Delhi Protests: లాక్‌డౌన్ దిశగా దేశ రాజధాని.. అష్టదిగ్బంధంలో సెంట్రల్ ఢిల్లీ

Delhi Protests: వివిధ రాజకీయ పార్టీలు, విద్యార్థి సంఘాలు జంతర్ మంతర్ వద్ద భారీ ఆందోళనలకు పిలుపునిచ్చిన నేపథ్యంలో దేశ రాజధాని ఢిల్లీలో తీవ్ర ఉద్రిక్త పరిస్థితులు నెలకొన్నాయి. ముందస్తు భద్రతా చర్యల్లో భాగంగా నగరంలో లాక్‌డౌన్ వంటి వాతావరణం అలుముకుంది. అవాంఛనీయ సంఘటనలు జరగకుండా, పుకార్లు వ్యాపించకుండా అడ్డుకునేందుకు ఈరోజు అర్ధరాత్రి నుంచి సెంట్రల్ ఢిల్లీ పరిధిలో మొబైల్ ఇంటర్నెట్ సేవలను పూర్తిగా నిలిపివేస్తున్నట్లు యంత్రాంగం ప్రకటించింది. రాజధాని నలుమూలలా వేలాది మంది పోలీసులు, భద్రతా బలగాలు రంగంలోకి దిగాయి. ఎలాంటి అల్లర్లకు తావులేకుండా దుకాణాలు, ప్రైవేటు కార్యాలయాలను మూసివేయాలని పోలీసులు ఇప్పటికే వ్యాపారులకు సూచించారు.

57 మెట్రో స్టేషన్లు, రైల్వే సర్వీసులపై ఆంక్షలు

ప్రజా రవాణా వ్యవస్థపై కూడా తీవ్ర ఆంక్షలు అమల్లోకి వచ్చాయి. ఈరోజు అర్ధరాత్రి 10 గంటల నుంచి సెంట్రల్ ఢిల్లీ పరిధిలోని ఏకంగా 57 మెట్రో స్టేషన్ల గేట్లను మూసివేస్తున్నట్లు ఢిల్లీ మెట్రో రైల్ కార్పొరేషన్ (DMRC) ప్రకటించింది. అలాగే న్యూఢిల్లీ, హజ్రత్ నిజాముద్దీన్ రైల్వే స్టేషన్లలో పలు రైలు సర్వీసుల రాకపోకలను నిలిపివేస్తూ రైల్వే శాఖ నిర్ణయం తీసుకుంది. సెంట్రల్ ఢిల్లీని ఇతర ప్రాంతాలతో అనుసంధానించే ప్రధాన రహదారుల వద్ద పోలీసులు బారికేడ్లు ఏర్పాటు చేసి తనిఖీలు తీవ్రతరం చేయడంతో సెంట్రల్ ఢిల్లీ పూర్తిగా అష్టదిగ్బంధంలో చిక్కుకుంది.

సుప్రీంకోర్టు కీలక ఆదేశాలు.. పోలీసుల క్షుణ్ణ తనిఖీలు

ఢిల్లీలో ఆంక్షల పర్వంపై దాఖలైన పిటిషన్లను విచారించిన దేశ అత్యున్నత న్యాయస్థానం సుప్రీంకోర్టు కీలక వ్యాఖ్యలు చేసింది. ప్రజలకు ఇబ్బందులు కలగకుండా కేవలం అవసరమైన మేరకే నియంత్రణ చర్యలు చేపట్టి, సేవలను క్రమబద్ధీకరించాలని అధికారులను ఆదేశించింది. అలాగే శాంతియుత నిరసనలు తెలిపేందుకు జంతర్ మంతర్ కాకుండా ప్రత్యామ్నాయంగా మరో ప్రదేశాన్ని కేటాయించాలని పోలీసులకు స్పష్టం చేసింది. మరోవైపు శాంతిభద్రతల పరిరక్షణ కోసం ఢిల్లీ పోలీసులు నగరంలోని హోటళ్లు, పీజీ హాస్టళ్లలో విస్తృత తనిఖీలు నిర్వహిస్తున్నారు.

23 వేల మంది బలగాల మోహరింపు.. సెక్షన్ 163 అమల్లోకి

భద్రతా దృష్ట్యా సెంట్రల్ ఢిల్లీ వ్యాప్తంగా బిఎన్‌ఎస్ యాక్ట్ (BNS Act) సెక్షన్ 163 కింద నిషేధాజ్ఞలు విధించారు. నగరంలో ఎలాంటి ధర్నాలు, ర్యాలీలు, నిరసన కార్యక్రమాలకు అనుమతి లేదని పోలీసులు మైకుల ద్వారా మైదానాల్లో మైకింగ్ చేస్తూ హెచ్చరిస్తున్నారు. కాగా సీజేపీ (CJP) చేపట్టిన ధర్నాకు ఢిల్లీ పోలీసులు ముందస్తు అనుమతి నిరాకరించారు. ముందుజాగ్రత్త చర్యగా సెంట్రల్ ఢిల్లీ పరిధిలో ఏకంగా 23 వేల మంది కేంద్ర సాయుధ బలగాలను (CAPF) మోహరించి భారీ భద్రతను ఏర్పాటు చేశారు. సున్నితమైన ప్రాంతాలు, కూడళ్లలో ప్రత్యేక సీసీ కెమెరాలను ఏర్పాటు చేసి పరిస్థితిని పోలీసులు నిరంతరం సమీక్షిస్తున్నారు.