Viral Post : రూ.36 లక్షల సంపాదన.. అయినా పిల్లలు వద్దు.. నెట్టింట వైరల్‌గా మారిన పోస్ట్..!

Viral Post : ప్రస్తుత కాలంలో పెరుగుతున్న జీవన వ్యయం సామాన్యులనే కాకుండా, లక్షల్లో సంపాదిస్తున్న వారిని కూడా కలవరపెడుతోంది. నెలకు లక్షల్లో జీతం ఉన్నప్పటికీ, భవిష్యత్తుపై ఉన్న భయం , ఆర్థిక భారాల కారణంగా కొందరు దంపతులు పిల్లలు వద్దు అనే కఠిన నిర్ణయం తీసుకుంటున్నారు. తాజాగా హర్ష గుప్తా అనే నెటిజన్ సోషల్ మీడియాలో పంచుకున్న ఒక ఉదంతం ఇప్పుడు దేశవ్యాప్తంగా చర్చనీయాంశంగా మారింది.

నెలకు రూ. 3 లక్షల సంపాదన.. కానీ సొంత గూడు లేదనే ఆవేదన

హర్ష గుప్తా తన పోస్టులో తన బంధువుకు సంబంధించిన ఆర్థిక స్థితిగతులను వివరించారు. ఆ దంపతులిద్దరూ మంచి ఉద్యోగాలు చేస్తూ ఆర్థికంగా నిలకడగా ఉన్నారు. భర్త నెలకు సుమారు రూ. 2 లక్షలు సంపాదిస్తుండగా, భార్య సుమారు రూ. 1 లక్ష ఆర్జిస్తోంది. వీరిద్దరి వార్షిక ఆదాయం కలిపి రూ. 36 లక్షల వరకు ఉంటుంది. అయితే, గురుగ్రామ్‌లో నివసిస్తున్న ఈ దంపతులు తాము పిల్లల్ని వద్దనుకుంటున్నట్లు స్పష్టం చేశారు. ఇంత సంపాదన ఉన్నప్పటికీ, గురుగ్రామ్ వంటి నగరంలో ఒక సింగిల్ బెడ్‌రూమ్ ఫ్లాట్ కొనడం కూడా తమ వల్ల కావడం లేదని వారు ఆవేదన వ్యక్తం చేశారు. కనీసం నివసించడానికి ఒక సొంత గూడు సమకూర్చుకోలేనప్పుడు, ఇక పిల్లలను పెంచడం ఎందుకని వారు ప్రశ్నిస్తున్నారు.

ఆకాశాన్నంటుతున్న విద్యా ఖర్చులు , జీవన వ్యయం

పిల్లల పెంపకంలో ప్రధాన భాగమైన చదువుకు అయ్యే ఖర్చులను కూడా ఈ దంపతులు లెక్కగట్టారు. పిల్లల స్కూల్ ఫీజుల కోసమే నెలకు సుమారు రూ. 40 వేలు ఖర్చు చేసేంత స్తోమత తమకు లేదని వారు భావిస్తున్నారు. ఈ ఉదంతం కేవలం ఒక్క జంటకు సంబంధించింది మాత్రమే కాదని, నగరాల్లో ఆకాశాన్నంటుతున్న ఇళ్ల ధరలు, స్కూలు ఫీజులు, ఇతరత్రా జీవన వ్యయాల వల్ల అనేక జంటలు ఇలాగే పిల్లల్ని వద్దనుకుంటున్నాయని హర్ష గుప్తా తన పోస్టులో అభిప్రాయపడ్డారు. మెట్రో నగరాల్లో రోజువారీ ఖర్చులు భరించలేని స్థాయికి చేరడం, పిల్లలకు నాణ్యమైన జీవితాన్ని ఇవ్వలేమనే భయం నేటి తరాన్ని ఇలాంటి నిర్ణయాల వైపు పురికొల్పుతున్నాయి.

నెటిజన్ల మధ్య భిన్నాభిప్రాయాలు

ఈ పోస్టుపై సోషల్ మీడియాలో పెద్ద ఎత్తున స్పందన వచ్చింది. అనేక మంది ఆ జంట నిర్ణయంతో ఏకీభవించారు; స్థిర ఆదాయం , జీవితం లేనప్పుడు పిల్లలు వద్దనుకోవడం తప్పుకాదని వారు అభిప్రాయపడ్డారు. బాధ్యతాయుతమైన తల్లిదండ్రులుగా ఉండాలనుకోవడమే వీరి ఉద్దేశమని కొందరు సమర్థించారు. అయితే, మరికొందరు మాత్రం ఈ నిర్ణయాన్ని తప్పుబడుతున్నారు. డబ్బు ఒక్కటే జీవితం కాదని, మరికొన్నేళ్లల్లో ఆ జంటకు తాము చేసిన తప్పు తెలిసి వస్తుందని వారు హెచ్చరిస్తున్నారు. సంపాదన రూ. 36 లక్షలు ఉన్నా సరిపోదు అనడం అతిశయోక్తి అని కూడా విమర్శలు వినిపిస్తున్నాయి. మొత్తానికి, ఈ ఉదంతం నేటి తరం ఎదుర్కొంటున్న ఆర్థిక , సామాజిక సవాళ్లకు అద్దం పడుతోంది.