Ayushman Saarthi: వాట్సాప్‌లో ఆయుష్మాన్ భారత్ సేవలు.. ఎలా ఉపయోగించుకోవాలంటే.?

Ayushman Saarthi: కేంద్ర ప్రభుత్వం డిజిటల్ ఆరోగ్య సేవలను మరింత సులభంగా ప్రజలకు చేరవేయడానికి మరో కీలక అడుగు వేసింది. పీఎం-జేఏవై (ప్రధాన మంత్రి జన ఆరోగ్య యోజన) లబ్ధిదారుల కోసం 'ఆయుష్మాన్ సారథి' పేరుతో ప్రత్యేక వాట్సాప్ చాట్‌బాట్‌ను అందుబాటులోకి తీసుకొచ్చింది.

ఆయుష్మాన్ సారథి అంటే ఏమిటి?

ఆయుష్మాన్ సారథి అనేది పీఎం-జేఏవై లబ్ధిదారులకు డిజిటల్ రూపంలో సేవలు అందించేందుకు రూపొందించిన వాట్సాప్ ఆధారిత చాట్‌బాట్. జాతీయ ఆరోగ్య ప్రాధికార సంస్థ, కేంద్ర ఆరోగ్య మంత్రిత్వ శాఖ సహకారంతో దీన్ని అభివృద్ధి చేశారు. ప్రభుత్వ కార్యాలయాలు లేదా హెల్ప్‌లైన్‌లపై ఆధారపడకుండా, అవసరమైన సమాచారాన్ని నేరుగా మొబైల్‌లో పొందేలా ఈ వ్యవస్థ పనిచేస్తుంది.

ఈ చాట్‌బాట్ నేరుగా ఆయుష్మాన్ భారత్ డేటాబేస్‌తో అనుసంధానమై ఉండటంతో, లబ్ధిదారులకు తాజా సమాచారం తక్షణమే అందుతుంది. గ్రామీణ ప్రాంతాల్లో నివసించే ప్రజలు కూడా సులభంగా ఈ సేవలను ఉపయోగించుకోవచ్చు.

చాట్‌బాట్ ద్వారా లభించే ప్రధాన సేవలు:

ఆయుష్మాన్ సారథి ద్వారా ఒకే వేదికపై అనేక కీలక సేవలు అందుబాటులో ఉన్నాయి. వాటిలో ముఖ్యమైనవి ఆయుష్మాన్ భారత్ పథకానికి అర్హత ఉందో లేదో తెలుసుకోవడం, కొత్త ఆయుష్మాన్ కార్డు కోసం దరఖాస్తు చేయడం, కార్డును డౌన్‌లోడ్ చేసుకోవడం, ఈ-కేవైసీ వివరాలను నవీకరించడం, ఆధార్‌ను కార్డుతో అనుసంధానం చేయడం, అవసరమైతే కార్డును లాక్ లేదా అన్‌లాక్ చేయడం, 70 ఏళ్లు, అంతకంటే ఎక్కువ వయస్సు ఉన్న వారి కోసం ప్రత్యేకంగా అందించే ఆయుష్మాన్ వయ వందన కార్డు వివరాలను తెలుసుకోవడం.

చికిత్స వివరాలు, పథకం కింద అందుబాటులో ఉన్న ప్రయోజనాలను పరిశీలించడం, సమీపంలోని ఎంప్యానెల్డ్ ఆసుపత్రుల వివరాలు తెలుసుకోవడం, ఫిర్యాదు నమోదు చేయడం, దాని పురోగతిని చూడడం లేదా అవసరమైతే వెనక్కి తీసుకోవడం, కాల్‌బ్యాక్ కోసం అభ్యర్థన పంపించడం ఆసుపత్రి సేవలపై అభిప్రాయాన్ని తెలియజేయడం వంటి

కలిగే ప్రయోజనాలు ఏమిటి?

ఈ చాట్‌బాట్ వల్ల లబ్ధిదారులు చిన్నచిన్న పనుల కోసం ప్రభుత్వ కార్యాలయాల చుట్టూ తిరగాల్సిన అవసరం ఉండదు. కాల్ సెంటర్‌కు ఫోన్ చేసి ఎక్కువసేపు వేచి ఉండాల్సిన పరిస్థితి కూడా తగ్గుతుంది.

వాట్సాప్ ఇప్పటికే ఎక్కువ మంది వినియోగించే యాప్ కావడంతో, ప్రత్యేకంగా మరో యాప్‌ను ఇన్‌స్టాల్ చేయాల్సిన అవసరం లేదు. ఒకే చాట్‌లో అన్ని సేవలు అందుబాటులో ఉండటం వల్ల సమయం, ఖర్చు రెండూ ఆదా అవుతాయి. ముఖ్యంగా ఇంటర్నెట్ అందుబాటులో ఉన్న ఏ ప్రాంతం నుంచైనా ఈ సేవలను వినియోగించుకోవచ్చు.

ఆయుష్మాన్ సారథిని ఎలా ఉపయోగించాలి?

ఈ సేవను ప్రారంభించడం చాలా సులభం. లబ్ధిదారులు తమ మొబైల్‌లో వాట్సాప్ ఓపెన్ చేసి +91 72908 23838 నంబర్‌కు "Hi" అని మెసేజ్ పంపాలి. అనంతరం స్క్రీన్‌పై కనిపించే ఆప్షన్స్ ద్వారా అవసరమైన సేవను ఎంచుకుని కొనసాగించవచ్చు.

ప్రభుత్వం విడుదల చేసిన అధికారిక క్యూ ఆర్ కోడ్‌ను స్కాన్ చేసినా ఇదే చాట్‌బాట్ ఓపెన్ అవుతుంది. ఈ సేవ రోజుకు 24 గంటలు, వారంలో ఏడు రోజులూ అందుబాటులో ఉంటుంది.

డిజిటల్ ఆరోగ్య సేవల్లో మరో ముందడుగు

దేశంలో ఆరోగ్య సేవలను మరింత పారదర్శకంగా, వేగంగా అందించాలనే లక్ష్యంతో కేంద్ర ప్రభుత్వం డిజిటల్ సాంకేతికతను విస్తృతంగా వినియోగిస్తోంది. ఆయుష్మాన్ సారథి కూడా అదే దిశగా తీసుకొచ్చిన మరో కీలక కార్యక్రమంగా చెప్పవచ్చు.

లబ్ధిదారులు కార్డు, అర్హత, ఆసుపత్రులు, చికిత్స వివరాలు, ఫిర్యాదులు వంటి అనేక సేవలను ఒకే వేదికలో పొందే అవకాశం కలగడం ఈ చాట్‌బాట్ ప్రధాన ప్రత్యేకత. దీంతో ప్రభుత్వ సేవలు మరింత సులభంగా ప్రజల చేతుల్లోకి చేరడంతో పాటు, ఆరోగ్య పథకాల అమలు కూడా మరింత సమర్థవంతంగా జరిగే అవకాశం ఉంది.