Kerala: కేరళలో ఈడీ అధికారులపై దాడి కేసు.. 8 మందిని అరెస్ట్ చేసిన పోలీసులు!

Kerala: కేరళ మాజీ ముఖ్యమంత్రి, సీపీఎం సీనియర్ నేత పినరయి విజయన్ నివాసంలో బుధవారం ఎన్‌ఫోర్స్‌మెంట్ డైరెక్టరేట్ (ED) నిర్వహించిన సోదాలు తీవ్ర ఉద్రిక్తతకు దారితీశాయి. ఈడీ రెయిడ్స్ సందర్భంగా అధికారులపై దాడికి యత్నించిన కేసులో ఇప్పటివరకు 8 మందిని అరెస్టు చేసినట్లు కేరళ రాష్ట్ర పోలీస్ చీఫ్ ఎ. చంద్రశేఖర్ గురువారం అధికారికంగా వెల్లడించారు.

రాష్ట్ర హోం మంత్రి రమేశ్ చెన్నితాలతో అత్యవసరంగా సమావేశమైన అనంతరం పోలీస్ చీఫ్ మీడియాతో మాట్లాడారు. ఈ హింసాత్మక ఘటనకు సంబంధించి మిగిలిన నిందితులను కూడా ఇప్పటికే గుర్తించామని, ఎవరినీ వదిలిపెట్టకుండా అందరిపై కఠిన చర్యలు తీసుకోవాలని హోం మంత్రి ఆదేశించారని ఆయన పేర్కొన్నారు.

పోలీస్ చీఫ్ చంద్రశేఖర్ మాట్లాడుతూ.. "సోదాల ఆపరేషన్ ప్రారంభించే ముందు ఈడీ అధికారులు మాకు ఎలాంటి ముందస్తు సమాచారం ఇవ్వలేదు. కానీ బుధవారం ఉదయం రెయిడ్స్ మొదలైన విషయం తెలియగానే భద్రత కోసం భారీ స్థాయిలో పోలీసులను పంపించాము" అని స్పష్టం చేశారు.

మ్యూజియమ్ పోలీస్ స్టేషన్‌లో నమోదైన ఎఫ్ఐఆర్ (FIR) ప్రకారం.. నిరసనకారులు అత్యంత విపరీతంగా ప్రవర్తించారు. సోదాలను అడ్డుకునే క్రమంలో నిందితులు కర్రలతో ఈడీ అధికారులపై దాడికి దిగారు. ఈ దాడిలో ఒక ఈడీ అధికారి చేయి విరగడమే కాకుండా, కారు డ్రైవర్ కూడా తీవ్రంగా గాయపడ్డారు. ఈడీ అధికారుల వాహనాల అద్దాలను నిరసనకారులు పూర్తిగా పగలగొట్టారు. పరిస్థితిని అదుపు చేయడానికి ప్రయత్నించిన స్థానిక కేరళ పోలీసులు, సీఆర్‌పీఎఫ్ (CRPF) సిబ్బందిని సైతం టార్గెట్ చేశారు.

ఈ అల్లర్ల కారణంగా దాదాపు రూ.3 లక్షల మేర ప్రభుత్వ, ప్రైవేట్ ఆస్తులు ధ్వంసమైనట్లు అంచనా వేస్తున్నారు. ఈ హింసాత్మక ఘటనకు సంబంధించి కేరళ పోలీసులు దాదాపు 300 మంది నిరసనకారులపై కేసులు నమోదు చేశారు. అనుమతి లేకుండా గుమిగూడటం, ప్రభుత్వ అధికారుల విధులకు ఆటంకం కలిగించడం, అక్రమ నిర్బంధం మరియు హత్యాయత్నం (Attempt to Murder) తదితర తీవ్రమైన సెక్షన్ల కింద ఎఫ్ఐఆర్ నమోదు చేశారు.

ప్రముఖ మైనింగ్ సంస్థ సీఎంఆర్ఎల్ (CMRL) కు సంబంధించిన మనీలాండరింగ్ వ్యవహారంలో (CMRL Money Laundering Case) భాగంగానే మాజీ సీఎం పినరయి విజయన్, అలాగే ఆయన కుటుంబ సభ్యుల ఇళ్లపై ఈడీ అధికారులు బుధవారం ఏకకాలంలో ఈ సోదాలు నిర్వహించారు. ఈ సోదాల నేపథ్యంలోనే సీపీఎం శ్రేణులు పెద్ద ఎత్తున తరలివచ్చి ఆందోళనలకు దిగడం ఈ హింసకు దారితీసింది.