BRICS: బ్రిక్స్ డిక్లరేషన్‌పై ఏకాభిప్రాయం: ఏకపక్ష యుద్ధాల ఖండనతో పాటు డాలర్ ఆధిపత్యానికి చెక్ పెట్టేలా ప్రణాళిక

BRICS: దిల్లీ వేదికగా జరుగుతున్న బ్రిక్స్ (BRICS) శిఖరాగ్ర సదస్సులో కీలక పరిణామం చోటుచేసుకుంది. బ్రిక్స్ డిక్లరేషన్ కోసం సభ్య దేశాల మధ్య ఏకాభిప్రాయం కుదిరినట్లు అంతర్జాతీయ మీడియా కథనాలు వెల్లడించాయి. ఏ దేశం పేరునూ ప్రత్యేకంగా ప్రస్తావించకుండా.. ప్రపంచంలో ఏ దేశమైనా పాల్పడే ఏకపక్ష యుద్ధాలను ఖండించేలా ఒక ఉమ్మడి ప్రకటనను వెలువరించడానికి బ్రిక్స్ కూటమి అంగీకరించింది.

మరోవైపు, పశ్చిమాసియాలో చెలరేగిన యుద్ధం కారణంగా ఇరాన్, యునైటెడ్ అరబ్ ఎమిరేట్స్ (UAE) మధ్య తలెత్తిన విభేదాలను తొలగించేందుకు సభ్య దేశాల ప్రతినిధులు తీవ్రంగా చర్చిస్తున్నారు. ఈ చర్చలు ముగిసిన వెంటనే బ్రిక్స్ అధినేతలు ఈ ఏకాభిప్రాయ ప్రకటనను అధికారికంగా ఆమోదించనున్నారు.

సభ్య దేశాల మధ్య ఆర్థిక సహకారం, ఇంధనం, ఆహార భద్రత, అధునాతన సాంకేతికత మరియు ప్రపంచ సంస్థల్లో సంస్కరణలు వంటి కీలక అంశాలపై సదస్సులో కూలంకషంగా చర్చిస్తున్నారు.

అంతర్జాతీయ వాణిజ్యం మరియు ఇతర లావాదేవీలలో అమెరికా డాలర్‌పై (US Dollar) ఆధారపడటాన్ని క్రమంగా తగ్గించుకోవాలని సభ్య దేశాలు భావిస్తున్నాయి. వాణిజ్య చెల్లింపులలో తమ సొంత జాతీయ కరెన్సీల వాడకాన్ని ప్రోత్సహించడంపై ప్రధానంగా దృష్టి పెట్టనున్నాయి.

ప్రపంచ దేశాలపై అమెరికా, పశ్చిమ దేశాల ఆధిపత్యాన్ని సమతుల్యం చేయడానికి, వర్ధమాన, అభివృద్ధి చెందుతున్న ఆర్థిక వ్యవస్థల మధ్య పరస్పర సహకారాన్ని బలోపేతం చేయడానికి బ్రిక్స్ అత్యంత కీలకమైన సాధనంగా పనిచేస్తుందని చైనా, రష్యా వంటి దేశాలు గట్టిగా విశ్వసిస్తున్నాయి.