Jantar Mantar : జంతర్‌మంతర్ వద్ద గొంతెత్తిన ఏకైక తెలుగు హీరో అతనే ..!

Aditya Om: దేశ రాజధాని ఢిల్లీలోని చారిత్రక జంతర్ మంతర్ వేదికగా యువత గళం విప్పిన జెన్-జీ ఆందోళనలు ప్రస్తుతం దేశవ్యాప్తంగా తీవ్ర చర్చనీయాంశంగా మారాయి. నీట్ పరీక్షల్లో జరిగిన అక్రమాలు, ప్రశ్నాపత్రాల లీకేజీలకు వ్యతిరేకంగా వేలాది మంది విద్యార్థులు, యువకులు రోడ్లపైకి వచ్చి వినూత్న రీతిలో తీవ్ర నిరసనలు తెలిపారు. తమ భవిష్యత్తుతో ఆడుకుంటున్న వారిపై కఠిన చర్యలు తీసుకోవాలని, దేశ విద్యా వ్యవస్థలో సమూల మార్పులు తీసుకురావాలని వారు గట్టిగా డిమాండ్ చేశారు.

ఈ క్రమంలో నీట్ పరీక్షల నిర్వహణలో జరిగిన వీలైనన్ని అక్రమాలకు బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని విద్యార్థి లోకం డిమాండ్ చేసింది. ఆందోళనలను అణచివేసేందుకు పోలీసులు వాటర్ క్యానన్లు, టియర్ గ్యాస్ ఉపయోగించినప్పటికీ యువత ఎక్కడా వెనకడుగు వేయకపోవడం విశేషం.

ఒకవైపు తీవ్ర ఆగ్రహం వ్యక్తం చేస్తూనే, మరొకవైపు పాటలు పాడుతూ, నృత్యాలు చేస్తూ, వ్యంగ్య ధోరణిలో నిరసనలు తెలుపుతూ తమ ఆవేదనను వినూత్నంగా చాటారు. విద్యార్థులపై పోలీసుల బలప్రయోగాన్ని ఖండిస్తూ కాంగ్రెస్, టీఎంసీ వంటి పలు ప్రతిపక్ష పార్టీలు తమ పూర్తి మద్దతును ప్రకటించాయి.

అనుకున్నది సాధించే వరకు జెన్-జీ విశ్రమించలేదు. మొత్తానికి ధర్మేంద్ర ప్రధాన్ రాజీనామా చేసే వరకు వదిలిపెట్టలేదు. అయితే ఈ ఆందోళనకు తెలుగు చిత్ర పరిశ్రమకు చెందిన ప్రముఖ నటుడు, దర్శకుడు ఆదిత్య ఓం స్వయంగా హాజరై విద్యార్థులకు తన పూర్తి సంఘీభావం తెలిపారు. జంతర్ మంతర్ వద్ద ధర్నా చేస్తున్న విద్యార్థుల మధ్య నిలబడి, విద్యా వ్యవస్థను తక్షణమే ప్రక్షాళన చేయాల్సిన అవసరం ఎంతైనా ఉందని ఆయన గళమెత్తారు. సమాజంలో మార్పు కోసం నిలబడటంలో, బాధితుల వైపు నిలవడంలో తాను ఎప్పుడూ ముందుంటానని ఆదిత్య ఓం మరోసారి నిరూపించుకున్నారు.

అయితే, విద్యార్థుల పక్షాన పోరాడేందుకు ఏకంగా ఢిల్లీ దాకా వెళ్లి మద్దతు తెలిపిన ఏకైక తెలుగు నటుడు ఆదిత్య ఓం మాత్రమే కావడం ఇప్పుడు సోషల్ మీడియాలో హాట్ టాపిక్‌గా మారింది. లక్షలాది మంది తెలుగు విద్యార్థుల భవిష్యత్తుకు సంబంధించిన ఈ తీవ్రమైన అంశంపై టాలీవుడ్ స్టార్ హీరోలు, ఆంధ్రా-తెలంగాణ ప్రాంతాలకు చెందిన ప్రజాప్రతినిధులు ఎందుకు మౌనంగా ఉన్నారంటూ నెటిజన్లు తీవ్రంగా ప్రశ్నిస్తున్నారు.

సినిమాల్లో సమాజ శ్రేయస్సు కోసం ఉపన్యాసాలు ఇచ్చే పెద్ద హీరోలు, నిజ జీవితంలో విద్యార్థులు రోడ్డెక్కినప్పుడు ఎందుకు స్పందించడం లేదని నెట్టింట విమర్శలు వెల్లువెత్తుతున్నాయి. కష్టాల్లో ఉన్న విద్యార్థుల వెంటే నిలబడి ధైర్యాన్ని నూరిపోసిన ఆదిత్య ఓం పై ప్రస్తుతం తెలుగు రాష్ట్రాల్లో ప్రశంసల వర్షం కురుస్తోంది.