Dipesh Sahu: ఆడంబరాలకు పోకుండా.. సామూహిక వివాహ వేదికపై పెళ్లి చేసుకున్న బీజేపీ ఎమ్మెల్యే!

Dipesh Sahu: నేటి కాలంలో సాధారణంగా రాజకీయ నాయకులు లేదా ప్రజాప్రతినిధుల ఇళ్లల్లో పెళ్లిళ్లు అంటే వందల కోట్ల ఖర్చు, ఆడంబరాలు, విఐపీల హడావుడి కనిపిస్తుంది. కానీ ఛత్తీస్‌గఢ్‌కు చెందిన ఓ అధికార పార్టీ ఎమ్మెల్యే మాత్రం వీటన్నింటికీ భిన్నంగా, అత్యంత నిరాడంబరంగా సామూహిక వివాహ వేదికపై పెళ్లి చేసుకుని దేశవ్యాప్తంగా అందరి దృష్టిని ఆకర్షించారు. ఛత్తీస్‌గఢ్ ప్రభుత్వం ఆదివారం బెమెతారా నియోజకవర్గంలో నిర్వహించిన ‘ముఖ్యమంత్రి కన్యా వివాహ యోజన’ (CM Kanya Vivah Yojana) కార్యక్రమంలో స్థానిక బీజేపీ ఎమ్మెల్యే దీపేశ్‌ సాహు (Dipesh Sahu) పెళ్లి పీటలెక్కారు. ఈ సామూహిక వివాహ వేదికపై ఇతర 20 సామాన్య జంటలతో కలిసి ఆయన.. తరుణా సాహు అనే యువతిని వివాహం చేసుకున్నారు.

ఈ వివాహ వేడుకలో మరో ఆసక్తికరమైన ఘట్టం చోటుచేసుకుంది. పెళ్లికి ముందు వరుడైన ఎమ్మెల్యే దీపేశ్ సాహును స్థానిక సాంప్రదాయ పద్ధతిలో ఎడ్లబండిపై ఊరేగింపుగా వేదిక వద్దకు తీసుకువచ్చారు. ఈ ఊరేగింపులో రాష్ట్ర ఉపముఖ్యమంత్రి అరుణ్ సావో (Arun Sao) స్వయంగా పాల్గొని ఎడ్లబండిని నడపడం అక్కడి వారందరినీ ఆశ్చర్యపరిచింది.

ఎమ్మెల్యే దీపేశ్ సాహు తీసుకున్న ఈ నిర్ణయాన్ని పెళ్లికి వచ్చిన అతిథులు, ప్రజలు ఘనంగా శ్లాఘించారు. ఈ వేడుకకు హాజరైన ఛత్తీస్‌గఢ్ ముఖ్యమంత్రి విష్ణుదేవ్‌ సాయ్‌ (Vishnu Deo Sai) నూతన వధూవరులను ఆశీర్వదించారు. "ఒక ఎమ్మెల్యే అయ్యుండి కూడా ఆడంబరాలకు పోకుండా, ప్రభుత్వం పేదల కోసం ప్రవేశపెట్టిన సామూహిక వివాహాల పథకంలో పెళ్లి చేసుకోవడం ఎంతో అభినందనీయం. ఆయన నిరాడంబరత సమాజానికి ఒక మంచి సందేశాన్ని ఇస్తుంది. ఆర్థికంగా ఇబ్బందులు పడే ప్రతి కుటుంబం ఈ ముఖ్యమంత్రి కన్యా వివాహ యోజనను సద్వినియోగం చేసుకోవాలి" అని సీఎం పిలుపునిచ్చారు.

ఈ పెళ్లి వేడుకల సందర్భంగానే ముఖ్యమంత్రి విష్ణుదేవ్‌ సాయ్‌ బెమెతారా జిల్లా అభివృద్ధికి రూ.105 కోట్లకు పైగా విలువైన కొత్త ప్రాజెక్టులను మంజూరు చేస్తున్నట్లు ప్రకటించి స్థానిక ప్రజలకు డబుల్ బోనాంజా ఇచ్చారు. ప్రస్తుతం ఈ లీడర్ పెళ్లికి సంబంధించిన ఫోటోలు, వీడియోలు సోషల్ మీడియాలో విపరీతంగా వైరల్ అవుతున్నాయి.