Driving Licence: డ్రైవింగ్ లైసెన్స్ విధానంలో కేంద్రం కీల‌క మార్పులు.. ఆ త‌ప్పు చేస్తే లైసెన్స్ ర‌ద్దు

Driving Licence: డ్రైవింగ్‌ లైసెన్స్‌కు ‘గ్రేడెడ్‌ పాయింట్స్‌ సిస్టమ్‌’

ఢిల్లీలో జరిగిన సొసైటీ ఆఫ్‌ ఇండియన్‌ ఆటోమొబైల్‌ మాన్యుఫ్యాక్చరర్స్‌ (SIAM) 66వ వార్షిక సమావేశంలో కేంద్ర రోడ్డు రవాణా, రహదారుల శాఖ మంత్రి నితిన్‌ గడ్కరీ కీల‌క వ్యాఖ్య‌లు చేశారు. డ్రైవింగ్‌ లైసెన్స్‌కు ‘గ్రేడెడ్‌ పాయింట్స్‌ సిస్టమ్‌’ తీసుకొచ్చే ఆలోచ‌న ఉన్న‌ట్లు పేర్కొన్నారు. ప్రస్తుతం జరిమానాలు చెల్లించి బయటపడుతున్న పలువురు వాహనదారుల డ్రైవింగ్‌ ప్రవర్తనను దీర్ఘకాలికంగా పర్యవేక్షించేలా కొత్త వ్యవస్థ ఉండొచ్చని తెలుస్తోంది.

తప్పు చేస్తే రికార్డులో నమోదు.. పరిమితి దాటితే లైసెన్స్‌పై చర్యలు

ప్రతిపాదిత విధానం ప్రకారం ట్రాఫిక్‌ రూల్స్‌ను ఉల్లంఘించిన ప్రతిసారీ డ్రైవర్‌ రికార్డులో నెగెటివ్‌ పాయింట్లు చేరుతాయి. అతివేగం, రెడ్‌ సిగ్నల్‌ను దాటడం, నిర్లక్ష్యంగా డ్రైవింగ్‌ చేయడం, ఇతర ప్రమాదకర ఉల్లంఘనలకు తీవ్రతను బట్టి పాయింట్లు కేటాయించే విధానాన్ని రూపొందించవచ్చు. ఒక డ్రైవర్‌కు నిర్ణీత స్థాయికి మించి ప్రతికూల పాయింట్లు చేరితే లైసెన్స్‌ను తాత్కాలికంగా నిలిపివేయడం లేదా పూర్తిగా రద్దు చేయడం వంటి చర్యలు తీసుకునే అవకాశం ఉంటుంది.

అయితే ఏ ఉల్లంఘనకు ఎన్ని పాయింట్లు ఇవ్వాలి? గరిష్ఠ పరిమితి ఎంత? ఎన్ని పాయింట్ల వద్ద సస్పెన్షన్‌ విధించాలి? వంటి అంశాలపై ప్రభుత్వం ఇంకా అధికారిక మార్గదర్శకాలను ప్రకటించలేదు. ఈ వ్యవస్థ అమల్లోకి వస్తే ఒకసారి జరిమానా చెల్లించి తప్పించుకోవడం కాకుండా డ్రైవర్‌ గత రికార్డు కూడా కీలకంగా మారుతుంది. ముఖ్యంగా తరచూ ట్రాఫిక్‌ నిబంధనలు అతిక్రమించే వారిని గుర్తించి క్రమశిక్షణలోకి తీసుకురావడమే ప్రధాన లక్ష్యంగా కనిపిస్తోంది.

జాగ్రత్తగా నడిపేవారికి కూడా ప్రయోజనాలు

కొత్త విధానం కేవలం తప్పులు చేసిన వారిని శిక్షించడానికే పరిమితం కాకపోవచ్చని కేంద్రం సంకేతాలు ఇచ్చింది. ట్రాఫిక్‌ నిబంధనలు పాటిస్తూ సురక్షితంగా వాహనాలు నడిపే వారికి ప్రోత్సాహకాలు అందించే అవకాశాన్ని కూడా పరిశీలిస్తున్నారు. ఎటువంటి ఉల్లంఘనలు లేకుండా మంచి డ్రైవింగ్‌ రికార్డు కొనసాగిస్తున్న వారికి బీమా ప్రీమియంలో రాయితీలు లేదా ఇతర ప్రయోజనాలు కల్పించే అంశంపై చర్చ జరుగుతోంది. దీంతో వాహనదారుల్లో బాధ్యతాయుతమైన డ్రైవింగ్‌పై మరింత ఆసక్తి పెరిగే అవకాశం ఉంది.

అంటే కొత్త విధానంలో రెండు కోణాలు ఉండేలా ప్రభుత్వం ఆలోచిస్తున్నట్లు తెలుస్తోంది. ఒకవైపు పదేపదే తప్పులు చేసే వారికి కఠిన చర్యలు, మరోవైపు నియమాలు పాటించే వారికి ప్రోత్సాహం ఇవ్వడం ద్వారా రోడ్డు భద్రతా సంస్కృతిని పెంపొందించాలని లక్ష్యంగా పెట్టుకుంది.

ప్రమాదాల నియంత్రణకు కొత్త చర్యలు..

భారత్‌లో రోడ్డు ప్రమాదాలు తీవ్ర ఆందోళన కలిగిస్తున్న నేపథ్యంలో డ్రైవర్‌ ప్రవర్తనలో మార్పు అత్యవసరమని నితిన్‌ గడ్కరీ పేర్కొన్నారు. తాజా ప్రభుత్వ గణాంకాల ప్రకారం 2025లో దేశవ్యాప్తంగా 5.13 లక్షలకు పైగా రోడ్డు ప్రమాదాలు నమోదయ్యాయి. ఈ ఘటనల్లో సుమారు 1.83 లక్షల మంది ప్రాణాలు కోల్పోయారు. సగటున గంటకు దాదాపు 59 ప్రమాదాలు, 21 మరణాలు చోటుచేసుకున్నట్లు గణాంకాలు చెబుతున్నాయి. ప్రమాదాల్లో మరణించిన వారిలో ద్విచక్ర వాహనదారుల వాటా 46.2 శాతంగా ఉండటం పరిస్థితి తీవ్రతను తెలియజేస్తోంది.

ఈ నేపథ్యంలో వాహనాల భద్రతా ప్రమాణాలతో పాటు ప్రమాదాలకు కారణమవుతున్న డ్రైవింగ్‌ అలవాట్లను కూడా నియంత్రించాలని కేంద్రం భావిస్తోంది. భారత్‌ ఎన్‌క్యాప్‌ 2.0ను 2027 అక్టోబర్‌ నుంచి అమలు చేసే దిశగా చర్యలు చేపడుతున్నట్లు గడ్కరీ వెల్లడించారు. వాహనం ప్రమాద సమయంలో ఎంత సురక్షితంగా ఉంటుందనే అంశంతో పాటు ప్రమాద నివారణ వ్యవస్థలు, పాదచారుల రక్షణ, ప్రమాదం తర్వాత ప్రయాణికుల భద్రత వంటి అంశాలకు ఇందులో ప్రాధాన్యం పెరగనుంది.

ఇక బైక్‌ ట్యాక్సీల విషయంలోనూ గడ్కరీ కీలక సూచనలు చేశారు. ప్రైవేట్‌ ద్విచక్ర వాహనాలను బైక్‌ ట్యాక్సీ సేవలకు వినియోగించుకునేందుకు రాష్ట్ర ప్రభుత్వాలు అనుమతి ఇవ్వాలని కోరారు. ముఖ్యంగా గ్రామీణ ప్రాంతాలు, చిన్న పట్టణాల్లో ఈ సేవలు అదనపు ఉపాధి అవకాశాలను కల్పించగలవని అభిప్రాయపడ్డారు. ఈ రంగం ద్వారా కోట్లాది మందికి జీవనోపాధి అవకాశాలు ఏర్పడే సామర్థ్యం ఉందని ఆయన తెలిపారు.

అధిక ప్రమాదాలకు అవకాశం ఉన్న హైవేలు, మైనింగ్‌ ప్రాంతాల్లో పనిచేసే డ్రైవర్లు, కార్మికుల ఆరోగ్యంపై కూడా కేంద్రం దృష్టి పెట్టింది. ఇందులో భాగంగా ‘సురక్ష’ పేరుతో పైలట్‌ కార్యక్రమాన్ని ప్రారంభించారు. తొలిదశలో నాగ్‌పూర్‌–కాంప్టీ మధ్య NH-44 పరిధితో పాటు మహారాష్ట్రలోని చంద్రపూర్‌ మైనింగ్‌ ప్రాంతంలో సుమారు 150 కిలోమీటర్ల పరిధిలో 10 వేల మందికి ఆరోగ్య పరీక్షలు, కౌన్సెలింగ్‌ అందించనున్నారు.