TVK: విజయ్‌కు అపాయింట్‌మెంట్ ఇవ్వని గవర్నర్.. లోక్‌భవన్ నుంచి వెనుదిరిగిన దళపతి!

TVK: తమిళనాడు రాజకీయాల్లో మరోసారి ఉత్కంఠ పరిస్థితులు నెలకొన్నాయి. టీవీకే (TVK) అధినేత విజయ్ రాష్ట్రంలో ప్రభుత్వాన్ని ఏర్పాటు చేసేందుకు సిద్ధమైన తరుణంలో గవర్నర్ నిర్ణయం చర్చనీయాంశంగా మారింది. మద్దతు లేఖలతో గవర్నర్‌ను కలిసేందుకు వెళ్లిన విజయ్‌కు అపాయింట్‌మెంట్ లభించకపోవడం రాజకీయ వర్గాల్లో ప్రకంపనలు సృష్టిస్తోంది.

ప్రభుత్వ ఏర్పాటుకు అవసరమైన మెజారిటీ (118 స్థానాలు) తమకు ఉందని తెలియజేస్తూ, మద్దతు లేఖలను సమర్పించడానికి విజయ్ నేడు లోక్‌భవన్‌కు చేరుకున్నారు. అయితే, గవర్నర్ నుండి అపాయింట్‌మెంట్ లభించకపోవడంతో ఆయన అక్కడి నుండే వెనుదిరగాల్సి వచ్చింది. ఇప్పటికే కాంగ్రెస్, వామపక్షాలు, మరియు వీసీకే మద్దతు లేఖలు టీవీకేకు అందినప్పటికీ, గవర్నర్ భేటీకి నిరాకరించడం వెనుక ఉన్న కారణాలపై సందిగ్ధత కొనసాగుతోంది.

గవర్నర్ తీరును వివిధ రాజకీయ పార్టీలు తీవ్రంగా విమర్శిస్తున్నాయి. మెజారిటీ ఉన్న పార్టీని లేదా కూటమిని చర్చలకు పిలవాల్సిన బాధ్యత గవర్నర్‌పై ఉందని, అపాయింట్‌మెంట్ ఇవ్వకపోవడం ప్రజాస్వామ్య విరుద్ధమని పలువురు నేతలు అభిప్రాయపడుతున్నారు. రాష్ట్రంలో ప్రభుత్వం ఏర్పాటులో జాప్యం చేయడం వల్ల పాలన అస్తవ్యస్తమవుతుందని వారు ఆందోళన వ్యక్తం చేస్తున్నారు.

గవర్నర్ తీరుతో టీవీకే శ్రేణులు ఆందోళనకు గురవుతుండగా, విజయ్ తన తదుపరి కార్యాచరణపై పార్టీ ముఖ్య నేతలతో చర్చిస్తున్నారు. మరోసారి సమయం కోరాలా లేక చట్టపరమైన మార్గాల్లో వెళ్లాలా అనే అంశంపై టీవీకే న్యాయ నిపుణుల సలహాలు తీసుకుంటున్నట్లు సమాచారం. ఈ పరిణామంతో తమిళనాడులో రాజకీయం మరింత వేడెక్కింది.