CJP: ఏ నిరసనకారుడినీ ఒంటరిని చేయబోం: CJP నేత సౌరవ్ దాస్!

CJP: తమతో కలిసి వీధుల్లోకి వచ్చి పోరాడిన ఏ ఒక్క నిరసనకారుడిని ఒంటరిని చేయబోమని కాక్రోచ్‌ జనతా పార్టీ (CJP) అధికార ప్రతినిధి సౌరవ్ దాస్ స్పష్టం చేశారు. కేంద్ర ప్రభుత్వ ప్రతినిధులతో సోమవారం అర్ధరాత్రి జరిగిన కీలక చర్చల అనంతరం ఆయన మీడియాతో మాట్లాడారు. ఆందోళనల్లో పాల్గొన్న అభ్యర్థులు, విద్యార్థులపై భవిష్యత్తులో ఎలాంటి కఠిన చర్యలు తీసుకోబోమని కేంద్రం హామీ ఇచ్చినట్లు వెల్లడించారు.

అన్ని రాష్ట్రాల్లో ఆందోళనకారులపై నమోదైన కేసులను ఎత్తివేయాలని కేంద్ర ప్రభుత్వాన్ని కోరామని, అందుకు వారు అంగీకరించారని తెలిపారు. బిహార్, అస్సాం రాష్ట్రాల్లో ఆందోళనల్లో పాల్గొన్న వారిపై నమోదైన కేసులను అక్కడి ప్రభుత్వాలు ఇప్పటికే ఉపసంహరించుకున్నాయని పేర్కొన్నారు. వివిధ ప్రాంతాల్లో పోలీసుల నిర్బంధంలో ఉన్న నిరసనకారులను విడుదల చేయడంపై కూడా కేంద్ర ప్రభుత్వం సానుకూలంగా స్పందించిందని వెల్లడించారు.

మరోవైపు, సీజేపీ ఆధ్వర్యంలో దిల్లీలోని జంతర్‌మంతర్ వద్ద జరిగిన ఆందోళనలపై దిల్లీ పోలీసులు తమ దర్యాప్తును తీవ్రతరం చేశారు. ఆందోళనల్లో పాల్గొన్న వారి వివరాలను సరిచూసేందుకు ఫేషియల్ రికగ్నిషన్ సాంకేతికతను వినియోగించినట్లు తెలిపారు.

పోలీసుల నివేదికలోని ముఖ్యాంశాలు:

ఫేషియల్ రికగ్నిషన్ ద్వారా గుర్తించిన వారిలో 2,873 మందికి గతంలో క్రైమ్ రికార్డులు ఉన్నట్లు దిల్లీ పోలీసులు బహిర్గతం చేశారు.

కేసుల వారీగా వివరాలు:

101 మందిపై హత్య (Murder) కేసులు

62 మందిపై హత్యాయత్నం (Attempt to Murder)

284 మందిపై దోపిడీ (Robbery/Dacoity)

229 మందిపై ఆయుధాల చట్టం (Arms Act) ఉల్లంఘన

61 మందిపై అత్యాచారం (Rape) ఆరోపణలు

25 మందిపై లైంగిక వేధింపులు

6 మందిపై పోక్సో (POCSO) కేసులు నమోదై ఉన్నాయని వెల్లడించారు.

కొందరు నిరసనకారులు ఉద్దేశపూర్వకంగానే భద్రతా బలగాలపై దాడికి తెగబడ్డారని, దానికి సంబంధించిన వీడియో ఆధారాలను సైతం సేకరించామని పోలీసులు తెలిపారు. విద్యార్థులు శాంతియుతంగా నిరసన తెలపాలని, ఇలాంటి నేరచరిత్ర ఉన్న అసాంఘిక శక్తుల పట్ల అప్రమత్తంగా ఉండాలని హెచ్చరించారు.