Thungathurthy: సీఈసీని తొలగించాలి, ఎస్ఐఆర్ ప్రక్రియ నిలిపివేయాలి!

Thungathurthy: సూర్యాపేట జిల్లా తుంగతుర్తి నియోజకవర్గం కేంద్ర ఎన్నికల ప్రధాన కమిషనర్ (CEC) జ్ఞానేశ్ కుమార్‌ను తక్షణమే పదవి నుంచి తొలగించాలని, ప్రత్యేక సమగ్ర ఓటర్ల సవరణ (SIR) ప్రక్రియను వెంటనే నిలిపివేయాలని సీపీఎం జిల్లా కార్యదర్శివర్గ సభ్యులు కోట గోపి డిమాండ్ చేశారు. శుక్రవారం మద్దిరాల మండల కేంద్రంలో నిర్వహించిన విలేకరుల సమావేశంలో ఆయన మాట్లాడారు.

ఎన్నికల కమిషన్‌లోని సభ్యుల అభిప్రాయాలను పరిగణనలోకి తీసుకోకుండా ఏకపక్ష నిర్ణయాలు తీసుకుంటున్నారని కోట గోపి ఆరోపించారు. మెజారిటీ అభిప్రాయానికి విలువ ఇవ్వకుండా SIR ప్రక్రియను అమలు చేయడం వల్ల దేశవ్యాప్తంగా కోట్లాది మంది పౌరుల ఓటు హక్కుపై ప్రభావం పడే ప్రమాదం ఉందని పేర్కొన్నారు.

ఎన్నికల వ్యవస్థను కేంద్ర ప్రభుత్వం తమ ఆధీనంలోకి తీసుకునే ప్రయత్నం చేస్తోందని ఆయన ఆరోపించారు. రాజ్యాంగబద్ధ సంస్థల స్వతంత్రతను కాపాడాల్సిన అవసరం ఉందన్నారు. గతంలో ఎన్నికల కమిషన్ నియామక ప్రక్రియలో ఉన్న విధానానికి భిన్నంగా ప్రస్తుతం వ్యవహరిస్తున్నారని విమర్శించారు.

బీహార్, పశ్చిమ బెంగాల్‌లో ఓటర్ల జాబితాల నుంచి అర్హులైన ప్రజల పేర్లు తొలగించారంటూ ప్రతిపక్షాలు ఆందోళన చేసినప్పటికీ పట్టించుకోలేదని ఆరోపించారు. అన్యాయంగా ఓటర్ల జాబితా నుంచి తొలగించబడిన అర్హులైన ప్రతి ఒక్కరి పేరును తిరిగి చేర్చే వరకు పోరాటం కొనసాగిస్తామని తెలిపారు.

ప్రజాస్వామ్యం, రాజ్యాంగం, లౌకికవాదాన్ని పరిరక్షించేందుకు బీజేపీయేతర రాజకీయ పక్షాలతో పాటు ప్రజాస్వామికవాదులు, మేధావులు ఐక్యంగా ఉద్యమించాలని కోట గోపి పిలుపునిచ్చారు. ఎన్నికల వ్యవస్థలో పారదర్శకత, స్వతంత్రతను కాపాడేందుకు పాత విధానాన్ని పునరుద్ధరించాలని, SIR ప్రక్రియను తక్షణమే నిలిపివేయాలని డిమాండ్ చేశారు.

ఈ సమావేశంలో సీపీఎం జిల్లా కమిటీ సభ్యులు కందాల శంకర్‌రెడ్డి, సీపీఎం మండల కార్యదర్శి పోలోజు సైదులు, నవతెలంగాణ ఇన్‌చార్జి మండల్‌రెడ్డి వెంకట్‌రెడ్డి తదితరులు పాల్గొన్నారు.