Jana Nayagan: 'జన నాయగన్' ఫస్ట్ డే షోలో త్రిష సందడి..

Jana Nayagan: తమిళ అగ్రకథానాయకుడు, ప్రస్తుత ముఖ్యమంత్రి విజయ్ నటిస్తున్న ఆఖరి చిత్రం 'జన నాయగన్' థియేటర్లలో విడుదల కావడంతో కోలీవుడ్ అంతటా పండుగ వాతావరణం నెలకొంది. అభిమానులతో పాటు సినీ ప్రముఖులు పెద్ద ఎత్తున థియేటర్లకు తరలివచ్చి ఈ సినిమాను వీక్షిస్తూ విజయ్ కెరీర్‌కు ఘనమైన వీడ్కోలు పలుకుతున్నారు.

థియేటర్లలో ప్రముఖుల సందడి.. త్రిష నుంచి కీర్తి సురేష్ వరకు

విజయ్‌తో 'గిల్లి', 'లియో', 'గోట్' వంటి బ్లాక్‌బస్టర్ చిత్రాల్లో నటించిన స్టార్ హీరోయిన్ త్రిష, అభిమానులతో కోలాహలంగా ఉన్న రోహిణి థియేటర్స్‌ను సందర్శించి సినిమాను వీక్షించారు. అంతకుముందు ఆమె తల్లి ఉమా కృష్ణన్ కూడా అదే థియేటర్‌కు వచ్చారు. ఇక విజయ్ వీరాభిమాని అయిన కీర్తి సురేష్ తన భర్త ఆంటోని తట్టిల్‌తో కలిసి వెట్రి థియేటర్స్‌లో సినిమా చూశారు. అదే వేదికపై ఉన్న యంగ్ హీరోయిన్ మమిత బైజును కీర్తి సురేష్ అభినందించడం విశేషం. ఈ చిత్రంలో మమిత బైజు విజయ్ కూతురిగా కీలక పాత్ర పోషించారు. వీరితో పాటు ప్రముఖ సంగీత దర్శకుడు అనిరుధ్ కూడా థియేటర్‌కు వచ్చి సినిమాను ఆస్వాదించారు.

భారీ తారాగణంతో పొలిటికల్ అండ్ యాక్షన్ డ్రామా

వెంకట్ కె నారాయణ కేవీఎన్ ప్రొడక్షన్స్ పతాకంపై ఈ చిత్రాన్ని అత్యంత భారీ బడ్జెట్‌తో నిర్మించారు. విజయ్ సరసన పూజా హెగ్డే నటించగా, బాబీ డియోల్, గౌతమ్ వాసుదేవ్ మీనన్, ప్రకాష్ రాజ్, నరైన్, ప్రియమణి తదితరులు కీలక పాత్రలు పోషించారు. 2023లో టాలీవుడ్ నందమూరి బాలకృష్ణ నటించిన జాతీయ అవార్డు విజేత చిత్రం 'భగవంత్ కేసరి'కి ఇది రీమేక్‌గా తెరకెక్కింది. మాజీ పోలీసు అధికారిగా విజయ్ నటన, తన స్నేహితుడి కూతురిని ఆర్మీ ఆఫీసర్‌గా తీర్చిదిద్దే భావోద్వేగ సన్నివేశాలు ప్రేక్షకులను ఆకట్టుకుంటున్నాయి. ముఖ్యమంత్రి పీఠం అధిష్టించిన తర్వాత విజయ్ నుంచి వస్తున్న తొలి సినిమా కావడంతో ఈ చిత్రంపై అంచనాలు తారాస్థాయిలో ఉన్నాయి.