Delhi: సోనియా గాంధీకి ఢిల్లీ వ్యాపారుల సంచలన లేఖ.. కాంగ్రెస్ మెగా ర్యాలీతో రూ.12,000 కోట్ల నష్టం!

Delhi: దేశ రాజధాని ఢిల్లీలో కాంగ్రెస్ పార్టీ తలపెట్టిన భారీ ఆందోళన కార్యక్రమం ఇప్పుడు స్థానిక వ్యాపార వర్గాల్లో తీవ్ర కలకలం రేపుతోంది. కేంద్ర ఎన్నికల సంఘం ప్రధాన అధికారి (CEC) రాజీనామా చేయాలనే ప్రధాన డిమాండుతో నవంబర్ 1వ తేదీన కాంగ్రెస్ పార్టీ 'మెగా ర్యాలీ'కి పిలుపునిచ్చింది. అయితే, దీపావళి పండగ వేళ ఈ తరహా భారీ ఆందోళనలు నిర్వహించడం వల్ల తమ వ్యాపారాలు తీవ్రంగా నష్టపోతాయని, కాబట్టి ఈ ర్యాలీని వాయిదా వేసుకోవాలని ఢిల్లీలోని వ్యాపార సంఘాలు కాంగ్రెస్ అగ్రనేత రాహుల్ గాంధీని పలుమార్లు కోరాయి. అయినప్పటికీ ఆయన నుంచి ఎలాంటి సానుకూల స్పందన రాకపోవడంతో, తాజాగా 'ఛాంబర్ ఆఫ్ ట్రేడ్ అండ్ ఇండస్ట్రీ' (CTI) కాంగ్రెస్ పార్లమెంటరీ పార్టీ నేత సోనియా గాంధీకి సంచలన లేఖ రాసింది.

తమ వార్షిక జీవనోపాధికి ఎంతో కీలకమైన దీపావళి పండగ సీజన్‌లో ర్యాలీలు, ధర్నాలు నిర్వహించడం వల్ల ఢిల్లీలోని ప్రధాన మార్కెట్లలో వాణిజ్య కార్యకలాపాలకు తీవ్ర అంతరాయం కలుగుతుందని సీటీఐ ఆందోళన వ్యక్తం చేసింది. కేవలం వ్యాపారాలపైనే ఆధారపడి జీవిస్తున్న లక్షలాది కుటుంబాల భవిష్యత్తును పరిగణనలోకి తీసుకుని, ఈ మెగా ర్యాలీని నవంబర్ 10 లేదా 11వ తేదీలకు వాయిదా వేయాలని సోనియా గాంధీకి విజ్ఞప్తి చేసింది. ఒకవేళ వాయిదా వేయడం కుదరకపోతే, రద్దీగా ఉండే వాణిజ్య ప్రాంతాలకు దూరంగా నిరసన ప్రదేశాన్ని మార్చాలని లేఖలో కోరింది. తాము కాంగ్రెస్ చేసే రాజకీయ ప్రదర్శనలకు వ్యతిరేకం కాదని, కేవలం పండగ సమయంలో వ్యాపారాలు, సామాన్యుల జీవనోపాధి దెబ్బతింటుందనే ఈ విజ్ఞప్తి చేస్తున్నామని స్పష్టం చేసింది.

ఈ ర్యాలీ కారణంగా ఢిల్లీలోని ఇరుకైన వీధుల్లోకి లక్షలాది మంది నిరసనకారులు, దాదాపు 20 వేలకు పైగా వాహనాలు వచ్చే అవకాశం ఉందని, దానివల్ల వాణిజ్య ప్రాంతాలలో ట్రాఫిక్ స్తంభించి రూ.12,000 కోట్ల విలువైన వ్యాపారం దెబ్బతినే ప్రమాదం ఉందని సీటీఐ ఛైర్మన్ బ్రిజేశ్ గోయల్ ఆందోళన వ్యక్తం చేశారు. పండగ సమయంలో వ్యాపారుల ప్రయోజనాలను కాపాడాలని ఆయన విజ్ఞప్తి చేశారు.