదా సంఘటనల ద్వారా ఇద్దరి మధ్య ఒక మరుపురాని అనుబంధం ఏర్పడుతుంది. అయితే సాయంత్రానికి తన రాజరిక బాధ్యతలను గుర్తుతెచ్చుకున్న యువరాణి తిరిగి అంతఃపురానికి వెళ్ళిపోతుంది. ఆ మరుసటి రోజు జరిగిన విలేకరుల సమావేశంలో రిపోర్టర్, ఫోటోగ్రాఫర్ ఇద్దరూ హాజరవుతారు. డబ్బు సంపాదించాలనే ఆలోచనను పక్కనపెట్టి, తమ మధ్య ఉన్న స్వచ్ఛమైన బంధానికి గౌరవంగా వారు తీసిన రహస్య ఫోటోలను ఆమెకే తిరిగి ఇచ్చేస్తారు.
మల్లీశ్వరి సినిమాతో తేడాలు
త్రివిక్రమ్ శ్రీనివాస్ రాసిన 'మల్లీశ్వరి' కథకు ఈ చిత్రానికి కొన్ని ప్రధాన తేడాలు ఉన్నాయి. రోమన్ హాలిడే సినిమాలో కథానాయకుడికి ఆమె యువరాణి అనే నిజం మొదటి నుంచీ తెలుసు. కానీ 'మల్లీశ్వరి'లో నాయకుడికి ఆ విషయం చివరి ఘట్టంలో మాత్రమే తెలుస్తుంది. హాలీవుడ్ మూవీలో కథానాయకుడు మొదట డబ్బు కోసం ఆమెను ట్రాప్ చేయాలని చూస్తాడు, కానీ మల్లీశ్వరిలో కథానాయకుడు ఆమెను నిజాయితీగా ప్రేమిస్తాడు. ఏదేమైనా, ఒక ధనిక అమ్మాయి లేదా యువరాణి ఇల్లు వదిలి వచ్చి సామాన్యుడిని కలిసే కథాంశంతో ఏ సినిమా వచ్చినా అందులో 'రోమన్ హాలిడే' ఛాయలు కనిపించడం సహజం. రోమ్ నగర అందాలను అద్భుతంగా ఆవిష్కరించిన ఈ చిత్రం ఆడ్రీ హెప్బర్న్ను సినీ జగత్తులో ఒక రాత్రిలోనే ఐకాన్గా నిలబెట్టింది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.