Yash Toxic Trailer : యశ్ ఫ్యాన్స్‌కు ట్రీట్.. ‘టాక్సిక్’ ట్రైలర్ నేడే.!

Yash Toxic Trailer : కన్నడ రాకింగ్ స్టార్ యశ్ కథానాయకుడిగా నటిస్తున్న ప్రతిష్టాత్మక చిత్రం ‘టాక్సిక్’. ఈ సినిమాకు సంబంధించిన బిగ్ అప్‌డేట్ కోసం అభిమానులు ఎప్పటి నుంచో వెయ్యి కళ్లతో ఎదురుచూస్తున్నారు. ఎట్టకేలకు అభిమానుల నిరీక్షణకు తెరదించుతూ మేకర్స్ ట్రైలర్ విడుదలకు సమయం ఖరారు చేశారు. ఈ రోజు సాయంత్రం 7:01 గంటలకు ‘టాక్సిక్’ అధికారిక ట్రైలర్‌ను విడుదల చేయనున్నట్లు చిత్ర యూనిట్ అధికారికంగా ప్రకటించింది. ఈ వార్తతో యశ్ అభిమానుల్లో ఆనందోత్సాహాలు వెల్లివిరిసాయి.

భారీ తారాగణం.. సరికొత్త లుక్‌లో యశ్

గీతూ మోహన్‌దాస్ దర్శకత్వంలో తెరకెక్కుతున్న ఈ యాక్షన్ ఎంటర్‌టైనర్‌లో యశ్‌కు జోడీగా, కీలక పాత్రల్లో నయనతార, కియారా అద్వానీ, తారా సుతారియా, రుక్మిణి వసంత్ వంటి స్టార్ కథానాయికలు నటిస్తున్నారు. ఇప్పటికే విడుదలైన ఫస్ట్ లుక్ పోస్టర్లు, గ్లింప్స్ ప్రేక్షకులను విశేషంగా ఆకట్టుకుని సినిమాపై అంచనాలను భారీగా పెంచేశాయి. ముఖ్యంగా మాస్ హీరో యశ్‌ను మునుపెన్నడూ చూడని సరికొత్త గెటప్, విభిన్నమైన పాత్రలో చూడబోతుండటం అభిమానుల్లో తీవ్ర ఆసక్తిని రేకెత్తిస్తోంది.

సోషల్ మీడియాలో ట్రెండింగ్.. కౌంట్‌డౌన్ స్టార్ట్

ట్రైలర్ విడుదల సమయం దగ్గరపడుతుండటంతో సోషల్ మీడియా వేదికగా #ToxicTrailer హ్యాష్‌ట్యాగ్ మారుమోగిపోతోంది. ఈ సినిమాలో యశ్ క్యారెక్టరైజేషన్ ఎలా ఉండబోతోంది? కథా నేపథ్యం ఏంటి? నయనతార, కియారా అద్వానీతో సహా ఇతర కథానాయికల పాత్రలకు ఎలాంటి ప్రాధాన్యత ఉండనుంది? అనే విషయాలపై నెటిజన్లలో విపరీతమైన చర్చ నడుస్తోంది. సాయంత్రం 7:01 గంటలకు రాబోయే ట్రైలర్ తర్వాత ఈ చిత్రంపై ఉన్న అంచనాలు నెక్ట్స్ లెవెల్‌కు చేరుకుంటాయని సినీ విశ్లేషకులు భావిస్తున్నారు.

ఆగస్టు 26న ప్రపంచవ్యాప్తంగా విడుదల

వెంకట్ కేవీఎన్ ప్రొడక్షన్స్ బ్యానర్‌పై కె. నారాయణతో కలిసి హీరో యశ్‌కు చెందిన 'మాన్స్టర్ మైండ్ క్రియేషన్స్' ఈ చిత్రాన్ని అత్యంత భారీ బడ్జెట్‌తో, అగ్రశ్రేణి సాంకేతిక విలువల తో నిర్మిస్తోంది. పాన్ ఇండియా స్థాయిని మించి పాన్ వరల్డ్ స్థాయిలో రూపుదిద్దుకుంటున్న ఈ చిత్రంపై ఇప్పటికే దేశవ్యాప్తంగా భారీ అంచనాలు నెలకొన్నాయి. ఆగస్టు 26న ప్రేక్షకుల ముందుకు రానున్న ‘టాక్సిక్’ బాక్సాఫీస్ వద్ద ఎలాంటి సంచలనాలు సృష్టిస్తుందో చూడాలి.