Nalgonda: పెద్దవూరలో లక్షలు వెచ్చించిన మహిళా శిక్షణ కేంద్రం నిరుపయోగం!

Nalgonda: లక్షలు వెచ్చించి నిర్మించిన ఆ భవనం నేడు నిరుపయోగంగా మారింది. మహిళలకు ఉపాధి మార్గాలు చూపి, వారికి ఆర్థిక సమృద్ధి అందించాల్సిన కేంద్రం అధికారుల పర్యవేక్షణ లేక శిథిలావస్థకు చేరింది.

​నల్లగొండ జిల్లా పెద్దవూర మండల కేంద్రంలో 2007లో రూ.లక్షల ప్రజాధనంతో సమాఖ్య మహిళా శిక్షణ కేంద్రాన్ని (CLRC) ప్రారంభించారు. స్వయం సహాయక సంఘాల మహిళలకు వివిధ రంగాల్లో శిక్షణ ఇచ్చి, వారిని ఆర్థికంగా నిలబెట్టడమే ఈ కేంద్రం ప్రధాన లక్ష్యం. అయితే ప్రారంభించిన కొద్ది కాలానికే అధికారులు దీని నిర్వహణను గాలికి వదిలేశారు.

​ప్రస్తుతం ఈ భవనానికి తాళం పడి ఉండటంతో పరిసరాలు చెట్లు, పొదలతో అడవిని తలపిస్తున్నాయి. భవనం గోడలకు పగుళ్లు వచ్చి ఏ క్షణాన కూలుతుందో తెలియని స్థితికి చేరింది. ప్రజాధనం ఇలా వృథాగా మారుతున్నా సంబంధిత శాఖ అధికారులు పట్టించుకోకపోవడంపై స్థానికులు తీవ్ర ఆగ్రహం వ్యక్తం చేస్తున్నారు.

​శిథిలావస్థకు చేరిన ఈ CLRC భవనానికి వెంటనే మరమ్మతులు చేపట్టి, మహిళా సంఘాలకు పునరుద్ధరించిన సేవలు అందుబాటులోకి తీసుకురావాలని గ్రామీణులు, స్థానిక మహిళలు డిమాండ్ చేస్తున్నారు.