అగ్నివీరులకు కేంద్రం గుడ్‌న్యూస్.. నాలుగేళ్ల సర్వీస్‌పై కీలక నిర్ణయం.!

Agnipath Scheme: అగ్నిపథ్ పథకం కింద ఎంపికైన మొదటి బ్యాచ్ అగ్నివీర్లకు సంబంధించి కేంద్ర ప్రభుత్వం ఒక కీలక నిర్ణయం దిశగా అడుగులు వేస్తోంది. శాశ్వత నియామకాలకు ఎంపికైన అగ్నివీర్లతో పాటు మరికొంత మంది సిబ్బందికి సర్వీస్ కాలాన్ని పొడిగించాలని ప్రభుత్వం యోచిస్తున్నట్లు ఉన్నత స్థాయి వర్గాలు వెల్లడించాయి.

తొలి బ్యాచ్ అగ్నివీర్ల నాలుగేళ్ల పదవీకాలం ముగింపు దశకు చేరుకోవడంతో, ప్రస్తుతం శాశ్వత కేడర్ కోసం ఎంపిక ప్రక్రియ వేగంగా సాగుతోంది. ఈ క్రమంలోనే సర్వీస్ పొడిగింపు ప్రతిపాదనపై గత కొన్ని రోజులుగా రక్షణ శాఖలో పలు ఉన్నత స్థాయి సమావేశాలు నిర్వహించినట్లు తెలుస్తోంది.

నవంబర్ 21లోగా అధికారిక ప్రకటన

ఈ ప్రతిపాదనపై ప్రభుత్వం నుంచి ఇంకా ఎలాంటి అధికారిక నిర్ణయం వెలువడనప్పటికీ, నవంబర్ 21న మొదటి బృందం నాలుగేళ్ల పదవీకాలం ముగిసేలోపే స్పష్టమైన ప్రకటన వచ్చే అవకాశం ఉందని వర్గాలు చెబుతున్నాయి. అయితే సర్వీస్ పొడిగింపు కాలపరిమితి ఎంతకాలం ఉండబోతోందనే దానిపై ఇంకా స్పష్టత రావాల్సి ఉంది.

మూడు రక్షణ దళాలలో భారత నౌకాదళం (నేవీ) తన మొదటి బ్యాచ్ అగ్నివీర్ల సర్వీస్‌ను నవంబర్ 21న పూర్తి చేయనుండగా, భారత వైమానిక దళం (ఐఏఎఫ్) డిసెంబర్ 21న, అలాగే భారత సైన్యం (ఆర్మీ) డిసెంబర్ 31 నాటికి నాలుగేళ్ల పదవీకాలాన్ని పూర్తి చేసుకోనున్నాయి.

25 శాతం శాశ్వత కేడర్.. వాయుసేన కీలక నిర్ణయం

సాయుధ దళాల్లో యువతను నాలుగేళ్ల కాలానికి నియమించేందుకు 2022లో కేంద్ర ప్రభుత్వం 'అగ్నిపథ్' పథకాన్ని ప్రవేశపెట్టింది. నిబంధనల ప్రకారం ప్రతీ బ్యాచ్‌లోని మొత్తం అగ్నివీర్లలో గరిష్టంగా 25 శాతం మందిని వారి పనితీరు ఆధారంగా రెగ్యులర్ సర్వీస్‌లోకి (శాశ్వత నియామకాలు) తీసుకునేందుకు వెసులుబాటు ఉంది.

రక్షణ దళాల అవసరాలు, నాలుగేళ్ల కాలంలో చూపిన పనితీరును కేంద్రీకృత విధానం ద్వారా సమీక్షించి ఈ 25 శాతం మందిని ఎంపిక చేస్తారు. ఇందులో భాగంగానే భారత వైమానిక దళం తమ తొలి 'అగ్నివీర్ వాయు' బ్యాచ్‌లోని 2,850 మంది రిక్రూట్లలో 712 మందిని శాశ్వత కేడర్ కింద కొనసాగించాలని ఇప్పటికే నిర్ణయించినట్లు సమాచారం.