BRICS Summit 2026: బ్రిక్స్ ముగిసింది.. మోదీ మాటలతో గ్లోబల్‌కు బిగ్ మెసేజ్

BRICS Summit 2026: భారత రాజధాని న్యూఢిల్లీలోని భారత్ మండపంలో ఎంతో ప్రతిష్టాత్మకంగా నిర్వహించిన 18వ బ్రిక్స్ (BRICS) శిఖరాగ్ర సదస్సు అత్యంత విజయవంతంగా ముగిసింది. సదస్సు ముగింపు సమావేశంలో భారత ప్రధాని నరేంద్ర మోదీ ప్రసంగిస్తూ, ఈ కార్యక్రమానికి విచ్చేసిన వివిధ దేశాల అధినేతలకు, ప్రతినిధులకు ప్రత్యేక ధన్యవాదాలు తెలియజేశారు. అలాగే రాబోయే తదుపరి బ్రిక్స్ సదస్సుకు ఆతిథ్యం ఇవ్వనున్న చైనా దేశానికి ఈ సందర్భంగా ప్రధాని మోదీ ముందస్తు శుభాకాంక్షలు అందజేశారు.

ప్రపంచ సవాళ్లు.. సామాన్యులపై ప్రభావం

ప్రస్తుతం ప్రపంచం ఎదుర్కొంటున్న పలు క్లిష్టమైన సవాళ్లను అధిగమించడంతో పాటు, సమ్మిళిత అభివృద్ధిని సాధించడంలో బ్రిక్స్ దేశాల మధ్య పరస్పర సహకారం అత్యంత కీలక పాత్ర పోషిస్తుందని ప్రధాని మోదీ బలంగా నొక్కి చెప్పారు. ప్రపంచవ్యాప్తంగా వివిధ ప్రాంతాల్లో నెలకొన్న భౌగోళిక , రాజకీయ ఘర్షణల పట్ల ఆయన తీవ్ర ఆవేదన వ్యక్తం చేశారు. ఇటువంటి యుద్ధాలు, ఘర్షణల కారణంగా అంతిమంగా సామాన్య ప్రజలే తీవ్రంగా ప్రభావితమవుతున్నారని ఆందోళన చెందారు. ఆధునిక సాంకేతికతను , అత్యంత కీలకమైన ఖనిజ సంపదను కొన్ని శక్తులు తమ స్వార్థం కోసం ఆయుధాలుగా మార్చుకుంటున్నాయని, ఇది ఏమాత్రం మంచి పరిణామం కాదని హెచ్చరించారు.

వాగ్దానాలు కాదు.. ఫలితాలే ముఖ్యం

బ్రిక్స్ కూటమి విజయవంతంగా మూడో దశాబ్దంలోకి అడుగుపెడుతున్న తరుణంలో ప్రధాని మోదీ వినూత్న దిశానిర్దేశం చేశారు. ఇప్పుడున్న పరిస్థితుల్లో ప్రపంచ దేశాలు ఈ కూటమి నుంచి కేవలం భావజాలం, ఆలోచనలు లేదా నెరవేరని వాగ్దానాలు మాత్రమే కోరుకోవడం లేదని, సమాజానికి నేరుగా ఉపయోగపడే స్పష్టమైన ఫలితాలను ఆశిస్తున్నాయని స్పష్టం చేశారు. ఈ సదస్సు వేదికగా ఏకగ్రీవంగా ఆమోదించిన 'న్యూఢిల్లీ డిక్లరేషన్' కూటమి భవిష్యత్ దార్శనికతకు, సభ్య దేశాల మధ్య పరస్పర సహకారానికి ఒక స్పష్టమైన దిశానిర్దేశం చేస్తుందని ఆయన ఆశాభావం వ్యక్తం చేశారు.

హాజరైన ప్రపంచ అగ్రనేతలు

భారత్ వేదికగా జరిగిన ఈ చారిత్రాత్మక సదస్సులో చైనా అధ్యక్షుడు షీ జిన్‌పింగ్, రష్యా అధ్యక్షుడు వ్లాదిమిర్ పుతిన్, ఇరాన్ అధ్యక్షుడు మసూద్ పెజెష్కియాన్, మలేషియా ప్రధాని అన్వర్ ఇబ్రహీం, దక్షిణాఫ్రికా అధ్యక్షుడు సిరిల్ రమఫోసా, ఈజిప్ట్ అధ్యక్షుడు అబ్దెల్ ఫతా ఎల్-సిసి, ఇథియోపియా ప్రధాని అబీయ్ అహ్మద్ అలీ, , అబుదాబి క్రౌన్ ప్రిన్స్ షేక్ ఖలీద్ బిన్ మొహమ్మద్ బిన్ జాయెద్ అల్ నహ్యాన్ వంటి ప్రధాన దేశాల అధినేతలు పెద్ద సంఖ్యలో పాల్గొన్నారు. వీరితో పాటు ఐక్యరాజ్యసమితి (UN) సెక్రటరీ జనరల్ ఆంటోనియో గుటెర్రస్ , వివిధ అంతర్జాతీయ సంస్థల ప్రతినిధులు కూడా ఈ సమావేశానికి హాజరై తమ విశ్లేషణలను, మద్దతును అందించారు. ప్రపంచ ఆర్థిక, రాజకీయ పరిణామాల నేపథ్యంలో న్యూఢిల్లీ డిక్లేరేషన్ సరికొత్త మైలురాయిగా నిలవనుంది.