New Delhi: ఢిల్లీలో ఐఎఫ్‌పీ రిఫైనరీ సందర్శన!

New Delhi: ఆంధ్రప్రదేశ్ రాష్ట్ర రవాణా శాఖ మంత్రి శ్రీ రామ్ ప్రసాద్ రెడ్డి న్యూఢిల్లీలోని ఐఎఫ్‌పీ ఆయిల్ రిఫైనరీ (IFP Oil Refinery)ను సందర్శించి, అక్కడ జరుగుతున్న రిఫైనింగ్ ప్రక్రియను పరిశీలించారు. ఆయిల్ రిఫైనింగ్ విధానం, సాంకేతిక ప్రక్రియలు, పరిశ్రమ నిర్వహణ తీరు, పెట్టుబడి అవకాశాలు తదితర అంశాలను ఆయన అధికారులు, సంస్థ ప్రతినిధులతో చర్చించి వివరాలను తెలుసుకున్నారు.

ఈ సందర్భంగా మంత్రి శ్రీ రామ్ ప్రసాద్ రెడ్డి ఐఎఫ్‌పీ సంస్థను ఆంధ్రప్రదేశ్‌లో పెట్టుబడులు పెట్టేందుకు ఆహ్వానించారు. ముఖ్యంగా అన్నమయ్య జిల్లా రాయచోటిలో రూ.100 కోట్లకు పైగా పెట్టుబడితో పరిశ్రమను ఏర్పాటు చేసే అవకాశాలను పరిశీలించాలని సంస్థ ప్రతినిధులకు సూచించారు.

రాష్ట్రంలో పారిశ్రామిక అభివృద్ధికి అనుకూలమైన వాతావరణాన్ని ప్రభుత్వం కల్పిస్తోందని, పెట్టుబడిదారులకు అవసరమైన సహకారం, మౌలిక వసతులు, ప్రభుత్వ అనుమతులు మరియు ఇతర సౌకర్యాలను వేగవంతంగా అందించేందుకు ప్రభుత్వం కట్టుబడి ఉందని మంత్రి తెలిపారు.

ముఖ్యమంత్రి శ్రీ నారా చంద్రబాబు నాయుడు గారి నాయకత్వంలో ఆంధ్రప్రదేశ్‌ను పెట్టుబడులకు గమ్యస్థానంగా మార్చి, రాష్ట్రంలో భారీగా పరిశ్రమలు, ఉపాధి అవకాశాలు తీసుకురావాలన్న ప్రభుత్వ లక్ష్యానికి అనుగుణంగా ఈ ప్రయత్నం కొనసాగుతోంది.

రాయచోటిలో ఐఎఫ్‌పీ ప్రతిపాదిత పెట్టుబడి ద్వారా స్థానికంగా పారిశ్రామిక అభివృద్ధి, ఉపాధి అవకాశాలు మరియు అనుబంధ వ్యాపారాలకు ఊతం లభించే అవకాశం ఉందని మంత్రి పేర్కొన్నారు.

ఆంధ్రప్రదేశ్‌లో పెట్టుబడులకు ఉన్న అవకాశాలు, ప్రభుత్వం అందిస్తున్న ప్రోత్సాహకాలు, పారిశ్రామిక అనుకూల విధానాలపై ఐఎఫ్‌పీ ప్రతినిధులకు మంత్రి వివరించారు. సంస్థ ప్రతినిధులు కూడా ఆంధ్రప్రదేశ్‌లో పెట్టుబడి అవకాశాలను పరిశీలించేందుకు సానుకూలంగా స్పందించినట్లు తెలిపారు.

“ముఖ్యమంత్రి చంద్రబాబు నాయుడు గారి విజన్‌కు అనుగుణంగా రాష్ట్రానికి మరిన్ని పెట్టుబడులను ఆకర్షించి, పరిశ్రమల స్థాపన ద్వారా యువతకు పెద్దఎత్తున ఉపాధి అవకాశాలు కల్పించడమే ప్రభుత్వ లక్ష్యం” అని మంత్రి రామ్ ప్రసాద్ రెడ్డి తెలిపారు.