Aadhaar Card: ఆధార్ కార్డులో పేరు మార్చుకోవాలా.? మారిన రూల్స్‌, ఇక‌పై..

Aadhaar Card: ఆధార్ కార్డులో పేరు తప్పుగా ఉందా? స్పెల్లింగ్ మార్చుకోవాలన్నా, పెళ్లి తర్వాత ఇంటిపేరు మార్చుకోవాలన్నా లేదా పూర్తి పేరును మార్చుకోవాలన్నా కొన్ని నిబంధనలు పాటించాలి. ఆధార్ కార్డులో పేరు సవరణకు సంబంధించి యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) కొత్త ప్రామాణిక విధానాన్ని (SOP) తీసుకొచ్చింది.

చిన్న తప్పుల సవరణకు ఏ పత్రాలు కావాలి?

ఆధార్ కార్డులో పేరులో చిన్న చిన్న తప్పులు ఉంటే వాటిని సరిచేసుకోవచ్చు. ఉదాహరణకు పేరులో అక్షర దోషాలు, స్పెల్లింగ్ తప్పులు ఉంటే సరిచేయడం, మధ్య పేరును లేదా ఇంటిపేరును చేర్చడం, తొలగించడం వంటివి ఈ విభాగంలోకి వస్తాయి. పేరులోని పదాల క్రమాన్ని మార్చడం, పేరులోని మొదటి అక్షరాలను పూర్తిగా రాయడం లేదా అవసరం లేని చుక్కలను తొలగించడం కూడా చిన్న మార్పుల కిందకు వస్తాయి. ఉదాహరణకు 'R.P. Singh' అనే పేరును 'RP Singh'గా మార్చడం, 'RaMesh' అనే పేరును 'Ramesh'గా సరిచేయడం వంటివి చేయవచ్చు. ఇలాంటి మార్పుల కోసం ఆధార్ సేవా కేంద్రానికి వెళ్లి చెల్లుబాటు అయ్యే గుర్తింపు పత్రాన్ని (PoI) సమర్పించాలి. అయితే పేరు మార్పు స్వభావాన్ని బట్టి అదనపు పత్రాలు అడిగే అవకాశం ఉంటుంది.

పెళ్లి తర్వాత ఇంటిపేరు మార్పు.. విడాకుల తర్వాత ఏం చేయాలి?

పెళ్లి తర్వాత ఇంటిపేరు మార్చుకోవాలన్నా, విడాకుల తర్వాత పెళ్లికి ముందు ఉన్న పేరును తిరిగి పెట్టుకోవాలన్నా సంబంధిత పత్రాలు సమర్పించాలి. ఈ సందర్భాల్లో గుర్తింపు పత్రంతో పాటు అనెక్సర్ D (Annexure D) అనే అఫిడవిట్‌ను కూడా ఇవ్వాల్సి ఉంటుందని పేర్కొంటున్నారు. పేరు మార్పు వైవాహిక స్థితి కారణంగా జరుగుతోందని ధ్రువీకరించడానికి ఈ పత్రం ఉపయోగపడుతుంది. అలాగే లింగ మార్పు తర్వాత పేరు మార్చుకోవడం, పుట్టినప్పుడు ఆధార్ రికార్డులో ఉన్న 'Baby of...' అనే వివరాల స్థానంలో శిశువు అసలు పేరును నమోదు చేయడం వంటి సందర్భాలకు కూడా ప్రత్యేక నిబంధనలు ఉంటాయి. దరఖాస్తు చేసుకునే ముందు మీకు వర్తించే పత్రాల వివరాలను ఆధార్ కేంద్రంలో నిర్ధారించుకోవడం మంచిది.

ఆధార్ కేంద్రం తప్పు చేస్తే ఏం చేయాలి?

ఆధార్ నమోదు లేదా వివరాల సవరణ సమయంలో సరైన పత్రాలు ఇచ్చినా, సిబ్బంది పొరపాటు వల్ల పేరు తప్పుగా నమోదైతే దాన్ని డేటా ఎంట్రీ తప్పుగా పరిగణిస్తారు. ఇలాంటి సందర్భాల్లో పెద్దవారు గుర్తింపు పత్రం (PoI) లేదా సంబంధ ధ్రువీకరణ పత్రం (PoR)తో పాటు అనెక్సర్ B (Annexure B) అఫిడవిట్ సమర్పించాల్సి ఉంటుంది. మైనర్ల విషయంలో అనెక్సర్ C (Annexure C) అఫిడవిట్ అవసరం కావచ్చు. పేరు ఆంగ్లంలో సరిగ్గా ఉండి, ప్రాంతీయ భాషలో మాత్రమే తప్పుగా నమోదైన సందర్భానికి వేరే విధానం వర్తించవచ్చు.

ఇక మీ ప్రస్తుత పేరును పూర్తిగా మార్చుకోవాలనుకుంటే లేదా పాత పేరుతో పోలిస్తే పూర్తిగా భిన్నమైన పేరు పెట్టుకోవాలనుకుంటే అది పెద్ద మార్పు (Major Name Change) కిందకు వస్తుంది. ఇలాంటి సందర్భాల్లో ప్రభుత్వ గెజిట్ నోటిఫికేషన్‌తో పాటు చెల్లుబాటు అయ్యే గుర్తింపు పత్రాన్ని సమర్పించాల్సి ఉంటుందని పేర్కొంటున్నారు. కాబట్టి దరఖాస్తు చేసే ముందు అవసరమైన పత్రాలను సిద్ధం చేసుకోవాలి.

ఆధార్‌లో పేరు మార్చుకోవడం ఎలా? ఫీజు ఎంత?

ఆధార్ కార్డులో పేరు సవరించుకోవాలంటే సమీపంలోని ఆధార్ సేవా కేంద్రం లేదా నమోదు, సవరణ కేంద్రాన్ని సందర్శించాలి. మీ పేరు మార్పు ఏ విభాగానికి చెందుతుందో గుర్తించి, దానికి అవసరమైన ఫారమ్‌లు, పత్రాలను సమర్పించాలి. అనంతరం కేంద్రంలో బయోమెట్రిక్ ధ్రువీకరణ, ఇతర తనిఖీలను పూర్తి చేయాలి. ఇందుకు గాను రూ.75 ఫీజు చెల్లించాలి. అయితే ఫీజులు, పత్రాల నిబంధనలు మారే అవకాశం ఉన్నందున దరఖాస్తు చేసే ముందు UIDAI అధికారిక వెబ్‌సైట్‌లో తాజా వివరాలను నిర్ధారించుకోవాలి.

దరఖాస్తు పూర్తయ్యాక రసీదు తీసుకోవాలి. అందులో ఉండే అప్‌డేట్ రిక్వెస్ట్ నంబర్ (URN) ద్వారా మీ దరఖాస్తు స్థితిని తెలుసుకోవచ్చు. ముఖ్యంగా చిన్న మార్పులు, పెళ్లి తర్వాత పేరు మార్పు, డేటా ఎంట్రీ తప్పుల సవరణ, పూర్తి పేరు మార్పు.. వీటిలో మీది ఏ రకమో ముందుగా తెలుసుకోవాలి. దానికి తగిన డాక్యుమెంట్లు సిద్ధం చేసుకుంటే దరఖాస్తు ప్రక్రియ సులభంగా పూర్తయ్యే అవకాశం ఉంటుంది.