విశ్వంభర పార్ట్-2 వస్తుందా? క్లారిటీ ఇచ్చిన వశిష్ట!

మెగాస్టార్ చిరంజీవి నటిస్తున్న అత్యంత ప్రతిష్టాత్మక చిత్రం 'విశ్వంభర'పై సామాజిక మాధ్యమాల్లో రకరకాల వార్తలు చక్కర్లు కొడుతున్నాయి. వశిష్ట దర్శకత్వంలో యూవీ క్రియేషన్స్ నిర్మిస్తున్న ఈ సోషియో ఫాంటసీ మూవీ గురించి తాజాగా ఒక ఆసక్తికర ప్రచారం తెరపైకి వచ్చింది. ఈ సినిమాను రెండు భాగాలుగా విడుదల చేయనున్నారని జరుగుతున్న ప్రచారానికి దర్శకుడు తనదైన శైలిలో ఫుల్‌స్టాప్ పెట్టారు.

రెండు భాగాలుగా మెగా మూవీ?

ఇటీవల కాలంలో భారీ చిత్రాలను రెండు భాగాలుగా విడుదల చేయడం టాలీవుడ్‌లో ఒక ట్రెండ్‌గా మారింది. ఇదే క్రమంలో 'విశ్వంభర' కూడా రెండు భాగాలుగా రానుందని సోషల్ మీడియాలో పెద్ద ఎత్తున చర్చ జరిగింది. అయితే, సోషల్ మీడియా లో వైరల్ అవడంతో దర్శకుడు వశిష్ట స్పందిస్తూ.. “అవునా.. నిజమా?” అని వ్యంగ్యంగా బదులిచ్చారు. దీనితో ఈ చిత్రానికి సీక్వెల్ ప్లాన్స్ ఏవీ లేవని, ఇది ఒకే భాగంగా వస్తుందని స్పష్టమైంది.

విడుదల ఆలస్యానికి గల ప్రధాన కారణాలు

వాస్తవానికి ఈ సినిమా 2025 జనవరిలోనే విడుదల కావాల్సి ఉంది. కానీ, వీఎఫ్ఎక్స్ (VFX) పనుల కారణంగా సినిమా ఆలస్యమవుతూ వస్తోంది. సినిమాలో సుమారు 4,800కు పైగా గ్రాఫిక్ షాట్స్ ఉన్నాయని, నాణ్యత విషయంలో ఎక్కడా రాజీ పడకూడదనే ఉద్దేశంతో మేకర్స్ పని చేస్తున్నారని సమాచారం. తాజా నివేదికల ప్రకారం, ఈ భారీ చిత్రాన్ని జూలై 10, 2026న ప్రపంచవ్యాప్తంగా విడుదల చేసేందుకు సన్నాహాలు చేస్తున్నారు.

తారాగణం , సాంకేతిక నిపుణులు

మెగాస్టార్‌కు జోడీగా సీనియర్ నటి త్రిష నటిస్తుండగా, విలన్ పాత్రలో కునాల్ కపూర్ కనిపించనున్నారు. ఆషికా రంగనాథ్, రమ్య పసుపులేటి, ఈషా చావ్లా, ఆశ్రిత వేముగంటి వంటి నటీమణులు కీలక పాత్రలు పోషిస్తున్నారు. ఆస్కార్ విజేత ఎం.ఎం. కీరవాణి సంగీతం అందిస్తుండటం ఈ సినిమాపై అంచనాలను మరింత పెంచుతోంది. 'మన శంకర వరప్రసాద్ గారు' వంటి బ్లాక్‌బస్టర్ తర్వాత చిరంజీవి నటిస్తున్న సినిమా కావడంతో మెగా అభిమానులు ఈ సోషియో ఫాంటసీ విజువల్ వండర్ కోసం వేయి కళ్లతో ఎదురుచూస్తున్నారు.