Nalgonda: కరెంట్ కోతలపై విరుచుకుపడ్డ రైతన్న.. సబ్‌స్టేషన్ వద్ద నిరసన!

Nalgonda: నిరంతర విద్యుత్‌ కోతలతో సాగు నీరందక పంటలు ఎండిపోతున్నాయంటూ నల్లగొండ జిల్లా తిప్పర్తి మండలం ఇండ్లూర్ సబ్‌స్టేషన్‌ ఎదుట రైతులు తీవ్ర నిరసన తెలిపారు. తిప్పర్తి-నకిరేకల్‌ ప్రధాన రహదారిపై వాహనాలను అడ్డంగా నిలిపి రాస్తారోకో చేపట్టారు. దీంతో ఇరువైపులా భారీగా వాహనాలు నిలిచిపోయి ప్రయాణికులు తీవ్ర ఇబ్బందులు పడ్డారు.

​గోడల లాంటి వరినార్లు ఎండిపోతుంటే అధికారులు కనీసం స్పందించడం లేదని, ఫోన్లు చేసినా ఎత్తడం లేదని ఆగ్రహం వ్యక్తం చేశారు. ప్రజాప్రతినిధులు వెంటనే జోక్యం చేసుకుని క్రమం తప్పకుండా విద్యుత్‌ సరఫరా అయ్యేలా చూడాలని, ఈ విషయంలో స్థానిక మంత్రి కోమటిరెడ్డి వెంకటరెడ్డి ప్రత్యేక చొరవ చూపాలని బాధితులు డిమాండ్‌ చేశారు.