అజిత్ దోవల్కు అమెరికా కోర్టు సమన్లు.. భారత్ కౌంటర్
Ajit Doval Samant: జాతీయ భద్రతా సలహాదారు అజిత్ దోవల్, రీసెర్చ్ అండ్ అనాలిసిస్ వింగ్ మాజీ చీఫ్ సమంత్ గోయల్లకు అమెరికా కోర్టు జారీ చేసిన సమన్లను భారత..
అజిత్ దోవల్కు అమెరికా కోర్టు సమన్లు.. భారత్ కౌంటర్
Ajit Doval Samant: జాతీయ భద్రతా సలహాదారు అజిత్ దోవల్, రీసెర్చ్ అండ్ అనాలిసిస్ వింగ్ మాజీ చీఫ్ సమంత్ గోయల్లకు అమెరికా కోర్టు జారీ చేసిన సమన్లను భారత విదేశాంగ మంత్రిత్వ శాఖ శుక్రవారం తిరస్కరించింది. ఖలిస్తాన్ అనుకూల సంస్థ సిక్స్ ఫర్ జస్టిస్ దాఖలు చేసిన సివిల్ దావాలో ఈ సమన్లు జారీ అయ్యాయి. ఢిల్లీ కోర్టుల ద్వారా సమన్లు పంపాలన్న అమెరికా కోర్టు ఆదేశంపై అడిగిన ప్రశ్నకు విదేశాంగ శాఖ ప్రతినిధి రణధీర్ జైస్వాల్ స్పందిస్తూ.. ఇలాంటి నిరాధారమైన దావాలను తాము తిరస్కరిస్తామని స్పష్టం చేశారు.
అమెరికా కోర్టు ఉత్తర్వులో ఏముంది?
న్యూయార్క్ దక్షిణ జిల్లాలోని యూఎస్ డిస్ట్రిక్ట్ కోర్టు న్యాయమూర్తి కేథరీన్ పోల్క్ ఫైలా ఈ ఉత్తర్వులు జారీ చేశారు. ఉగ్రవాది గుర్పత్వంత సింగ్ పన్ను వేసిన సివిల్ దావాకు సంబంధించి ఈ ఆదేశాలు వచ్చాయి. దోవల్, గోయల్లకు న్యాయ పత్రాలను అందజేసేందుకు ఢిల్లీలోని పటియాలా హౌస్, ద్వారక, టిస్ హజారీ జిల్లా కోర్టులతో సహా ప్రత్యామ్నాయ మార్గాన్ని కోర్టు అనుసరించింది. అంతర్జాతీయ మెయిల్ లేదా కొరియర్ ద్వారా పత్రాలను పంపాలని కోర్టు క్లర్కులకు సూచించింది. హేగ్ కన్వెన్షన్ కింద భారత సెంట్రల్ అథారిటీ ద్వారా గతంలో చేసిన ప్రయత్నాలు తిరస్కరణకు గురయ్యాయని కోర్టు పేర్కొంది. ఈ నేపథ్యంలో హేగ్ కన్వెన్షన్లోని ఆర్టికల్ 19, భారత సివిల్ ప్రొసీజర్ కోడ్ ప్రకారం ప్రత్యామ్నాయ పద్ధతిని ఆమోదించి, నోటీసుల జారీలో సంబంధిత భారతీయ కోర్టుల సహాయాన్ని అభ్యర్థించింది.
విధానపరమైన దశ మాత్రమే.. గతంలోనూ ఇలాంటి కేసులు
ఈ సమన్లు కట్టుబడి ఉండాల్సినవి కావని, కోర్టు చర్య కేవలం ఒక సాధారణ విధానపరమైన దశ మాత్రమేనని వర్గాలు వెల్లడించాయి. ఇంతకుముందు కూడా యూఎస్ స్టేట్ డిపార్ట్మెంట్ భారత రాయబార కార్యాలయం ద్వారా సమన్లు పంపినప్పుడు, కేసుపై తమ వైఖరితో ఆ చర్యకు ఎలాంటి సంబంధం లేదని స్పష్టం చేసింది. భారతీయ నేతలపై లేదా అధికారులపై సిక్స్ ఫర్ జస్టిస్ ఇలాంటి సివిల్ దావాలు వేయడం ఇదే తొలిసారి కాదు. 1984 సిక్కు వ్యతిరేక అల్లర్లకు సంబంధించిన మానవ హక్కుల ఉల్లంఘన ఆరోపణలపై ఆ సంస్థ వేసిన దావాలో, 2013లో మాజీ ప్రధాని మన్మోహన్ సింగ్కు కూడా సివిల్ సమన్లు జారీ అయ్యాయి.




