Brij Bhushan Singh: లైంగిక వేధింపుల కేసులో బ్రిజ్‌భూషణ్‌కు బిగ్ రిలీఫ్.. నిర్దోషిగా తేల్చిన కోర్టు!

Brij Bhushan Singh: దేశవ్యాప్తంగా తీవ్ర కలకలం రేపిన మహిళా రెజ్లర్ల లైంగిక వేధింపుల కేసులో భారత రెజ్లింగ్ సమాఖ్య (డబ్ల్యూఎఫ్‌ఐ) మాజీ అధ్యక్షుడు, మాజీ ఎంపీ బ్రిజ్‌భూషణ్‌ శరణ్‌ సింగ్‌కు ఢిల్లీలోని రౌజ్ అవెన్యూ కోర్టులో బిగ్ రిలీఫ్ లభించింది. ఈ కేసులో ఆయనతో పాటు సహ నిందితుడైన డబ్ల్యూఎఫ్‌ఐ మాజీ సహాయ కార్యదర్శి వినోద్ తోమర్‌ను కూడా కోర్టు నిర్దోషిగా ప్రకటిస్తూ సోమవారం తీర్పునిచ్చింది.

ఢిల్లీ రౌజ్ అవెన్యూ కోర్టు అదనపు చీఫ్ మెట్రోపాలిటన్ మేజిస్ట్రేట్ (ACJM) అశ్విని పన్వార్ ఈ తీర్పును వెలువరించారు. ప్రాసిక్యూషన్ చార్జ్‌షీట్‌లో మోపిన ఆరోపణలకు తగిన నిరూపణలు, సరైన సాక్ష్యాధారాలు లేకపోవడం మరియు వాంగ్మూలాల్లోని వ్యత్యాసాల ఆధారంగా నిందితులపై మోపిన కేసులను కొట్టివేస్తున్నట్లు ధర్మాసనం స్పష్టం చేసింది.

2023 ప్రారంభంలో ప్రముఖ ఒలింపియన్లు వినేశ్ ఫొగాట్, సాక్షి మాలిక్, బజరంగ్ పునియాతో పాటు పలువురు మహిళా రెజ్లర్లు బ్రిజ్‌భూషణ్ సింగ్‌పై లైంగిక వేధింపుల ఆరోపణలు చేస్తూ ఢిల్లీలోని జంతర్ మంతర్ వద్ద నెలల తరబడి భారీ నిరసనలు చేపట్టిన సంగతి తెలిసిందే. బాధితుల ఫిర్యాదుల మేరకు ఢిల్లీ పోలీసులు బ్రిజ్‌భూషణ్‌పై ఐపీసీ సెక్షన్లు 354, 354A, 354D, 506(1) కింద 1,500 పేజీలకు పైగా చార్జ్‌షీట్ దాఖలు చేశారు.

తీర్పు అనంతరం కోర్టు వెలుపల మాట్లాడిన బ్రిజ్‌భూషణ్ సింగ్ సంతృప్తి వ్యక్తం చేశారు. "నాపై వచ్చిన ఆరోపణల్లో ఒక్కటి రుజువైనా ఊరి వేసుకుంటానని మొదటి రోజే చెప్పాను. నేడు న్యాయస్థానం నన్ను గౌరవప్రదంగా నిర్దోషిగా తేల్చింది" అని ఆయన వ్యాఖ్యానించారు.