DY Patil: మాజీ గవర్నర్ డీవై పాటిల్ కన్నుమూత

DY Patil: త్రిపుర, బీహార్ మరియు పశ్చిమ బెంగాల్ రాష్ట్రాల మాజీ గవర్నర్, ప్రముఖ విద్యావేత్త, పద్మశ్రీ పురస్కార గ్రహీత డాక్టర్ డి.వై. పాటిల్ (90) కన్నుమూశారు. వయోభారం కారణంగా తలెత్తిన ఆరోగ్య సమస్యలతో మహారాష్ట్రలోని కొల్హాపూర్‌లో ఉన్న ఆయన స్వగృహంలో తుదిశ్వాస విడిచారు. ఆయన మరణవార్త పట్ల దేశవ్యాప్తంగా విద్యా, రాజకీయ మరియు సామాజిక రంగాల ప్రముఖులు తీవ్ర దిగ్భ్రాంతి వ్యక్తం చేస్తూ సంతాపం తెలిపారు.

1935 అక్టోబర్ 22న జన్మించిన డీవై పాటిల్, మహారాష్ట్ర శాసనసభ్యుడిగా (MLA) తన రాజకీయ ప్రస్థానాన్ని ప్రారంభించారు. ఆ తర్వాత ఆయన సేవా దృక్పథాన్ని, విశేష సేవలను గుర్తించిన కేంద్ర ప్రభుత్వం ఆయనను గవర్నర్‌గా నియమించింది. 2009 నుంచి 2013 వరకు త్రిపుర గవర్నర్‌గా సేవలందించిన ఆయన, ఆ తర్వాత బీహార్ మరియు పశ్చిమ బెంగాల్ రాష్ట్రాలకు కూడా గవర్నర్‌గా బాధ్యతలు నిర్వర్తించారు.

దేశంలో విద్యా వ్యవస్థను బలోపేతం చేయడంలో డీవై పాటిల్ పాత్ర మరవలేనిది. ఆయన స్థాపించిన ‘డీవై పాటిల్ గ్రూప్’ ఆధ్వర్యంలో భారతదేశమంతటా 182కి పైగా విద్యా సంస్థలు, 7 డీమ్డ్ విశ్వవిద్యాలయాలు విజయవంతంగా నడుస్తున్నాయి. వైద్య, ఇంజనీరింగ్, ఉన్నత విద్యా రంగాల్లో లక్షలాది మంది విద్యార్థులకు ఆయన నాణ్యమైన విద్యను అందుబాటులోకి తెచ్చారు.

విద్య, వైద్యం మరియు ప్రజాసేవా రంగాలలో ఆయన అందించిన అతులామ్యమైన కృషికి గానూ 1991లో భారత ప్రభుత్వం ఆయనను నాలుగో అత్యున్నత పౌర పురస్కారమైన ‘పద్మశ్రీ’ తో సత్కరించింది. డీవై పాటిల్ మృతి దేశ విద్యా రంగానికి తీరని లోటని, ఆయన అందించిన సేవలు చిరస్మరణీయమని పలువురు ప్రముఖులు కొనియాడారు.