DUSU Election 2026: ఢిల్లీ యూనివర్సిటీలో ABVP జోరు.. 3 కీలక పోస్టులు కైవసం!

DUSU Election 2026: ఢిల్లీ యూనివర్సిటీ విద్యార్థి యూనియన్ (DUSU) 2026 ఎన్నికల ఫలితాలు వెలువడ్డాయి. అత్యంత ఉత్కంఠభరితంగా సాగిన ఈ పోరులో అఖిల భారత విద్యార్థి పరిషత్ (ABVP) తన ఆధిపత్యాన్ని చాటుకుంది. నార్త్ క్యాంపస్‌లోని విశ్వవిద్యాలయ స్పోర్ట్స్ స్టేడియం మల్టీపర్సస్ హాల్‌లో శనివారం ఉదయం 8 గంటలకు ప్రారంభమైన ఓట్ల లెక్కింపు ప్రతి రౌండ్‌లోనూ తీవ్ర ఆసక్తిని రేకెత్తించింది. ప్రధాన నాలుగు కేంద్ర పదవుల్లో మూడింటిని ఏబీవీపీ సొంతం చేసుకోగా, ఉపాధ్యక్ష పదవిని స్వతంత్ర అభ్యర్థి కైవసం చేసుకుని సంచలనం సృష్టించారు.

ఏబీవీపీ అభ్యర్థుల ఆధిక్యం, స్వతంత్ర అభ్యర్థి సంచలనం

అధ్యక్ష పీఠం కోసం జరిగిన పోరులో ఏబీవీపీకి చెందిన యాష్ దబాస్ విజయం సాధించారు. ఆయన మొత్తం 24,576 ఓట్లు సాధించి, తన సమీప ప్రత్యర్థి, ఎన్ఎస్ యూఐ (NSUI) అభ్యర్థి విజయ్ మీనాపై 2,053 ఓట్ల ఆధిక్యంతో గెలుపొందారు. కార్యదర్శి (సెక్రటరీ) పదవిని ఏబీవీపీకి చెందిన రియా ఛావ్‌డీ 21,650 ఓట్లు పొంది, ఎన్ఎస్ యూఐ అభ్యర్థి నమ్రతా చౌదరిపై 6,781 ఓట్ల మెజారిటీతో దక్కించుకున్నారు.

జాయింట్ సెక్రటరీ స్థానంలో ఏబీవీపీ అభ్యర్థి లక్ష్య రాజ్ సింగ్ 16,641 ఓట్లు సాధించి, స్వతంత్ర మద్దతు కలిగిన విశేష్ యాదవ్‌పై 863 ఓట్ల స్వల్ప మెజారిటీతో విజయం సాధించారు. కాగా, ఉపాధ్యక్ష (వైస్ ప్రెసిడెంట్) పదవిలో స్వతంత్ర అభ్యర్థి దీపాంశు షోకీన్ ఏకంగా 30,615 ఓట్లు సాధించి, ఏబీవీపీ అభ్యర్థి ఇషు మౌర్యపై 13,705 ఓట్ల భారీ ఆధిక్యంతో ఘనవిజయం నమోదు చేశారు.

నమోదైన పోలింగ్ శాతం , పోటీ స్వరూపం

ఈ ఏడాది డిఎస్‌యు ఎన్నికల్లో మొత్తం 1.51 లక్షల మందికి పైగా అర్హులైన విద్యార్థుల్లో 40.46 శాతం మంది తమ ఓటు హక్కును వినియోగించుకున్నారు. మొత్తం 52 పోలింగ్ కేంద్రాల్లో డే కాలేజీ, ఈవినింగ్ కాలేజీ విద్యార్థులకు వేర్వేరు సమయాల్లో శుక్రవారం రోజున పోలింగ్ నిర్వహించారు.

నాలుగు కేంద్ర పదవుల కోసం మొత్తం 20 మంది అభ్యర్థులు రంగంలోకి దిగారు. ఏబీవీపీ, ఎన్ఎస్ యూఐలతో పాటు ఏఐఎస్ఏ-ఎస్ఎఫ్ఐ కూటమి , స్వతంత్ర అభ్యర్థులు హోరాహోరీగా ప్రచారం నిర్వహించి పోటీని రసవత్తరంగా మార్చారు.

కోర్టు మార్గదర్శకాలు , కట్టుదిట్టమైన భద్రత

ఎన్నికల ప్రచార సమయంలో చోటుచేసుకున్న ఘర్షణలు, అల్లర్ల నేపథ్యాన్ని దృష్టిలో ఉంచుకుని అధికారులు భారీ భద్రతా ఏర్పాట్లు చేశారు. ఢిల్లీ హైకోర్టు ఆదేశాల ప్రకారం ఫలితాల ప్రకటన అనంతరం ఎలాంటి విజయయాత్రలు, డప్పు వాయిద్యాలు, ర్యాలీలు నిర్వహించకూడదని ఆంక్షలు విధించారు. ఫలితాలు పూర్తిస్థాయిలో వెలువడటంతో కొత్తగా ఎన్నికైన డిఎస్‌యు సెంట్రల్ ప్యానెల్ 2026-27 విద్యా సంవత్సరానికి గాను అధికారికంగా బాధ్యతలు స్వీకరించనుంది.