Guard Of Honour Mistake: జడ్జికి ఇవ్వాల్సిన సెల్యూట్.. ఒవైసీకి ఇచ్చేశారు!

Guard Of Honour Mistake: ఉత్తరప్రదేశ్‌లోని సహారన్‌పూర్‌లో పోలీసులు చేసిన ఒక పొరపాటు ఇప్పుడు రాజకీయ వర్గాల్లో చర్చనీయాంశంగా మారింది.

G Krishna
Published on: 21 Nov 2026 7:44 PM IST
Guard Of Honour Mistake
X

Guard Of Honour Mistake: జడ్జికి ఇవ్వాల్సిన సెల్యూట్.. ఒవైసీకి ఇచ్చేశారు!

Guard Of Honour Mistake: ఉత్తరప్రదేశ్‌లోని సహారన్‌పూర్‌లో పోలీసులు చేసిన ఒక పొరపాటు ఇప్పుడు రాజకీయ వర్గాల్లో చర్చనీయాంశంగా మారింది. ఆల్ ఇండియా మజ్లిస్-ఎ-ఇత్తెహాదుల్ ముస్లిమీన్ (ఏఐఎంఐఎం) చీఫ్ అసదుద్దీన్ ఒవైసీకి పోలీసులు పొరపాటున గౌరవ వందనం సమర్పించారు. సహారన్‌పూర్‌లోని సర్క్యూట్ హౌస్‌కు ఒవైసీ చేరుకోగానే పోలీసులు వందనం చేయగా, ఆయన నిలబడి గౌరవ వందనం స్వీకరించి అక్కడి నుంచి వెళ్లిపోయారు. వాస్తవానికి ఒక సుప్రీం కోర్టు న్యాయమూర్తి సర్క్యూట్ హౌస్‌కు రావాల్సి ఉండగా, ఆయన కోసం వందనం ఏర్పాట్లు చేశారు. కానీ న్యాయమూర్తి కంటే ముందే ఒవైసీ అక్కడికి రావడంతో పోలీసులు పొరపాటున ఆయనకు గౌరవ వందనం సమర్పించారని సమాచారం.

సోషల్ చేంజ్ ఫ్రంట్ పొత్తు.. తొలి అడుగు

ఏఐఎంఐఎం, చంద్రశేఖర్ ఆజాద్ నేతృత్వంలోని ఆజాద్ సమాజ్ పార్టీ మధ్య పొత్తు కుదిరిన తర్వాత తొలిసారిగా ఒవైసీ శనివారం సహారన్‌పూర్‌కు వచ్చారు. రాబోయే యూపీ ఎన్నికల కోసం ఈ రెండు పార్టీలు సోషల్ చేంజ్ ఫ్రంట్ పేరుతో కూటమి కట్టాయి. ముఖ్యమంత్రి అభ్యర్థిగా చంద్రశేఖర్ ఆజాద్ పేరును ఇరు పార్టీలు ప్రకటించాయి.

నవంబర్ 26న లక్నో ర్యాలీ.. 403 సీట్లపై కన్ను

నవంబర్ 26న లక్నోలో జరగబోయే ర్యాలీలో ఒవైసీ, చంద్రశేఖర్ ఆజాద్ కలిసి పాల్గొని, సీఎం అభ్యర్థిగా ఆజాద్‌కు మద్దతు ఇవ్వాలని రాష్ట్ర ప్రజలను కోరనున్నట్లు నివేదికలు చెబుతున్నాయి. అయితే దేశంలోనే అత్యధిక జనాభా ఉన్న యూపీలోని మొత్తం 403 అసెంబ్లీ స్థానాల్లో ఈ కొత్త కూటమి మిగతా పార్టీలకు ఎంతవరకు పోటీ ఇవ్వగలదనే చర్చ జరుగుతోంది.

పశ్చిమ యూపీ ఓటర్లపై దృష్టి.. ఎస్పీ, కాంగ్రెస్‌లకు ఆహ్వానం

చంద్రశేఖర్ ఆజాద్‌కు బలమైన పట్టు ఉన్న పశ్చిమ ఉత్తరప్రదేశ్‌లో ఇరు పార్టీలు కలిసి పనిచేసేందుకు సహారన్‌పూర్ తొలి వేదికగా కనిపిస్తోంది. ఆ ప్రాంతంలో దళితులు, ముస్లిం ఓటర్లు గణనీయంగా ఉండటంతో పాటు బహుజన ఉద్యమ నేపథ్యం ఉన్నందున ఓటర్లను తమ వైపు తిప్పుకోవాలని ఈ కూటమి భావిస్తోంది. ఈ క్రమంలో కూటమిలో చేరాలని సమాజ్‌వాదీ పార్టీ, కాంగ్రెస్‌లను కూడా ఒవైసీ ఆహ్వానించారు. ముస్లింలు, వెనుకబడిన వర్గాల విషయంలో పాత ప్రతిపక్ష పార్టీల పనితీరును ప్రశ్నిస్తూనే, నిరుద్యోగం, ధరల పెరుగుదల, రైతుల సమస్యలను ప్రస్తావిస్తూ తమ అభ్యర్థులను గెలిపించాలని ఓటర్లను కోరారు.

G Krishna

G Krishna

అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్‌తో పాటు ఇంట్రెస్ట్‌ను కూడా అందిస్తుంది.