Watermelon: పుచ్చకాయ తిని బాలుడు మృతి, మరో ముగ్గురి పరిస్థితి విషమం!

Watermelon: ఛత్తీస్‌గఢ్‌లోని జాన్జ్‌గీర్-చంపా జిల్లాలో ఘోర విషాదం చోటుచేసుకుంది. వేసవి తాపం నుండి ఉపశమనం కోసం పుచ్చకాయ తిన్న నలుగురు చిన్నారులు తీవ్ర అనారోగ్యానికి గురయ్యారు. దురదృష్టవశాత్తూ, వీరిలో 15 ఏళ్ల బాలుడు ప్రాణాలు కోల్పోగా, మరో ముగ్గురు చిన్నారులు ప్రస్తుతం ఆసుపత్రిలో మృత్యువుతో పోరాడుతున్నారు. ఈ ఘటన స్థానికంగా తీవ్ర కలకలం రేపింది.

బంధువుల ఇంటికి వెళ్లిన వేళ విషాదం

జాన్జ్‌గీర్-చంపా జిల్లాలోని ఘుర్కోట్ గ్రామంలో ఈ విషాదకర సంఘటన జరిగింది. మృతుడు అఖిలేష్ ధివర్ (15), తన బంధువులతో కలిసి మేనమామ ఇంటికి వెళ్ళాడు. అక్కడ బంధువుల పిల్లలు శ్రీ ధివర్ (4), పింటూ ధివర్ (12), హితేష్ ధివర్ (13) కూడా ఉన్నారు. సరదాగా గడపాల్సిన సమయంలో వారు తీసుకున్న ఆహారం ప్రాణాంతకంగా మారుతుందని ఎవరూ ఊహించలేదు.

అనారోగ్య లక్షణాలు

జిల్లా ఆసుపత్రి సివిల్ సర్జన్ డాక్టర్ ఎస్. కుజూర్ తెలిపిన వివరాల ప్రకారం, ఆదివారం సాయంత్రం ఇంట్లో కోసి ఉంచిన పుచ్చకాయను ఈ నలుగురు పిల్లలు తిన్నారు. తిన్న కొన్ని గంటలకే అఖిలేష్‌కు వాంతులు, విరేచనాలు ప్రారంభమయ్యాయి. సోమవారం తెల్లవారుజామున అతడికి శ్వాస తీసుకోవడంలో ఇబ్బంది కలగడంతో పరిస్థితి విషమించింది. మిగిలిన ముగ్గురు పిల్లల్లో కూడా ఇవే లక్షణాలు కనిపించడంతో కుటుంబ సభ్యులు ఆందోళనకు గురయ్యారు.

వెంటనే వారిని అంబులెన్స్‌లో జిల్లా ఆసుపత్రికి తరలించారు. అయితే, ఆసుపత్రికి చేరుకునే లోపే అఖిలేష్ మరణించినట్లు వైద్యులు ధృవీకరించారు. మిగిలిన ముగ్గురు చిన్నారులను అత్యవసర విభాగంలో చేర్చి చికిత్స అందిస్తున్నారు.

కలుషిత ఆహారమే కారణమా?

ప్రాథమిక విచారణలో విస్తుపోయే విషయాలు వెలుగులోకి వచ్చాయి. ఆదివారం ఉదయం కోసిన పుచ్చకాయను సాయంత్రం వరకు అలాగే ఉంచి, ఆ తర్వాత పిల్లలకు ఇచ్చారు. చాలారోజులు నిల్వ ఉండటం లేదా నిల్వ ఉంచిన పద్ధతి సరిగ్గా లేకపోవడం వల్ల అది విషపూరితంగా మారి ఉండవచ్చని వైద్యులు అనుమానిస్తున్నారు. ఇది 'ఫుడ్ పాయిజనింగ్' (ఆహారం విషతుల్యం కావడం) వల్ల జరిగిన మరణంగా ప్రాథమికంగా నిర్ధారించారు.

విచారణ వేగవంతం చేసిన అధికారులు

మృతికి గల ఖచ్చితమైన కారణాలను తెలుసుకోవడానికి పోలీసులు మృతదేహాన్ని శవపరీక్షకు పంపారు. అంతర్గత అవయవాల నమూనాలను సేకరించి ఫోరెన్సిక్ పరీక్షల కోసం భద్రపరిచారు. అలాగే, అదే ఇంట్లో ఉన్న మరో పుచ్చకాయను ఆహార భద్రతా విభాగానికి పంపి ప్రయోగశాలలో పరీక్షలు నిర్వహిస్తున్నారు. నివేదికలు వచ్చిన తర్వాతే ఈ మరణానికి గల అసలు కారణం స్పష్టమవుతుందని అధికారులు వెల్లడించారు. వేసవిలో పండ్లు, ఆహార పదార్థాల విషయంలో ప్రజలు అప్రమత్తంగా ఉండాలని వైద్యులు సూచిస్తున్నారు.