CJP Protest: చెప్పులు, చెంబులతో బెంగళూరులో నిరసన.. రంగంలోకి ధృవ్ రాఠీ, ప్రకాష్ రాజ్

CJP Protest: కర్ణాటక రాజధాని బెంగళూరులోని ఫ్రీడమ్ పార్క్ వేదికగా పొలిటికల్ హీట్ ఒక్కసారిగా పెరిగింది. స్పెషల్ ఇంటెన్సివ్ రివిజన్ (SIR) ప్రక్రియలో ఓట్లు గల్లంతయ్యాయని ఆరోపిస్తూ కాక్రోచ్ జనతా పార్టీ(CJP) ఆధ్వర్యంలో భారీ నిరసన కార్యక్రమం ప్రారంభమైంది. సీఈసీ జ్ఞానేష్ కుమార్ తక్షణమే రాజీనామా చేయాలని డిమాండ్ చేస్తూ చేపట్టిన ఈ ఆందోళనకు ప్రముఖ యూట్యూబర్ ధృవ్ రాఠీ, నటుడు ప్రకాష్ రాజ్ తమ పూర్తి మద్దతు ప్రకటించారు.

బెంగళూరులో చెంబు-చెప్పుల ప్రదర్శన

CJP వ్యవస్థాపకుడు అభిజీత్ దిప్కే నాయకత్వంలో ఉదయం 10:30 గంటల నుంచి ఫ్రీడమ్ పార్క్‌లో పీపుల్స్ ట్రిబ్యునల్‎తో పాటు వినూత్నంగా చెప్పుల నిరసన నిర్వహించారు. ఓటర్ల జాబితా నుంచి పేర్లు అక్రమంగా తొలగించబడిన బాధితులను నేరుగా కలిసి వారి సమస్యలను దిప్కే విన్నారు. పౌర హక్కులను కాలరాస్తున్నారని ఆరోపిస్తూ బాధితులందరూ ఒకే వేదికపైకి వచ్చి ఎన్నికల సంఘం తీరుపై నిరసన గళం విప్పారు.

రంగంలోకి ధృవ్ రాఠీ, ప్రకాష్ రాజ్

యూట్యూబర్ ధృవ్ రాఠీ సోషల్ మీడియా వేదికగా ఒక వీడియో విడుదల చేస్తూ బెంగళూరు, ఢిల్లీ నిరసనల్లో పౌరులందరూ పెద్ద ఎత్తున పాల్గొనాలని పిలుపునిచ్చారు. ప్రకాష్ రాజ్ కూడా ఈ పీపుల్స్ ట్రిబ్యునల్‌లో పాల్గొని ప్రజాస్వామ్య పరిరక్షణ కోసం కర్ణాటక ప్రజలందరూ ముందుకు రావాలని కోరారు. రాష్ట్రవ్యాప్తంగా ఉన్న పలు యువజన, పౌర సమాజాల ప్రతినిధులు ఈ పోరాటంలో భాగస్వాములయ్యారు.

Gyanesh, it’s done bro

Jai Hind 🇮🇳 https://t.co/XHaTlRizXS

— Dhruv Rathee (@dhruv_rathee) October 7, 2026

జంతర్ మంతర్ సక్సెస్ తర్వాత ఢిల్లీ వైపు చూపు

ఇంతకుముందు ధర్మేంద్ర ప్రధాన్ రాజీనామా సమయంలో జంతర్ మంతర్ దగ్గర చేపట్టిన ఆందోళన తీవ్ర సంచలనం సృష్టించింది. సోషల్ మీడియాలో మొదలైన తమ ఉద్యమం ఇప్పుడు దేశవ్యాప్తంగా యువత గొంతుకగా మారిందని CJP నాయకులు స్పష్టం చేశారు. బెంగళూరు నిరసన తర్వాత అక్టోబర్ 10న ఢిల్లీలోని జంతర్ మంతర్ దగ్గర సీఈసీ రాజీనామాను కోరుతూ మరో భారీ ప్రదర్శన చేపట్టబోతున్నారు.

ఎన్నికల సంఘంపై విపక్షాల ఫైర్

ఓటర్ల జాబితా సవరణ (SIR) ప్రక్రియలో తీవ్ర అక్రమాలు జరుగుతున్నాయని ప్రతిపక్షాలు కూడా గళమెత్తుతున్నాయి. నోటీసులు ఇవ్వకుండా, సరైన పరిశీలన చేయకుండా లక్షలాది ఓట్లను తొలగించడమేంటని విపక్ష నాయకులు ప్రశ్నిస్తున్నారు. సీఈసీ జ్ఞానేష్ కుమార్ దిగిపోవాల్సిందేనని డిమాండ్ చేస్తూ రాబోయే రోజుల్లో పోరాటాన్ని మరింత ఉధృతం చేస్తామని నాయకులు హెచ్చరిస్తున్నారు.