300 కోట్ల క్లబ్‌లో సూర్య ‘కరుప్పు’.. సినిమాటోగ్రాఫర్‌కు లగ్జరీ గిఫ్ట్!

suriya: కోలీవుడ్ స్టార్ హీరో సూర్య, టాలెంటెడ్ డైరెక్టర్ ఆర్‌జే బాలాజీ కాంబినేషన్‌లో వచ్చిన మోస్ట్ ఎవైటెడ్ ఇంటెన్స్ డ్రామా ‘కరుప్పు’ బాక్సాఫీస్ వద్ద కాసుల వర్షం కురిపిస్తూ గ్లోబల్ బ్లాక్‌బస్టర్‌గా అవతరించింది. తెలుగులో ‘వీరభద్రుడు’ పేరుతో విడుదలైన ఈ చిత్రం సూర్య కెరీర్‌లోనే బిగ్గెస్ట్ కంబ్యాక్‌గా నిలిచింది. తాజాగా ఈ చిత్రం ప్రపంచవ్యాప్తంగా రికార్డు స్థాయిలో రూ. 300 కోట్ల గ్రాస్ వసూళ్లను సాధించి సరికొత్త రికార్డు సృష్టించింది.

తమిళనాడులోనే రూ. 200 కోట్ల క్లబ్.. సూర్య కెరీర్ మైల్‌స్టోన్

ఈ చిత్రం కేవలం తమిళనాడులోనే ఏకంగా రూ. 200 కోట్ల మార్కును దాటి ట్రేడ్ వర్గాలను సైతం ఆశ్చర్యపరిచింది. సూర్య మార్కెట్ స్టామినాను ఈ చిత్రం మరోస్థాయికి తీసుకెళ్లింది. కేవలం తమిళంలోనే కాకుండా, తెలుగు రాష్ట్రాల్లో ‘వీరభద్రుడు’ పేరుతో విడుదలైన ఈ వెర్షన్ మూడో వీకెండ్‌లోనూ సాలిడ్ కలెక్షన్లతో స్ట్రాంగ్ రన్ కొనసాగిస్తోంది. ఈ ఘనమైన విజయాన్ని సెలబ్రేట్ చేసుకునేందుకు సూర్య చిత్ర యూనిట్‌కు ప్రత్యేకమైన బహుమతులను అందిస్తూ తన కృతజ్ఞతను చాటుకుంటున్నారు.

సినిమాటోగ్రాఫర్‌కు రూ. 25 లక్షల ‘బ్యాట్‌మ్యాన్ ఎడిషన్’ కార్ గిఫ్ట్!

సినిమాను విజువల్‌గా అద్భుతంగా చూపించిన స్టార్ సినిమాటోగ్రాఫర్ జి.కె. విష్ణుకు హీరో సూర్య అదిరిపోయే సర్ప్రైజ్ ఇచ్చారు. ఆయనకు సరికొత్త మహీంద్రా BE 6 (Mahindra BE 6) ఎలక్ట్రిక్ ఎస్‌యూవీని బహుమతిగా అందించారు. ప్రత్యేకంగా మ్యాట్ బ్లాక్ షేడ్‌లో డిజైన్ చేసిన ఈ ‘బ్యాట్‌మ్యాన్ ఎడిషన్’ కారును అందుకున్న జి.కె. విష్ణు ఆనందాన్ని సోషల్ మీడియాలో పంచుకున్నారు.

సూర్య చూపించిన ఈ గొప్ప మనసుకు ధన్యవాదాలు తెలుపుతూ పెట్టిన పోస్ట్ నెట్టింట వైరల్‌గా మారింది. ఈ కారు ధర సుమారు రూ. 25 లక్షల వరకు ఉంటుందని అంచనా. సినిమాటోగ్రాఫర్‌కే ఈ రేంజ్ గిఫ్ట్ ఇస్తే.. ఇక డైరెక్టర్ ఆర్‌జే బాలాజీకి సూర్య ఎలాంటి గిఫ్ట్ ప్లాన్ చేస్తున్నారనేది ఇప్పుడు ఆసక్తికరంగా మారింది.

చార్ట్‌బస్టర్ మ్యూజిక్ అండ్ క్రేజీ కాస్టింగ్

డ్రీమ్ వారియర్ పిక్చర్స్ బ్యానర్‌పై అత్యంత ప్రతిష్టాత్మకంగా నిర్మించిన ఈ సినిమాలో సూర్య సరసన స్టార్ హీరోయిన్ త్రిష కృష్ణన్ నటించగా.. ఇంద్రన్స్, స్వాసిక కీలక పాత్రలు పోషించారు. ఈ చిత్రానికి సాయి అభ్యంకర్ అందించిన సాంగ్స్ , బ్యాక్‌గ్రౌండ్ స్కోర్ థియేటర్లలో నెక్స్ట్ లెవెల్ ఎక్స్‌పీరియన్స్‌ను ఇస్తున్నాయి. ఈ బ్లాక్‌బస్టర్ విజయంతో సూర్య అభిమానులు పండగ చేసుకుంటున్నారు.