Ayodhya: నవంబర్ 1 నుంచి అయోధ్య రాముడి దర్శన వేళల్లో మార్పులు.. కొత్త టైమింగ్స్ ఇవే!

Ayodhya: ఉత్తరప్రదేశ్‌లోని ప్రసిద్ధ పుణ్యక్షేత్రం అయోధ్య శ్రీరామ జన్మభూమి ఆలయ దర్శన వేళల్లో శ్రీరామ జన్మభూమి తీర్థక్షేత్ర ట్రస్టు కీలక మార్పులు చేసింది. వాతావరణంలో సంభవిస్తున్న సీజన్ మార్పులను దృష్టిలో ఉంచుకుని నవంబర్ 1 నుంచి కొత్త దర్శన వేళలను అమల్లోకి తీసుకురానున్నట్లు ట్రస్ట్ ప్రతినిధులు వెల్లడించారు.

కొత్త నిబంధనల ప్రకారం.. ఆలయాన్ని ప్రతిరోజూ ఉదయం 4:00 గంటలకు తెరిచి, రాత్రి 10:00 గంటలకు మూసివేయనున్నారు. ప్రస్తుతం ఆలయాన్ని తెల్లవారుజామున 3:45 గంటలకే తెరిచి, రాత్రి 10:30 గంటల వరకు భక్తులను అనుమతిస్తున్న సంగతి తెలిసిందే.

రోజువారీ పూజలు - దర్శన వేళల పూర్తి వివరాలు (నవంబర్ 1 నుంచి):

ఉదయం 4:00 గంటలకు: ఆలయ ద్వారాలు తెరుచుకుంటాయి.

ఉదయం 4:30 నుండి 4:40 వరకు: స్వామివారికి 'మంగళ హారతి' నిర్వహిస్తారు.

ఉదయం 4:40 నుండి 6:30 వరకు: అభిషేకం, శ్రీరాముని శృంగార హారతి మరియు ఇతర ప్రత్యేక పూజా కార్యక్రమాల కోసం ఆలయ ద్వారాలు మూసి ఉంటాయి.

ఉదయం 6:30 గంటల నుంచి: భక్తులకు స్వామివారి సాధారణ దర్శనం ప్రారంభమవుతుంది.

ఉదయం 8:00 నుండి 8:10 వరకు: 'బాలభోగ్' నైవేద్య సమర్పణ కోసం 10 నిమిషాల పాటు ఆలయం మూసివేస్తారు.

ఉదయం 8:10 నుండి 11:30 వరకు: భక్తులకు దర్శనం కొనసాగుతుంది.

మధ్యాహ్నం 12:00 నుండి 1:30 వరకు: 'రాజ్‌భోగ్' నైవేద్య సమర్పణ మరియు స్వామివారి విశ్రాంతి సమయం (ఆలయం మూసి ఉంటుంది).

మధ్యాహ్నం 1:35 గంటల నుంచి: మళ్లీ దర్శనాలు ప్రారంభమవుతాయి.

సాయంత్రం 6:00 గంటలకు: 'సంధ్యా హారతి' సమర్పణ (ఈ సమయంలో 15 నిమిషాల పాటు ద్వారాలు మూసి ఉంటాయి).

రాత్రి 10:00 గంటలకు: శయన హారతి అనంతరం ఆలయాన్ని రాత్రికి పూర్తిగా మూసివేస్తారు.

అయోధ్యకు వచ్చే భక్తులు ఈ కొత్త టైమింగ్స్‌ను గమనించి తమ ప్రయాణాలను, దర్శనాలను ప్లాన్ చేసుకోవాలని ఆలయ ట్రస్ట్ సూచించింది.