Chandrapur: ఆశ్రమ పాఠశాలలో దారుణం..80 మంది విద్యార్థులకు అరగుండు!

Chandrapur: మహారాష్ట్రలోని చంద్రాపూర్ జిల్లా కేంద్రంలో దారుణ ఘటన చోటుచేసుకుంది. ఓ ఆశ్రమ పాఠశాలలో సుమారు 80 మంది విద్యార్థులకు అరగుండు చేయించిన ఘటన కలకలం రేపింది.

విద్యార్థులకు కటింగ్ చేయించేందుకు పాఠశాల సిబ్బంది బార్బర్‌ను పిలిపించారు. అయితే కటింగ్ సమయంలో కొంతమంది విద్యార్థులు అందుబాటులో లేకపోవడంతో ప్రిన్సిపాల్ ఆగ్రహించినట్లు తెలుస్తోంది. దీంతో కటింగ్ చేయించుకోని సుమారు 80 మంది విద్యార్థులకు అరగుండు చేయించినట్లు ఆరోపణలు ఉన్నాయి.

ఈ ఘటనకు సంబంధించిన విద్యార్థుల అరగుండు ఫొటోలు సోషల్ మీడియాలో వైరల్ కావడంతో తల్లిదండ్రులు తీవ్ర ఆగ్రహం వ్యక్తం చేశారు. ప్రిన్సిపాల్‌పై చర్యలు తీసుకోవాలని డిమాండ్ చేస్తూ పాఠశాల ఎదుట ఆందోళనకు దిగారు .స్పందించిన ఉన్నతాధికారులు.. ప్రిన్సిపాల్‌తో పాటు పాఠశాల సిబ్బందికి షోకాజ్ నోటీసులు జారీ చేశారు. ఘటనపై పూర్తిస్థాయి విచారణ చేపట్టి బాధ్యులపై చర్యలు తీసుకోవాలని తల్లిదండ్రులు డిమాండ్ చేస్తున్నారు.