Fire Tragedy : హాస్పిటల్ ఐసీయూలో అగ్నిప్రమాదం.. ముగ్గురు రోగులు మృతి

Fire Tragedy : బిహార్‌లోని ముజఫర్‌పూర్‌లో గురువారం తెల్లవారుజామున ఒక అత్యంత ఘోరమైన అగ్నిప్రమాదం జరిగింది. బ్రహ్మపురా ప్రాంతంలో ఉన్న ప్రముఖ ప్రసాద్ హాస్పిటల్ ఐసీయూ వార్డులో ఒక్కసారిగా మంటలు చెలరేగాయి. ఈ ఘోర ప్రమాదంలో తీవ్రంగా గాయపడటం, దట్టమైన పొగ వల్ల ఊపిరాడకపోవడంతో ఐసీయూలో చికిత్స పొందుతున్న ముగ్గురు రోగులు అక్కడికక్కడే ప్రాణాలు కోల్పోయారు. ఈ ప్రమాద వార్త తెలియగానే ఆస్పత్రి పరిసర ప్రాంతాలతో పాటు ముజఫర్‌పూర్ నగరం మొత్తం ఒక్కసారిగా దిగ్భ్రాంతికి లోనైంది.

హాస్పిటల్ మేనేజ్‌మెంట్ తెలిపిన ప్రాథమిక సమాచారం ప్రకారం.. ఆస్పత్రిలోని ఐదో అంతస్తులో ఉన్న ఐసీయూ వార్డులో షార్ట్ సర్క్యూట్ సంభవించడం వల్లే ఈ మంటలు అంటుకున్నాయి. కళ్లజూస్తుండగానే మంటలు వార్డు అంతటా వేగంగా విస్తరించాయి. దీనివల్ల వార్డు మొత్తం దట్టమైన పొగ కమ్ముకుంది. ప్రమాదం జరిగిన సమయంలో ఐసీయూలో ఉన్న రోగులు కదలలేని స్థితిలో ఉండటంతో, పొగను పీల్చి ఊపిరి తీసుకోలేక కొందరు అక్కడికక్కడే ప్రాణాలు విడిచారు. ప్రమాద సమాచారం అందుకున్న వెంటనే దాదాపు అర డజను ఫైర్ ఇంజన్లు ఘటనా స్థలానికి చేరుకుని మంటలను అదుపు చేశాయి.

ఈ అగ్నిప్రమాదం జరిగిన వెంటనే ఆస్పత్రిలో పెద్ద ఎత్తున గందరగోళం, తొక్కిసలాట లాంటి వాతావరణం ఏర్పడింది. ప్రాణభయంతో రోగులు, వారి బంధువులు పరుగులు తీశారు. అయితే, ప్రమాద సమయంలో ఆస్పత్రిలో ఉన్న ఫైర్ కంట్రోల్ సిస్టమ్ అస్సలు పనిచేయలేదని బాధితుల బంధువులు తీవ్ర ఆరోపణలు చేస్తున్నారు. ఒకవేళ ఆ సేఫ్టీ సిస్టమ్ గనుక సక్రమంగా పనిచేసి ఉంటే.. సకాలంలో మంటలను ఆర్పేందుకు వీలయ్యేదని, ఈ ముగ్గురి ప్రాణాలు దక్కేవని బంధువులు కన్నీరుమున్నీరుగా విలపిస్తున్నారు.

అగ్నిమాపక సిబ్బంది, స్థానిక పోలీసులు తీవ్రంగా శ్రమించి ఐసీయూ వార్డు కిటికీలు పగలగొట్టి లోపల చిక్కుకుపోయిన మిగతా రోగులను సురక్షితంగా బయటకు తీసుకువచ్చారు. అక్కడ చికిత్స పొందుతున్న పలువురు రోగుల పరిస్థితి విషమంగా ఉండటంతో, వారిని వెంటనే సమీపంలోని ఇతర ప్రైవేట్ మరియు ప్రభుత్వ ఆస్పత్రులకు తరలించారు. తమ వారు ఎక్కడ ఉన్నారో, ఎలాంటి స్థితిలో ఉన్నారో తెలియక ఆస్పత్రి బయట రోగుల కుటుంబ సభ్యులు తీవ్ర ఆందోళనతో ఎదురుచూస్తున్నారు. ప్రస్తుతం అక్కడ భయానక వాతావరణం నెలకొంది.

ఈ ప్రమాదంపై అగ్నిమాపక శాఖ అధికారి రామ్ నివాస్ పాండే స్పందిస్తూ.. ప్రస్తుతం పరిస్థితిని పూర్తిగా సమీక్షిస్తున్నట్లు తెలిపారు. ఇప్పటివరకు ముగ్గురు మరణించినట్లు అధికారికంగా ధృవీకరించామని, దట్టమైన పొగ వల్ల ఐసీయూలో ఉన్న మరికొంత మంది పరిస్థితి కూడా ఆందోళనకరంగా ఉందని పేర్కొన్నారు. మృతుల సంఖ్య పెరిగే అవకాశం ఉందా అనే కోణంలో వివరాలు సేకరిస్తున్నామన్నారు. హాస్పిటల్ యాజమాన్యం తాము ప్రభుత్వ విచారణకు పూర్తి స్థాయిలో సహకరిస్తున్నామని, అసలు ప్రమాదానికి గల కారణాలపై అంతర్గత విచారణ జరుపుతున్నామని ప్రకటించింది. ప్రైవేట్ ఆస్పత్రుల్లో కనీస భద్రతా ప్రమాణాలు పాటించకపోవడం వల్లే ఇలాంటి దుర్ఘటనలు జరుగుతున్నాయని స్థానికులు మండిపడుతున్నారు.